Sâcmutâc Hâsine 34

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

¹Eme Mose e Moabi wâneŋkonec rarâ Jeriko hae ŋifecnao Nebo tiki ŋewec irec botâŋne Pisiga hâcne ira fewec. Feme Wofuŋzi mâreŋ sasawa, Gileade mâreŋkonec fuŋkerâ raku Daŋ mâreŋko tarakac i jâutu‐fârewec.

²Ehuc Naftali mâreŋ â Eferaim â Manase jahere mâreŋ erâ Juda mâreŋ sasawa hâwec sâkoo mickekac i mâmâc jâutu‐fârewec.

³Erâ Negebe mâreŋ â Jordaŋ wâneŋ erâ hâmu hae Jeriko irec wâneŋ raku Zoari haeo tarakac i mâmâc hone‐fârewec.

⁴Ehame Wofuŋzi kecʒiŋuc âzâcnewec: “No mâreŋ kecʒirec dâŋ i Abraham, Isaka â Jakobo ʒiŋuc muhuc mupaŋke‐jarepo: ‘No ɋâricfâc‐ŋeŋic jarepemu.’ No iŋuc mupore mana‐garehape ʒâŋezi sawa honekomec, mâc ira raraʒi ine mi raʒicmu.”

⁵Iŋuc âzâcneme Wofuŋte kiŋaŋŋic Mose e Wofuŋte micdâŋ irec sâcko Moabi mâreŋko hâmowec.

⁶Hâmome Wofuŋzi Moabi mâreŋko Bete‐Peoro ŋifecnao wâneŋ fokac ira duckewec. Ʒâŋeruŋ‐ticne ine ŋic moczi mi honembiŋ erâ dameŋ ʒiŋuczia wâc mi manaeŋgopieŋ.

⁷Mose e jara dameŋ‐ticne 120 bazurâ hâmowec; e ʒâŋe‐ticne mi mâteŋkewec â sahac‐ticne wâc mi bâmuzuckewec.

⁸Ehame Israe ŋic jaŋe Moabi wâneŋko Mosere busâqoc ehuc juhapie ʒoaŋ gie bapa 30 tarawec. Tarame Mosere ki busâqoc ee i tarawec.

⁹Eme Mose e Nuŋte ŋokâ Josua ere faio meticne râehuc jambuŋkewecte Josuazi maŋɋârâŋhec ewec. Irec Israe ŋic jaŋe dâŋticne mana rereŋ ehuc, Wofuŋzi Mose dâŋ mutâcnecnewec irec sâcko wiac efârembiŋ.

¹⁰Eme dameŋ irecnec fuŋkerâ juwefuhapie Israe ŋic jaŋere ŋondeŋko porofete moc Mose iŋucne moc mi fuarâ juwec. Wofuŋ â Mose jahe hohone mamanac epic.

¹¹Wofuŋzi Mose hâcne soreme Aigita mâreŋko rarâ Farao â kiŋaŋ qaqafâc‐ticne erâ hae mâreŋ‐ticnao fuŋne qaqa mâsi â wiac ʒâŋe furu fuŋne fuŋne bawec.

¹²Erâ ekizia Israe ŋic jaŋere maio tâpiri â wiac bipic tataranehec bataniŋkeme honembiŋ.