1“Wofuŋ Anutu‐ŋeŋiczi mâreŋ ŋare tahac eme ro rauc eniŋmu irec mâreŋ sawane ira me ira ŋic qâhâmokicne moc bâfuarâ, mozi qâhâmojec, iŋuc muhuc kâuc baniŋmuo
2ine soŋaŋ â mumutara ŋicfâc‐ŋeŋic jaŋe warerâ ŋic qâhâmokicne râreckehuc hae ŋerakac irec sawane forakac ira muc fârehuc ma banʒepieŋ.
3Eme hae bembeŋko ŋekac irec soŋaŋ micne jaŋe bulimakao ŋokacne gie biac mi bakicne â fainao kioŋ mi râekicne iŋucne moc ronʒepieŋ.
4Ehuc bulimakao i wâneŋ mocko opâ rahuc fokac â gie he sarac mi ekicne ira jowa hurâ upe siecne qazunʒepieŋ.
5Eme taha bapa, Lewire ɋâricfâc jaŋe hâcne mai fuanʒepieŋ. Jaŋe Wofuŋ kiŋaŋ qacneniŋte â ere ʒâŋeo ŋic jambuŋ‐jopaniŋte erâ wâc dâŋ me ʒika wiac fuame irec dâŋ mutaraniŋte Wofuŋ Anutu‐ŋeŋiczi rowosâec‐jopawec hâcne.
6Ehame hae bembeŋko ŋekac irec soŋaŋ micne jaŋe bulimakao upe siecne qazukicne ere faio mejeŋic ʒurenʒepieŋ.
7Ehuc dâŋ kecʒiŋuc musokanʒepieŋ: ‘Nâŋe soc ʒi mi hoŋkembeneŋ, erâ mo ŋiczi soc hoŋkejec i wâc mi honembeneŋ.
8Irec Wofuŋ, go Israe ŋicfâcge nâŋere kiwiric romeŋte sâqocne‐nâŋec behec, ehuc ŋic bahacmâc ere socte kiŋ i Israe ŋicfâcge nâŋere faio mi râehuc soc irec kiŋ behe‐nârezemec.’
9Ŋoŋe Wofuŋte maio wiac ebac epene sâckeekac i ehuc soc kosa hoŋkekicne irec kiŋ i ŋondeŋ‐ŋeŋickonec bâsuepie razejec.
10“Ŋoŋe râsifâc‐ŋeŋic jopaniŋte ʒikao rahuc Wofuŋ Anutu‐ŋeŋiczi meŋeŋicko râec‐jopame kâpâcwâru bacjopaniŋmu.
11Ehame ŋoŋeraonec moczi kâpâcwâru ŋic jaŋere ŋondeŋko ŋokac hawari biaŋ moc honerâ ere aŋackeme ŋonâŋ‐ticne eocte rohuc
12ficticnao jowa rame qizec susuc â mesârâ‐ticne bâtâcne‐fârezejec.
13Erâ ŋaqi‐ticne raŋɋane hetararâ ŋic ere ficko juhuc neŋgoc mamac jahec‐ticne jahere ki busâqoc ehuc juhame mosa moc hâmozejec. Eme irec faicnao ŋiczi ehec juhame ŋonâŋ‐ticne ezejec.
14Eme juku ʒâhec ine ere aŋac mocwâc mi manahuc soreme ira me ira razo murâ razejec, mâc ehec juju fofo ewecte furinere erâ mi sorezejec â kiŋaŋ qaqa wâc mi bazejec.
15“Ŋic moc ŋokac jajahec rocjofarâ maŋticnezi moc âgo ecnehuc moc hone takireocmu. Eme jahe juku motec kiweckerâ rocjofanicmu. Ehame ŋokac hone takic ecnekicne ere moteczi bâbâni fuaocmuo
16ine mamaczi merâfâc bâtâc bapa dameŋko ira ŋokac âgo ecneekac ere motecte maname feha mafa bocjaha râcnehuc ŋokac hone takic ecneekac ere motec ine afecne sawa mi râcnezejec.
17Aricne, hone takic ecneekopac ere motec e mârâc fufua‐nane, iŋuc mana tarahuc wiac focnekac sasawa irecnec ŋemâcne jaha râcnezejec. E mamacte mârâc motec, irec hâcne wiac iŋuc râcnezo.
18“Motec râŋgeŋne â qaqatarane moc e neŋgoc mamac jahec‐ticne jahere dâŋ mi reŋkeme mu bâtiŋ ecnehapire sifu micrereŋ mi bâfuaocmuo
19ine neŋgoc mamac jahec‐ticne jahe hae ʒoŋao soŋaŋ micne ŋeeŋgopieŋ jaŋerao barazepirec.
20Ehuc soŋaŋ micne ʒiŋuc jazazepirec: ‘Ŋokâ‐nâhec ʒi e motec râŋgeŋne â qaqatarane, e dâŋnâhec moc mi reŋkeekac; e nâ araŋ ehuc opâ sanaŋ âmbâŋ nâekac.’
21Iŋuc muhuc jazapire hae irec ŋic sasawa jaŋe qânâzi hehâmonʒepieŋ. Ŋoŋe iŋuc ehuc wiac hehesicne ŋondeŋ‐ŋeŋickonec bârârienʒepieŋ. Iŋuc epie Israe ŋic sasawa jaŋe manarâ hâwic‐jopazejec.
22“Ŋic moc sâqocne barâ hâmocte biŋe eme jâcko bituaniŋmuo
23ine behepie domahame hae mi furezejec; aricne, ŋoŋe ʒoaŋ ijaha batararâ duckenʒepieŋ. Ŋic bituakicne e Anutuzi sâweckewec hâcne. Ŋoŋe Wofuŋ Anutu‐ŋeŋiczi mâreŋ ŋare tahac eme ro rauc eniŋmu i wâwânâŋ mi ecnenʒepieŋ.
