Sâcmutâc Hâsine 15

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

¹“Ŋoŋe jara 7 tarame sâc tofa bebehec enʒepieŋ.

²Ehuc wiac kecʒiŋuc enʒepieŋ: Ŋic moc e ŋic âgo‐ticne me qomâ‐ticne wiac moc râcneme hotâ bajuocmuo tofa‐ticne bazuocte ʒoɋac mi ecnehuc mâc beheme fozejec, i Wofuŋ araŋ bacnehuc tofa bebehere dâŋ musanaŋkembiŋ irec.

³Ŋic furune jaŋerao tofa‐ŋeŋic foocmu i bazu‐ŋareniŋte muzo murâ munʒepieŋ, mâc qomâfâc‐ŋeŋic jaŋe wiac‐ŋeŋic i me i jarepie bajuniŋmuo ine mâc behepie fozejec.

⁴Erâ Wofuŋ Anutu‐ŋeŋiczi merâfâc mâreŋ ŋareme ro rauc ehuc ira juhapie jambuŋ‐ŋopame ŋondeŋ‐ŋeŋicko ŋic hapetac moc mi juniŋmu.

⁵Ŋoŋe Wofuŋ Anutu‐ŋeŋicte dâŋ mana rereŋ ehuc, sâcmutâc dâŋ miŋecgac ŋaza mutâc ekopac i aijakic jaha bajuniŋmuo ine iŋuc hâcne fuaocmu.

⁶Wofuŋ Anutu‐ŋeŋic e mupaŋke‐ŋarewec irec sâc jambuŋ‐ŋopaocmu, irec ŋoŋe ŋic gurune gurune wiac hotâ jarenʒepieŋ, mâc ŋoŋe ŋaŋac ine jaŋeraonec wiac tofamâc mi ronʒepieŋ. Ŋoŋe ŋic gurune gurune rauc‐joparâ kiŋaŋ qaqafâc‐ŋeŋic bacjopanʒepieŋ, ehame jaŋe ine rauc‐ŋoparâ kiŋaŋ qaqa mi bacŋopanʒepieŋ.

⁷“Wofuŋ Anutu‐ŋeŋiczi mâreŋ ŋare tahac eocmu ira juhuc hae‐ŋeŋicko qomâfâc‐ŋeŋic jaŋeraonec moczi hapetac jume honehuc maŋsanaŋ erâ mi hone takirenʒepieŋ.

⁸Aricne, ŋoŋe qomâ‐ŋeŋic afeckerâ bafickehuc, wiac i me i basaocmu sâc râcnepie hotâ baŋare juzejec.

⁹Maŋŋeŋiczi dâŋ sâqocne manasuhuc ʒiŋuc munʒipiŋte rucŋeŋic banʒepieŋ: ‘Jara 7, tofa bebehe jara hâcne maickekac.’ Ŋoŋe iŋuc murâ qomâfâc‐ŋeŋic ʒâŋe ʒârâ honec‐jopahuc wiac moc mi jareniŋmuo ine jaŋe Wofuŋ kio wâwâsic ecnepie ŋoŋerao kiŋnehec eocmu.

¹⁰Ŋoŋe buafec jaha wiac aameo jarenʒepieŋ; iŋuc epie Wofuŋ Anutu‐ŋeŋiczi gie baniŋmu me wiac ebac eniŋmu sâc i jambuŋke‐ŋareocmu.

¹¹Ŋic hapetac dameŋ sâc ŋondeŋ‐ŋeŋicko juniŋmu, irec ʒiŋuc mutâcne‐ŋarekopac: Ŋoŋe qomâfâc‐ŋeŋic me ŋic hapetac me qarâ suriŋne mâreŋ‐ŋeŋicko juniŋmu jaŋe afeckerâ bafic‐jopahuc junʒepieŋ.

¹²“Qomâge, Hebiraio ŋic me ŋokac moczi moneŋte erâ kiŋaŋ qaqage juocte muocmuo ine kiŋaŋ qagarehuc juhame jara 6 tarazejec. Jara 7 ira ine mocwâc rambaŋ juocte râetec razejec.

¹³Erâ ine rambaŋ juocte râetec metariŋ mi razejec.

¹⁴Go lama bulimakao me padi jacgoŋ me waiŋ wiacge irecnec ŋeŋemâcne râcnezemec; Wofuŋ Anutugezi jambuŋguwec irec sâc manahuc râcnezemec.

¹⁵Go Aigita mâreŋko kiŋaŋ qaqa jaha juwefukuhaŋte Wofuŋ Anutugezi irecnec bataracguwec irec manasuzemec. No irec hâcne miŋecgac dâŋ ʒi mutâcne‐garekopac.

¹⁶Me ŋic e gore maname sâckeha ʒiŋuc mecne muocmu: ‘No maŋnane go â wiacfâcge ŋoŋerao fokacte mi behec‐ŋopapemu.’

¹⁷Iŋuc gazarâ motâc wâtuŋko roweckeha hazec‐ticne âke mârâŋketecne kiŋaŋ qaqage juraʒihuc juzejec. Kiŋaŋ ŋokacge e sâc ijaha ecnezemec.

¹⁸Ŋic e rambaŋ juocte râecmurâ manatec boc mi ŋemâckezejec. Wemocte? E kiŋaŋ qaqa giere furi nâfocne sawa rohuc jara 6 kiŋaŋ qagarewec irec. Go iŋuc ehaŋ Wofuŋ Anutugezi wiac ebac ecmu sâc jambuŋke‐gareocmu.

¹⁹“Lama bulimakaofac‐ŋeŋic mârâc fufua i Wofuŋ Anutu‐ŋeŋicte biŋe qanʒepieŋ; ehame bulimakaofâc‐ŋeŋic mârâc fufua jaŋe gie mi baŋarenʒepieŋ â lamafâc‐ŋeŋic mârâc fufua jaŋere kanʒaŋ wâc mi bâtâcnenʒepieŋ.

²⁰Go â wiacfâcge ŋoŋe Wofuŋzi hae mâreŋ bâwosâe‐ŋareocmu ira jarane jarane Wofuŋ Anutu‐ŋeŋicte maio nâcjopahuc junʒepieŋ.

²¹Mâc, sahac fâsâc mi juju, kike demba â ʒâŋe tiŋtuŋ, me wiac izi me izi bâpuriŋ‐jopakicne jaŋe Wofuŋ Anutu‐ŋeŋicte biŋe taha bâzi mi rikec‐jopanʒepieŋ.

²²Ŋoŋe qowi iŋucne i hae‐ŋeŋicko juhuc qa nâc enʒepieŋ; ehame kâte noniŋ â kâte bulimakao nâcjopaeŋgopieŋ iŋuc jaha qowi i ŋic wâwânâŋ tâmiric â wâwânâŋ heczi kosa nânʒepieŋ.

²³Mocjaha, socjeŋic ine mi nânâ mâc opâ omane iŋucne mâreŋko hoŋkepie razejec.