1“Ŋoŋe râsifâc‐ŋeŋic jopaniŋte ʒikao rahuc becâsic keretac wiac‐jeŋic â momorifâc‐jeŋic ŋoŋere sâc sirickepie honec‐joparâ jaŋere mi hâwic‐gopazejec. Wofuŋ Anutu‐ŋeŋiczi Aigita mâreŋkonec batarac‐ŋoparâ jowec‐ŋopa wefuwec, eki hâcne ŋoŋehec juocmu.
2Eme ʒikao razo ehapie taha bapazi mai fuarâ momori ŋic mu basanaŋ ejarezejec.
3Ehuc kecʒiŋuc jazazejec: ‘O Israe ŋicbureŋ, mupe mananiŋ: Ŋoŋe miŋecgac râsifâc‐ŋeŋic jopaniŋte ʒikao raŋgopieŋ, irec maŋŋeŋic mi gâckezejec erâ jaŋere hâwic‐ŋopame ɋarac ɋarac qahuc mi fâfârenʒepieŋ.
4Wofuŋ Anutu‐ŋeŋic eki hâcne ŋoŋehec juhuc râsifâc‐ŋeŋic jopame sanaŋke‐jarenʒepieŋ.’
5Iŋuc mume tarame ŋic micne jaŋe momori guru ʒiŋuc muhuc jazanʒepieŋ: ‘Ŋic moc e ficticne ɋâricne barâ nâ ŋemac mi ewecko ʒikao hâmome ŋic moczi ficticne nâ ŋemac ezacte risiezejec.
6Me ŋic moczi waiŋ gie‐ticne sararâ fârine fuame mi nâsuwecko ʒikao hâmome ŋic moczi nâsuzacte risiezejec.
7Me ŋic moc e ŋokac biŋe‐ticne mi rowecko ʒikao hâmome ŋic moczi rozacte risiezejec.’
8Jaŋe momori ŋic iŋuc jazahuc ʒuhuckerâ ʒiŋuc jazanʒepieŋ wâc: ‘Ŋic moc e maŋticne goroŋkeme hâwickeocmu e risiezejec; e maŋ gogoroŋ ecneme âgofâcne jaŋere maŋ iŋuc jaha ezacte iŋuc ezejec.’
9Jaŋe momori guru iŋuc jazapie tarame micne bajareniŋte ŋic âkendâŋ‐jopanʒepieŋ.
10“Ŋoŋe hae mocko ʒika qaniŋte rarâ bâqiŋ‐jopahuc qanaŋ hae rune jaŋehec wama qaqac eniŋte giene banʒepieŋ.
11Eme jaŋe wamadâŋ jaha ŋazahuc hae motâc roŋarepie ferâ ŋic ŋokac bâfuac‐jopaniŋmu sâc ejarepie kiŋaŋ qaqafâc‐ŋeŋic erâ junʒepieŋ.
12Me hae irec rune jaŋe wamadâŋ mi ŋazahuc râsi eŋarepie ine hae i somâckenʒepieŋ.
13Ehame Wofuŋ Anutu‐ŋeŋiczi hae i meŋeŋicko râeme ŋic ʒeŋgoma jopa‐fârenʒepieŋ.
14Ŋokac naru motec me lama bulimakao me haemaŋko wâcwiac gâcne sasawa, mafa mateŋ wiac hâcne i ropie ŋaŋacne biŋe ezejec. Ehame Wofuŋ Anutu‐ŋeŋiczi wiac ŋare tahac eocmu i bubiaŋ faio bajunʒepieŋ.
15Mâreŋ ʒira hae ŋeraŋgopieŋ jaŋe mâcne, taicko ŋeraŋgopieŋ jaŋe hâcne iŋuc ejarenʒepieŋ.
16Wofuŋ Anutu‐ŋeŋiczi ŋic gurune gurune ʒi jaŋere hae wiac ŋare tahac eme ro rauc eniŋmu ira wiac jujune moc mi akic‐jopanʒepieŋ.
17Aricne, ŋoŋe Wofuŋ Anutu‐ŋeŋiczi ŋaza mutâc ewec irec sâc Hitiŋic, Amori ŋic, Kanaaŋ ŋic, Pereʒi ŋic, Hiwiŋic â Jebusi ŋic jaŋe jopa mizienʒepieŋ.
18Jaŋe nemufâc‐jeŋic kiŋaŋ qajarehuc wiac mamakâcne embiŋ i ŋoŋe qazu‐ŋarepie ijaha ehuc Wofuŋ Anutu‐ŋeŋic bunao banʒipiŋte bâsirowec‐jopanʒepieŋ hâcne.
19“Ŋoŋe ʒika qahuc hae moc ro rauc eniŋte dâmeŋ ʒora somâckehuc jâc wiac‐ticne râriczi mi qafaranʒepieŋ. Aricne, ŋoŋe jâc i jaŋere fârine nâhuc akic‐jopanʒepieŋ. Jâc gieo doma raŋgopieŋ jaŋe ŋic aricne, irec râsi ejarehuc mi somâc‐jopanʒepieŋ.
20Jâc wiac gâcne fâri tâmiric doma raŋgopieŋ jaŋe ine qafarac‐jopahuc somâ bapare sacwiac barâ hae râsi eŋareocmu i somâckekupie meŋeŋicko fezejec.
