1“Ŋic jahec jahere ŋondeŋko fâfâuc fuame dâŋgieo râec‐jofapie mumutara ŋic eki dâŋjekic mutarahuc ŋic bahac tâmiric e râeme raha bahachec e ine okacne rozejec.
2Ŋic ʒikare biŋe ekac e mumutara ŋiczi mume mai‐ticnao ecnepie waha foha kâcbiŋzi qapie arec 40 ezejec, i bahac bâfuawec irec sâc hâcne ecnenʒepieŋ.
3Qapie 40 eme behenʒepieŋ; ʒuhuckerâ qapie 40 jârume qomâ‐ŋeŋicte faio mimi fezacte.
4“Go bulimakaozi gie bagareha micticne qâqâ mi hafezemec.
5“Hahac ɋa jajahec junicmu, eme hahaczi ɋâric tâmiric juku hâmome hozec‐ticne ŋic furune moc mi râcnenʒepieŋ. Ŋowe‐ticnere ɋa eki rome ŋonâŋ‐ticne ezejec, ehuc ʒâŋetuc‐ticne moc bâfuazejec.
6Eme motec bâbâni fuaocmu e hahac‐ticnere wase bahuc ʒâŋe‐ticne mume Israe ŋondeŋko moc mi omaezejec.
7Me ŋic e hahac‐ticnere hozec qikiŋneme ine ŋokac e soŋaŋ micne jaŋerao rarâ ʒiŋuc jazazejec: ‘Ŋowe‐nanere ɋa e hahac‐ticnere ʒâŋezi Israe ŋondeŋko ʒuhuckerâ foocte mi ecnekac, ehuc hahac‐ticnere gie tofa i norao baocte takickekac.’
8Iŋuc jazame haere soŋaŋ micne jaŋe ŋic e hefârehuc dâŋ âzâcnenʒepieŋ. Eme ŋic e sifu sanaŋkehuc ʒiŋuc muocmu mecne: ‘No ŋokac e rozore takicnukac.’
9Iŋuc mume hahac‐ticnere hozeczi ra soŋaŋ micne jaŋere maio ŋic ere kikehuhu hetararâ ʒâŋe mainao tâfeckezejec, ehuc dâŋ ʒiŋuc muzejec: ‘Ŋic moc e hahac‐ticnere kikefuŋ fua soka eocte mi manasuocmu e wiac iŋuc hâcne ecnezo.’
10Ehuc e jahacne kikefuŋ irec ʒâŋe ʒiŋuc muzo: Kikehuhu hetaracnekicne ŋic ere kikefuŋ.
11“Ŋic jajahec jahe qaqac ehuc juhapire mocte ŋonâŋzi ŋowe‐ticne bafickehuc kisâ‐ticnere meonec bataraocte meticne sicnerâ ŋic e sahac tofa‐ticnao fâreocmuo
12ine meticne hetâcnenʒepieŋ; ŋoŋe ŋokac ere busâqoc moc mi mananʒepieŋ.
13“Ŋoŋe ŋemâc bâbâfuare sâc wiac teŋtiri mi bajunʒepieŋ
14â sâcmeda wiac iŋuc jaha teŋtiri wâc mi bajunʒepieŋ.
15Ŋoŋe ŋemâc bâbâfuare sâc me sâc bapare wiac gâcne i sâc mocjaha baju‐fârenʒepieŋ. Ŋoŋe iŋuc epie Wofuŋ Anutu‐ŋeŋiczi mâreŋ ŋare tahac eocmu ira dameŋ ʒora jufeniŋmu.
16Wiac teŋtiri bajuhuc eeatuc gie baniŋmu ŋic i jaŋere Wofuŋ Anutu‐ŋeŋiczi maname mamakâcne eocmu.
17“Ŋoŋe Aigita mâreŋkonec waharâ wefuhapie Amaleke ŋic jaŋe wiac eŋarembiŋ irec manasuhuc junʒepieŋ.
18Ŋoŋe hatao rahuc docke betaŋ ehapie jaŋe ŋopa jâpec eŋarembiŋ, ehuc Anuture mi hâwic‐jopaha ŋicfâc‐ŋeŋic gâcne betaŋke sâqorerâ ʒâhec jumbiŋ jaŋe jopambiŋ hâcne.
19Ŋoŋe irec hâcne Wofuŋ Anutu‐ŋeŋiczi mâreŋ ŋare tahac eme ro rauc erâ ira juhuc râsifâc‐ŋeŋic sasawa qâhuc‐joparâ wama faio juniŋmu dameŋ ira Amaleke ŋic jopa miziepie sambâŋ rurumaŋnao ʒâŋe biŋe‐jeŋic omaezejec. Ŋoŋe irec moc mi nikec‐ŋopazejec.
