1“Is menge memumuhat he kevuwazan ni Levi wey is duma pa he sakup te tribu ni Levi, iyan sikandan tribu te Israel he wazà tanà he egkepengevilin dan. Iyan dà egkekaan dan is puun duen te menge pemuhat pinaaǥi te hapuy he ibpemuhat diyà te Nengazen, su iyan heini kandan he egkepengevilin.
2Kenè dan iring te menge zuma zan he menge Israilihanen su wazà mulà tanà he egkepengevilin dan; Nengazen is kandan he egkepengevilin sumalà te insaad din kandan.
3“Iyan heini vahin te menge memumuhat he ebpuun te menge vaka etawa menge kerehidu he ibpemuhat te menge etew: is pemenayen, is bakà, wey is getek.
4Iveǥey niw zaan diyà te menge memumuhat is egkehuna he vahin te trigu, binu, lana, wey vulvul te kerehidu niw.
5Su ziyà te langun he tribu te Israel iyan sikandan wey is menge kevuwazan dan mibpilì te Nengazen he Megbevayè niw he ebpenilbi kandin taman te taman.
6“Is minsan hentei he Levihanen he meǥinged diyà te minsan hendei he inged he sakup te Israel egkehimu ke edhendiyà te lugar he ebpilien te Nengazen,
7ne ebpekepenilbi sikandin dutun te Nengazen he Megbevayè din iring te zuma zin he menge Levihanen he ebaal te vuluhaten diyà te etuvangan te Nengazen.
8Ebpekezawat daan sikandin te kandin he vahin duen te menge ibpemuhat minsan duen selakew en he egkekuwa zin puun te pemilya zin.
9“Emun ebpekeseled kew en duen te tanà he ibeǥey keniyu te Nengazen he Megbevayè niw, ne kenè niw iringi is utew mezaat he menge ulaula te menge meǥinged dutun.
10Kinahanglan he wazà minsan sevaha keniyu he ibpemuhat din is anak din pinaaǥi te hapuy. Etawa ebpenagnà, etawa ebpeveveyilan, etawa ebpeǥingkuris, etawa teǥelemayan,
11etawa mememarang, etawa ebaal te ebeelan te menge etew he edsarig te menge mulin-ulin, etawa ebpekidlalag te ǥimukud te nemematey en.
12Is minsan hentei he ebaal kayi he menge vaal, ne mezaat is ked-isipa kandin te Nengazen. Iyan heeyan hinungdan ke maan is ibpesegseg keniyu te Nengazen he Megbevayè niw is menge etew keniyan he menge nasyun.
13Kinahanglan he wazà igkesawey keniyu ziyà te etuvangan te Nengazen he Megbevayè niw.
14“Heini he menge nasyun, is menge etew zuen he edsegseǥen niw, ne ebpemendangep diyà te ebpemenagnà etawa menge veyilan. Iyan, sikiyu mulà imbandu keniyu te Nengazen he Megbevayè niw is kebaal kayi.
15Kekenà, duen ebpeneuven te Nengazen he Megbevayè niw he iring kedì su zuma niw he Israilihanen. Kinahanglan he ebpemineǥen niw sikandin.
16Su iyan heini mibuyù niw ziyà te Nengazen he Megbevayè niw hein midtiǥum kew ziyà te Horeb. Migkaǥi kew te, ‘Kenè key en ipezineg te laǥeng te Nengazen he Megbevayè tew, wey kenè key ipaahà te edriyubriyub he hapuy su kela ke mebpemematey key.’
17“Umbe migkaǥi is Nengazen kayi te kedì te, ‘Meupiya is hangyù dan.
18Edsuǥù a ziyà te kandan te ebpeneuven ku he iring kenikew, su zuma zan he Israilihanen. Ne ibpekaǥi ku kandin is langun he egkesuatan ku te egkaǥi ziyà te kandan.
19Edsilutan ku is minsan hentei he kenà ebpemineg te menge lalag ku he ibpekaǥi ku te ebpeneuven ku.
20Kinahanglan he edhimetayan is ebpeneuven he wazè ku suǥua te kedlalag he egkaǥi he midsuǥù ku etawa egkaǥi te midsuǥù sikandin te selakew en he menge ed-ezapen.’
21“Kela ke ed-insè kew te, ‘Hengkey is igketueni zey he is menge lalag te sevaha he ebpeneuven ne kenà diyà ebpuun te Nengazen?’
22Emun kenà egkeulaula etawa kenà egketuman is egkeǥiyen te ebpeneuven he ibpekaǥi kun kandin te Nengazen, ne heeyan he lalag ne kenà lalag te Nengazen. Kekenà, keugelingen dà he lalag dutun te ebpeneuven, umbe kenè niw sikandin ikahandek.
