9Bada, Mousis i giuwena gado, “Laḡannemo Bada emi Maimaituwa dobu i viteviteminemo ko tavana ba dobuna lavedi edi vaivai gebogebodi komai titiponaḡedi.
10Bi temi bai laḡannemo mote niga kauwidi koma voiyedi: Natunatumi kaimo koma lausewasewayedi. Mote koitilimo eta koma tavuḡe. Emi ḡowana bai sibena ba alulaluwa lisidimo koma lausewasewa. Mote koma pasila.
11Bi mote taumiyabilibili koma giu waimatayanedi. Mote koma logau.
12“Maimaituwa niga kauwidi lava sa voivoiyedina i dabokedi. Lava Keinanmo sa miyamiyana tedi niga kauwidi sa voivoiyedi. Taunana aubaina Bada kaka ya sagumi te ko kwavi vaidi bi dobuna temi ko vai.
13Bi temi laḡan matabuna yawasana didimanidimo ko miya Bada emi Maimaituwa matanemo.
14Bi laḡannemo Keinanmo ko saḡana ba taupasila bi taulogau lavedi lisidimo doḡa ko kulavai. Bi Bada emi Maimaituwa i waiḡakemi te mba lavedi edi yawasana koma kaiwatedi.”
15“Bi Bada emi Maimaituwa kaka nopomimo taugiuwatana ḡemota ya vinena maibena tagu bi ya giukamaḡe lisimimo bi tana ko vivile kauwe.
16Mai dolinemo oya Oleb pakanemo konai ḡemotimi bi kona giuna gado, ‘Bada ema Maimaituwa kalinana vaiyena bi kai vavanina kitana ke daboka bamoda mainana kwa voiyena ba ka peki.’
17“Bi Bada i giuweguna gado, ‘Bai ai baḡaena ba i visu.
18Taunana aubaina tagu kaka taugiuwatana ḡemota nopodimo, yà vinena mai tam bi yà ka maḡati. Bi bai giuna e ḡoena ba tana yà giuvite kaka tana bai e giugiuwena lava ya giuwedi.
19Tana aubaigu yai taugiu bi aiyai kalinana i vaiye kamaḡena kaka mayagu ya vai.
20Bi taugiuwatana mote giu yà vite bi nuwanemo i waitubudi bi ya giugiu ba koi peki.’
21“Bi temi male koi talana gado, ‘Bi tama bainewa ka sibe te niga talawainuwatauna ba Bada lisinaḡa ee nuwanemo i waitubu?’
22Niga mainana kaka ko sibe: Bamoda taugiuwatana Bada isanemo bai i giugiuwena banina mote ima tubuḡa ba giuna mote Bada i vite. Mba tana nuwanemo giu i waitubudi mote koma naile.”
