Sâcmutâc Hâsine 14

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

¹“Ŋoŋe Wofuŋ Anutu‐ŋeŋicte naru motecfâc, irec hâmoc fuame busâqoc manahuc sahac‐ŋeŋic he qânʒiŋ mi enʒepieŋ, erâ mai‐ŋeŋicko qizec susuc‐ŋeŋic mi bâtâcnenʒepieŋ.

²Ŋoŋe Wofuŋ Anutu‐ŋeŋicte maio ŋic tirine juŋgopieŋ, Wofuŋ eki hâcne e jahacnere biŋe erâ juniŋte ŋic gurune gurune mâreŋko juraŋgopieŋ jaŋeraonec rowosâec‐ŋopawec.

³“Ŋoŋe wiac mamakâcne moc mi nânʒepieŋ.

⁴Qowi kecʒiŋuc jaŋe ine sâcne nâcjopaniŋmu: Bulimakao ŋicne, lama, noniŋ,

⁵kâte bulimakao, kâte noniŋ fuŋne fuŋne erâ tiki lama.

⁶Qowi kike‐jeŋic sosohoc â nânâ ŋâc hepie wefume nâeŋgopieŋ i jaŋe sasawa sâcne nâcjopaniŋmu.

⁷Mâc nânâ ŋâc hepie wefume nâeŋgopieŋ â kike‐jeŋic sosohoc jaŋeraonec qowi kecʒiŋuc jaŋe ine mi nâcjopanʒepieŋ: Kamele â qowi moc ʒâŋene hea â moc ʒâŋene roki beʒe. Jaŋe nânâ ŋâc hepie wefume nâeŋgopieŋ, mâc kike‐jeŋic sosohoc mi efârekicnere mana‐jarepie qowi wâwânâŋhec enʒepieŋ.

⁸Ehuc bec jaŋe kike‐jeŋic sosohoc, erâ ine nânâ nâhuc ŋâc mi heeŋgopieŋte mana‐jarepie wâwânâŋhec jaha enʒepieŋ. Ŋoŋe biuc‐jeŋic mi nânʒepieŋ â qâŋɋâŋ‐jeŋic ba bâuac wâc mi enʒepieŋ.

⁹“Opâo qowi juŋgopieŋ jaŋeraonec gâcne kecʒiŋuc nâcjopazo murâ nâcjopanʒepieŋ: Dipa â garac‐jeŋichec sasawa sâcne nâcjopaniŋmu.

¹⁰Ehuc opâ qowi dipa â garac tâmiric juŋgopieŋ jaŋe ine mi nâcjopanʒepieŋ, jaŋe wâwânâŋhec hâcne.

¹¹“Ŋoŋe wipe wiac wâwânâŋ tâmiric jaŋe nâcjopazo murâ nâcjopa‐fârenʒepieŋ.

¹²Mâc wiac kecʒiŋuc jaŋe ine mi nâcjopanʒepieŋ: Tucwipe, qeri, keŋ,

¹³mebâroŋ â bicqâreŋ,

¹⁴kâec kâec,

¹⁵qera, wioc, kâte kaiŋɋaŋ, piʒu piʒu,

¹⁶bioc bioc, qâoŋ, opâ baro,

¹⁷baro gâgâpâc, gafu hâro, gara raweŋ,

¹⁸qeʒo, baro qaŋqaŋ, bikuaŋ â mindi mindi.

¹⁹Erâ gisic wiac fakec‐jeŋichec jaŋere manapie wâwânâŋhec eme mi nâcjopanʒepieŋ.

²⁰Wiac fakec‐jeŋichec gâcne biaŋne ine nâcjopanʒepieŋ.

²¹“Qowi wiac i me i e jahac hâmo sipiric eocmu i mi nânʒepieŋ. Hae‐ŋeŋicko ŋic jaba juŋgopieŋ jaŋe ine jarezo murâ jarepie nânʒepieŋ, me ŋic furune jaŋe jarezo murâ jarepie furine ŋarenʒepieŋ. “Ŋoŋe lama motecne neŋgocnere susuhec mi rikenʒepieŋ.

²²“Ŋoŋe jarane jarane gie wiac he sarac epie fârine fuame irecnec teŋkonec wâŋ bârârienʒepieŋ.

²³Eme Wofuŋ Anutu‐ŋeŋic e ʒâŋe‐ticnere ŋeŋe hae moc bâfuaocte hae mâreŋ bâwosâeocmu ira ere maio padi jacgoŋ me waiŋ me oliwa wokemaŋ me lama bulimakaofâc‐ŋeŋic mârâc fufua irec teŋkonec wâŋ nânʒepieŋ; ehuc dameŋ sâc Wofuŋ Anutu‐ŋeŋic araŋ babacne irec fuŋne mana taranʒepieŋ.

²⁴Me Wofuŋ Anutu‐ŋeŋiczi giegaŋ‐ŋeŋic jambuŋkeme nânâ wiac‐ŋeŋic teŋkonec wâŋ i hata ʒoricnere Wofuŋ Anutu‐ŋeŋic ʒâŋe‐ticnere ŋeŋe hae bâfuaocte mâreŋ bâwosâeocmu ira baraniŋte eipieniŋmuo

²⁵ine moneŋte erâ qikiŋnehuc moneŋ rorâ Wofuŋ Anutu‐ŋeŋiczi hae mâreŋ bâwosâeocmu ira ranʒepieŋ.

²⁶Ra fisirâ aŋac‐ŋeŋiczi muocmu irec sâc moneŋ izi wiac kecʒiŋuc furine banʒepieŋ: Lama bulimakao, me waiŋ me opâ sanaŋ me wiac gâcne gâcne. Ehuc ŋaŋacne â wiacfâc‐ŋeŋic ŋoŋe ira hâcne wiac i Wofuŋ Anutu‐ŋeŋicte maio nâ bac ehuc ʒeri enʒepieŋ.

²⁷Ehuc Lewiŋic jaŋe merâfâc hae mâreŋ tâmiric ŋoŋehec jueŋgopieŋ jaŋere mi nikec‐ŋopazejec.

²⁸“Ŋoŋe jara jahec â moc tarame sâc wiac fua‐ŋareocmu irecnec teŋkonec wâŋ hae‐ŋeŋicko bâtumaŋnenʒepieŋ.

²⁹Ehame Lewiŋic jaŋe ŋoŋehec merâfâc mâreŋ mi rauckeniŋmu jaŋe mecne erâ ŋic jabane me hozec bekâ hae‐ŋeŋicko mâmâc juraniŋmu jaŋe fisirâ nâ gapec enʒepieŋ. Iŋuc epie Wofuŋ Anutu‐ŋeŋiczi gie baniŋmu sâc i jambuŋke‐ŋareocmu.