1“Lewiŋic taha bapa, Lewiŋic sasawa hâcne, jaŋe Israe ŋic gâcne jaŋehec merâfâc mâreŋ me mâreŋ dâkâne gâcne ro rauc moc mi enʒepieŋ, aricne, jaŋe Wofuŋ bâzi rikecneeŋgopieŋ â taha wiac gâcne râecneeŋgopieŋ i hâcne nâhuc junʒepieŋ.
2Jaŋe qomâfâc‐jeŋic jaŋere ŋondeŋko juhuc merâfâc mâreŋ moc mi rauckenʒepieŋ. Wofuŋzi mupaŋke‐jarewec irec sâc hone bafic ejareocmu.
3Ehame kikefuŋ jaŋe lama bulimakao bâzi rikehuc taha bapa wiac kecʒiŋuc jarenʒepieŋ: Qowi ɋawene, mauc jahecne erâ ho neŋgocne.
4Ehuc nânâ gie ɋâricnaonec padi jacgoŋ â waiŋ erâ oliwa wokemaŋ wiac i mâmâc râe‐jarenʒepieŋ. Erâ lama motecne jaŋere kanʒaŋ bâtâcnehuc jarenʒepieŋ wâc.
5Wofuŋ Anutu‐ŋeŋic eki hâcne gurune gurune jueŋgopieŋ ŋoŋeraonec Lewiŋic jaŋe mimiŋzi ɋâric Wofuŋte ʒâŋeo kiŋaŋ gie bahuc juniŋte rowosâec‐jopawec.
6“Eme Lewiŋic moc e Israe hae ŋerakac ira juocmuzi faharerâ Wofuŋzi hae mâreŋ bâwosâe‐ŋareocmu ira mecne ra fisiocmu.
7Fisirâ Lewiŋic âgofâc‐ticne jaŋe Wofuŋte maio kiŋaŋ gie bahuc jueŋgopieŋ irec sâc jaha Wofuŋte ʒâŋeo kiŋaŋ gie bazo murâ bazejec.
8Ehame mamacfâc‐jeŋic jaŋere wiaczi moneŋ kitâcne‐jareme fojareha nânâ sâckoa nâ bac enʒepieŋ.
9“Ŋoŋe Wofuŋ Anutu‐ŋeŋiczi mâreŋ ŋare tahac eocmu ira fisirâ mâreŋ irec rune jaŋere eebapa mamakâcne i moc mi bâjâpenʒepieŋ.
10Ehuc ŋoŋeraonec moczi naru motecfâc‐ticne jaŋeraonec moc rorâ bâzi mi rikezejec. Erâ wâc ŋondeŋ‐ŋeŋicko findaŋdâŋ mumu ŋic, me sowidâŋ mumu ŋic, me riuc bapa, me hafec bapa,
11me qaŋgec bapa fuŋne fuŋne me faŋfaŋdâŋ mumu ŋic moc mi junʒepieŋ.
12Ŋic moc e wiac iŋucne ebac eocmu ere Wofuŋzi maname mamakâcne eocmu. Wofuŋ Anutu‐ŋeŋic e ŋic iŋucne jaŋe hâcne ʒâŋe fai‐ŋeŋicko jopa jâpec ejareocmu.
13Ŋoŋe Wofuŋ Anutu‐ŋeŋicte maio bahac fâsâc junʒepieŋ.
14Mâreŋ ro rauc eniŋmu irec rune jaŋe hâcne findaŋdâŋ â sowidâŋ mumu ŋic jaŋere dâŋte hazec râeeŋgopieŋ, ŋoŋe ine iŋuc enʒipiŋte Wofuŋ Anutu‐ŋeŋiczi aka heŋarewec.
15“Wofuŋ Anutu‐ŋeŋic e porofete no iŋucne moc ŋondeŋ‐ŋeŋicko qomâfâc‐ŋeŋic jaŋeraonec hâcne âkendâŋneme dâŋticne mana rereŋ enʒepieŋ.
16Ŋoŋe Horebe tikio tutumaŋ sâko ehuc Wofuŋ Anutu‐ŋeŋic wira wâwâsic ecnembiŋ irec sâc hâcne fuaocmu. Ŋoŋe ʒiŋuc hâcne mumbiŋ: ‘Nâŋe hâmonʒipeŋte Wofuŋ Anutu‐nâŋecte dâŋmarac mocwâc mi mananʒepeneŋ â ʒocbâruŋ sâko‐ticne mocwâc mi honenʒepeneŋ.’
17Iŋuc mupie Wofuŋzi ʒiŋuc nazawec: ‘Jaŋe dâŋ mumbiŋ i fârine.
18Irec no qomâfâc‐jeŋic jaŋeraonec porofete go iŋucne moc âkendâŋnehuc dâŋnane micticnao râepemu. Eme dâŋ âzâcne mutâc epemu i ŋic ŋokac jaza‐fârezejec.
19Ehame nore ʒâŋeo dâŋ jazame ŋic moczi mana rereŋ mi eocmu e okacne bazucnepemu.
20Me porofete moc e maŋfefe ehuc noni dâŋ âzâcne mutâc mi ecnehape e jahacne maŋte nore ʒâŋeo me nemu jaŋere ʒâŋeo ɋetickehuc dâŋ muocmu e hâmozejec.’
21Me ŋoŋe ʒiŋuc mu wioc eniŋmu mecne: ‘Dâŋ i Wofuŋzi muwec me mâcne, i weniŋuc erâ fuŋne mananaŋmu?’
22Irec ʒiŋuc mananiŋ: Porofete moc e nore ʒâŋeo dâŋ mume fâri tâmiric eme honerâ munʒepieŋ: ‘Dâŋ i Wofuŋzi mi muwec.’ Eme porofete e maŋfefe ehuc dâŋ muwecte ere mi hâwic‐ŋopazejec.
