1Mose e Jordaŋ opâ ocniŋuc mâreŋ burocnao, Araba wâneŋko hâcne, ira Israe ŋic ʒeŋgoma dâŋ jazawec ʒine hâcne. Araba wâneŋ i Sufu mâreŋ ŋifecnao erâ Paraŋ, Tofele, Labaŋ, Hazeroti â Diʒahaba ŋondeŋ‐jeŋicko fowec.
2Horebe tikionec rahuc juku Seiri tiki mâreŋ fotâcnerâ Kadesi‐Baranea haeo fisihapie ʒoaŋ gie bapa 11 tarawec.
3Eme jara namba 40 irec mosa 11 ʒoaŋ gie bapa wâŋ ira, Wofuŋzi Israe ŋic jaŋere sâcmutâc dâŋ Mose âzâcnewec i heɋâre‐jarehuc jaza mutâc ewec.
4Ine Amori ŋicwofuŋ Sihoŋ Hesiboŋ haeo juwec â Basaŋ ŋicwofuŋ Ogo Asitaroto â Ederei haeo juwec jahe jofa jâpec ejactewec irec faicnao iŋuc ewec.
5Mose e Jordaŋ ocniŋucnao Moabi mâreŋko hâcne sâcmutâc dâŋ i mutâcne‐jarehuc ʒiŋuc jazawec:
6“Wofuŋ Anutu‐nâŋec e Horebe tikio kecʒiŋuc nâzâwec: ‘Ŋoŋe tiki ʒira boc jupie dameŋ ʒorakac.
7Irec fahare risie raniŋ, rahuc Amori ŋic jaŋere tiki mâreŋko erâ wâc âgo diguracfâc‐jeŋic Araba wâneŋko me tiki mâreŋko me Negebe wâneŋko me hâwec heririŋko juraŋgopieŋ ira fisinʒepieŋ. Ine hâcne, Kanaaŋ â Lebanoŋ mâreŋ foraku Eufrata opâ sâkoo tarakac ira fisi‐fârenʒepieŋ.
8Manaŋgopieŋ, no mâreŋ i hâcne ŋarezo ekopac, irec ŋoŋe raʒirâ, mamac ŋosafâc‐ŋeŋic Abraham, Isaka â Jakobo erâ ɋâricfâc‐jeŋic mâreŋ jarepemurâ mupaŋke‐jarepo i ro rauc enʒepieŋ.’
9“No dameŋ ira dâŋ kecʒiŋuc ŋazapo: ‘No bucnane jowa qataŋ sâcne mi eŋarepemu.
10Manaŋgopieŋ, Wofuŋ Anutu‐ŋeŋiczi manaha sawe mâririackerâ juwefukupie ʒare‐ŋeŋic sambâŋko bâpiŋ ŋeraŋgopieŋ jaŋere sâc ekac.
11Wofuŋ, mamacfâc‐ŋeŋic jaŋere Anutu hâcne, eki basawec‐ŋopame dameŋ ʒiŋuczia juŋgopieŋ irec sâc fejâmbâŋkehuc sirickenʒepieŋ, erâ dâŋ mupaŋke‐ŋarewec irec sâc jambuŋ‐ŋopazejec.
12No ŋemâc‐ŋeŋic â tagi‐ŋeŋic erâ fâfâuc‐ŋeŋic i wemocko bucnane sâcne de âsic epemu?
13Irec ŋoŋe ŋic maŋɋârâŋ â mamanahec erâ fuŋne mamana saric bâwosâec‐jopapie noni micnefâc‐ŋeŋic âkendâŋ‐jopapemu.’
14Iŋuc ŋazape dâŋ ʒiŋuc bâtikie‐narembiŋ: ‘Wiac ebac enaŋte nâzâkomec i manapene biaŋkekac.’
15Iŋuc mupie guru‐ŋeŋic sâc irec micne maŋɋârâŋhec â fuŋne mamana saric rocjoparâ guru‐ŋeŋic sâc hone soŋaŋ eŋareniŋte râec‐jopapo. Gâcne jaŋe tauseŋ gurune gurune, gâcne jaŋe 100 gurune gurune, gâcne jaŋe 50 gurune gurune â gâcne jaŋe 10 gurune gurune ŋoŋere micnefâc erâ juniŋte râec‐jopapo hâcne.
16Ehuc dameŋ ijaha mumutara ŋicfâc‐ŋeŋic ʒiŋuc jaza mutâc epo: ‘Ŋoŋe qomâfâc‐ŋeŋic jaŋere dâŋ manahuc, ŋic moc qomâ‐ticnehec me ŋic jabanehec dâŋjekic foocmu i sifu fâretiŋ jaha mutaranʒepieŋ.
17Ŋoŋe dâŋ ŋifecpeaŋ sawa mi mutaranʒepieŋ; ŋoŋe ŋic fekicne me waha qaqane jaŋere dâŋ sâkoa mananʒepieŋ, ehuc ŋic jaŋere mi hâwic‐ŋopazejec, dâŋ mutaraniŋmu i Anuture manasuhuc mutaranʒepieŋ. Me dâŋ moc manapie ŋemâckeme norao bawarepie manazepac.’
18No dameŋ ira hâcne wiac sasawa ebac eniŋte mutâcne‐ŋarepo.
19“Eme nâŋâc Wofuŋzi mutâcne‐nârewec irec sâc ehuc Horebe tiki beherâ mâreŋ burocne kâcɋene â hâhâwicne sâko i honehuc fotâcnerâ Amori ŋic jaŋere tiki mâreŋkopec wareku Kadesi‐Baranea hae mâreŋko fisimbeŋ.
20Fisirâ kecʒiŋuc ŋazapo: ‘Nâŋâc Amori ŋic jaŋere mâreŋko fisiŋgopeneŋ; Wofuŋ Anutu‐nâŋeczi mâreŋ i hâcne nâre tahac ezo mukac.
21Manaŋgopieŋ, Wofuŋ Anutu‐ŋeŋic e mâreŋ i ŋarezo ekac, irec ŋoŋe Wofuŋ, mamacfâc‐ŋeŋic jaŋere Anutuzi dâŋ ŋazawec irec sâc ehuc ro rauc enʒepieŋ; ehuc mi hâwic‐ŋopaha hâbi gogoroŋ wâc mi enʒepieŋ.’
22Iŋuc ŋazape ŋoŋe ʒeŋgoma fua‐narehuc ʒiŋuc nazambiŋ: ‘Nâŋâc ŋic sorec‐jopapene bânie rarâ mâreŋ hone tâcnenʒepieŋ, ehuc hata wena raku hae wenimoira fisinaŋmu i hone manac erâ binaŋ banârenʒepieŋ.’
23Iŋuc mupie manape sâckeha guru‐ŋeŋic sâc irecnec ŋic 12 rowosâec‐jopapo.
24Eme jaŋe faharerâ raku tiki mâreŋko Esikola wâneŋko fisirâ mâreŋ hone tâcnembiŋ.
25Erâ mâreŋ irec jâcfâri wiac gâcne rorâ bafisi‐nârembiŋ, ehuc dâŋ binaŋ ʒiŋuc enârembiŋ: ‘Wofuŋ Anutu‐nâŋeczi mâreŋ nâre tahac ekac i mâreŋ biaŋne jâmbâŋ.’
26“Ŋoŋe ine Wofuŋ Anutu‐ŋeŋicte mumutâc dâŋ qatarahuc feniŋte mi afeckembiŋ.
27Ehuc qoruc boze‐ŋeŋicko ŋehuc mu kâroŋ erâ ʒiŋuc mumbiŋ: ‘Wofuŋ e qaisoc‐nâpohuc Amori ŋic jaŋere meo râec‐nâpome nâpo sipiric eniŋte Aigita mâreŋkonec jowac‐nâpo wefuwec.
28Ʒi ine ira ferâ wemo wiac moc bâfuanaŋmu? Qomâfâc‐nâŋec jaŋe dâŋ ʒiŋuc mupie maŋnâŋec gâckewec: “Ŋic faic juŋgopieŋ jaŋe nâŋâcne sâc sirickehuc ŋic kâcɋene â ʒoricne juŋgopieŋ, â fic hae‐jeŋic i basanaŋkehuc bafekupie sambâŋ heuazo ekac. Erâ ŋic soka makakicne, Anakare ɋâricfâc hâcne jaŋe wâc honec‐jopambeŋ.” ’
29Iŋuc mupie kecʒiŋuc ŋazapo: ‘Ŋoŋe bipic tatara eŋareha mi hâwic‐ŋopazejec.
30Wofuŋ Anutu‐ŋeŋiczi Aigita mâreŋko ʒâŋe fai‐ŋeŋicko râsifâc‐ŋeŋic jopawec irec sâc jaha ehuc bafic‐ŋopaocmu.
31Erâ mâreŋ burocnao ʒiŋuc honembiŋ wâc: Ŋic moczi ŋokâ‐ticne âsi qataŋ ecneekac irec sâc jaha Wofuŋ Anutu‐ŋeŋiczi âsi qataŋ eŋare warehuc juha hae mâreŋ ʒira fisimbiŋ.’
32Ŋoŋe ine sifu Wofuŋ Anutu‐ŋeŋic mi manasiŋkembiŋ.
33Eki hâcne teuŋ âterâ ŋec foc eniŋte bânie‐ŋarehuc hae mâreŋ bâfua‐ŋare jujec. Hata ŋaza ŋowatuc eocte ŋafeo ʒocbâruŋ maŋko â ʒoaŋko karorac maŋko bânie‐ŋare jujec hâcne.
34“Ehame Wofuŋ e dâŋŋeŋic manarâ aarickeme ʒiŋuc mupaŋke‐ŋarewec:
35‘Ŋicguru repicne ʒi domaŋgopieŋ ŋoŋe mamacfâc‐ŋeŋic mâreŋ jarepemurâ mupaŋke‐jarepo i moc mi hone‐jâmbâŋkeniŋmu.
36Jefunere ŋokâ Kalebe eki ine maŋticne hâcbuc jaha Wofuŋ norao râeme foekac, erâ mâreŋ i wâc âtewec; irec e jahacne â ɋâricfâcne jaŋe sawa mana‐jarepe mâreŋ i honenʒoŋgopieŋ.’
37Wofuŋ e ŋoŋere eebapa sâqocnere erâ no wâc aaric mana‐narekac, ehuc ʒiŋuc mukac: ‘Go wâc iŋuc jaha mâreŋ ira mi raʒicmu.
38Erâ wâc Josua, Nuŋte ŋokâ mefâroge juekac e hâcne mu âkeriŋ ecnetec bânie‐jarehuc mâreŋ ira raʒirâ Israe ŋic ejareme mâreŋ i ro rauc enʒepieŋ.
39Erâ ɋâricfâc‐ŋeŋic ʒikare nânâ eniŋte mumbiŋ, â naru motecfâc‐ŋeŋic dameŋ ʒiŋuczia biaŋne â sâqocne irec fuŋne moc mi mana taraŋgopieŋ jaŋe ira raʒiniŋmu, jaŋe hâcne mâreŋ i jarepe ro rauc eniŋmu.
40Ŋoŋe ine mâreŋ burocnao risierâ raniŋte Hâwec Bâbâroŋkopec ranʒepieŋ.’
41“Iŋuc ŋazape dâŋ kecʒiŋuc bâtikie‐narembiŋ: ‘Nâŋe sâqocne bahuc Wofuŋ bunao bambeŋ, irec Wofuŋ Anutu‐nâŋeczi dâŋ nâzâ mutâc ewec irec sâc jaha ehuc ferâ ʒika qanʒepeneŋ.’ Ŋoŋe sasawa iŋuc muhuc ʒikare wiac rofârerâ tiki mâreŋko feraniŋte manapie afeckewec.
42Iŋuc epie Wofuŋzi ʒiŋuc nazawec: ‘Go ʒiŋuc jazac: No ŋondeŋ‐ŋeŋicko mi juhape râsifâc‐ŋeŋic jaŋe ŋopanʒipiŋte ʒika qazo mi fenʒepieŋ.’
43No dâŋ iŋuc ŋazape ŋoŋe mi manambiŋ, ehuc Wofuŋte mumutâc dâŋ qatararâ sahac fefe ehuc sifu tiki mâreŋko fembiŋ.
44Iŋuc epie Amori ŋic tiki mâreŋ ira jumbiŋ jaŋe waharâ, bituc bâiŋnepene jâpec‐nâpoekac irec sâc Seiri tiki mâreŋkonec fuŋkerâ jâpec‐ŋopa raku Horima haeo ŋopambiŋ.
45Iŋuc eŋarepie ŋoŋe risierâ Wofuŋ kio wâwâsic ecnepie mi mana‐ŋarewec.
46Wiac iŋuc fua‐ŋareme Kadesi haeo dameŋ ʒora jumbiŋ hâcne.
