1Eme Mose e ʒuhuckerâ Israe ŋic ʒeŋgoma dâŋ jazawec.
2Ehuc kecʒiŋuc muwec: “No miŋecgac jara‐nane 120 ekac. Irec no hata jujunere sâc mocwâc mi ekopac. Erâ Wofuŋzi wâc ʒiŋuc nazawec: ‘Go Jordaŋ opâ mi fotâcnezemec.’
3Wofuŋ Anutu e jahac bânie‐ŋarehuc fotâcneocmu, ehuc ʒâŋe fai‐ŋeŋicko ŋicne ŋicne keci jaŋe ima bacjopahame mâreŋ‐jeŋic jowac ronʒepieŋ. Ehame Wofuŋzi muwec irec sâcko Josuazi bânie‐ŋareha opâ fotâcnenʒepieŋ.
4Eme Wofuŋ e Amori ŋicwofuŋ Sihoŋ â Ogo erâ mâreŋ‐jeŋic mâmâc ima bacjopahuc wiac ejarewec sâc ijaha‐jaŋe ejareocmu.
5Ehuc meŋeŋicko râec‐jopame ŋoŋe sâcmutac dâŋ ŋaza mutâc efârepo irec sâcko ejarenʒepieŋ.
6Ŋoŋe hâbihec erâ sanaŋkenʒepieŋ, ehuc jaŋere hâwic‐ŋopame mi gâgâmârânʒepieŋ, Wofuŋ Anutu‐ŋeŋic e ŋoŋehec juhuc mi behec‐ŋopaocmu.”
7Mose e dâŋ iŋuc jazame tarame Josua hefârerâ Israe ŋic jaŋere ʒâŋe faio ʒiŋuc âzâcnewec: “Go hâbihec erâ sanaŋkezemec. Go ŋicguru ʒi jaŋehec Wofuŋzi mimiŋnefâc‐ŋeŋic mâreŋ jareocte mupaŋke‐jarewec ira bânie‐jaretec ranʒepieŋ, erâ mâreŋ i bâtâc bajaretec ro rauc enʒepieŋ.
8Wofuŋzi hâcne bânie‐garerâ gohec juhuc mi behecguocmu, irec hâwicgume mana mezac mi ezemec.”
9Eme Mose e sâcmutâc dâŋ ʒi qâreŋkerâ Lewiŋic taha bapa Wofuŋte ʒâʒâfic katapa reŋke jumbieŋ jaŋe â Israe soŋaŋ micne sasawa jarewec.
10Ehuc dâŋ ʒiŋuc jaza mutâc ewec: “Jara 7 tarame sâc tofa bebehere jara dameŋ bakicne i maickeme rehac boze hombaŋko
11Israe ŋic ʒeŋgoma jaŋe Wofuŋ Anutu‐ŋeŋiczi hae mâreŋ bâwosâeocmu ira ere maio fisipie ŋoŋe sâcmutâc dâŋ ʒi hâcne tutumaŋ‐jeŋicko wose‐jarenʒepieŋ.
12Ehuc ŋic ŋokac naru motec â ŋic jabane hae‐ŋeŋicko juniŋmu jaŋe hetumaŋ‐jopahuc dâŋ i jazapie Wofuŋ Anutu‐ŋeŋic araŋ bacnehuc sâcmutâc dâŋ ʒi aijakic jaha reŋkenʒepieŋ.
13Ehame naru motecfâc‐ŋeŋic sâcmutâc dâŋ kâuc baniŋmu jaŋe wâc manarâ, mâreŋ rauckeniŋte Jordaŋ opâ fotâcnezo eŋgopieŋ ira juhuc Wofuŋ Anutu‐ŋeŋic araŋ bacnehuc junʒepieŋ.”
14Eme Wofuŋzi Mose ʒiŋuc âzâcnewec: “Manakic, hâmoc dameŋge maickekac; irec go Josua wiracnetec wareme tutumaŋ qoruc bozeo fepire giedâŋ mucnezepac.” Iŋuc âzâcneme Mose â Josua jahe tutumaŋ qoruc bozeo fepic.
15Ehame Wofuŋzi karorac ɋâfoŋne irec maŋnao juhuc qoruc bozeo fua‐jactewec. Karorac ɋâfoŋne izi ine qoruc bozere motâcko sanaŋkerâ domawec.
16Eme Wofuŋzi Mose dâŋ ʒiŋuc âzâcnewec: “Manakic, go apa ŋosafâcge jaŋerao ʒuhuckerâ hâmozo ekomec. Iŋuc etec ŋicguru ʒi jaŋe mâreŋ mukicne ira raʒirâ ŋic furune jaŋere ŋondeŋko juhuc nemufâc‐jeŋic araŋ bajareniŋmu, ehuc no râpecnurâ jaŋehec ʒâʒâfic epo i hetâcneniŋmu.
17Iŋuc epie kimbeŋ‐nanezi bâruŋkeme behec‐jopahuc râpec‐jopape wiac ʒâʒâicne â sisipiricnehec fai‐jeŋicko feme omae‐fâreniŋmu. Iŋuc fua‐jareme honerâ ʒiŋuc muniŋmu: ‘Wiac ʒâʒâicne i Anutu‐nâŋeczi ŋondeŋ‐nâŋecko mi jukacte fua‐nârekac hâcne.’
18Jaŋe nemu burecne jaŋerao qohotahuc wiac hehesicne fuŋne fuŋne embiŋte no dameŋ ira râpec‐jopapemu.
19Go irec hâcne gae ʒi qâreŋkerâ Israe ŋic qazu‐jarezemec, ehuc ejaretec herâ he epie fuŋne‐nane mutaniŋke‐jarezejec.
20No kâcɋenefâc‐jeŋic mâreŋ susu â baŋac fusucmarâ qâmbâriŋkeekac i jarepemurâ mupaŋke‐jarepo ira jowac‐jopape ra fisirâ juhuc nânâ mâretec nâ gapec erâ soka puŋpuŋ ehuc nemu burecne jaŋerao qohotahuc kiŋaŋ qajareniŋmu. Ehuc no râpecnurâ ʒâʒâfic‐nane hetâcneniŋmu.
21Iŋuc epie wiac ʒâʒâicne â sisipiricneheczi fai‐jeŋicko feme gae ʒizi hâcne fuŋne‐jeŋic bataniŋkezejec. (Gae i ɋâricfâc‐jeŋic jaŋe herâ he ehuc juniŋmu sanaŋ.) Jaŋe mamanasu‐jeŋic wena râepie foocmu i mâreŋ jarezo mupaŋkepo ira mi ra fisihapie biac mana tarakopac hâcne.”
22Iŋuc âzâcneme Mosezi gae i ʒoaŋ ijaha qâreŋkerâ Israe ŋic qazu‐jarewec.
23Eme Wofuŋ e Nuŋte ŋokâ Josua giedâŋ mucnehuc ʒiŋuc âzâcnewec: “Go hâbihec erâ sanaŋkezemec. Goki hâcne Israe ŋic jowac‐jopatec mâreŋ jarezo mupaŋkepo ira ranʒepieŋ. No gohec jupemu.”
24Eme Mose e sâcmutâc kecʒirec dâŋ i papiao qâreŋke tarawec.
25Qâreŋke tararâ Lewiŋic Wofuŋte katapa reŋke jumbieŋ jaŋe dâŋ kecʒiŋuc jaza mutâc ewec:
26“Ŋoŋe sâcmutâc dâŋte papia keczi rorâ Wofuŋ Anutu‐ŋeŋicte ʒâʒâfic katapa maŋfuŋnao râepie fohuc fuŋne‐ŋeŋic bataniŋkehuc juzejec.
27No manakopac, ŋoŋe ŋic qaqatarahec â râŋgeŋ qaŋqaŋne. Manaŋgopieŋ, no miŋecgac ŋoŋehec jaha juhape Wofuŋ maŋrâŋgeŋ bâfuacneŋgopieŋzi juku hâmohape weniŋuc eniŋmu.
28Irec ŋoŋe Israe ŋic gurune gurune â momorifâc‐jeŋic jaŋere micnefâc hetumaŋ‐jopa‐fârehapie no sambâŋ â mâreŋ jahere maio dâŋ ʒi ŋazape mana‐jâmbâŋkenʒepieŋ.
29No manapaŋkekopac, no hâmohape ŋoŋe hehesic sâko bâfuarâ hata ŋaza ŋowatuc ewarehuc jupo i râpeckerâ qâsorieniŋmu. Ŋoŋe Wofuŋzi maname sâqoreekac wiac iŋucne hâcne ehuc juju bapa‐ŋeŋiczi maŋbâiŋ ecnepie juku sisipiric fua‐ŋareocmu.”
30Mose e dâŋ iŋuc jazarâ Israe ŋic sasawa tutumaŋ‐jeŋicko gaere dâŋ kecʒi hâcne jazaku jaza tarawec:
