1“O Israe kikefuŋ, ŋoŋe mananiŋ: Ŋoŋe Kanaaŋ mâreŋko raʒirâ ŋic gurune gurune ŋoŋere sâc sirickehuc kâcɋene â tâpiri sâkohec juŋgopieŋ jaŋere hae kâcɋene basanaŋkekicne erâ bafekupie sambâŋ heuazo ekac i ro rauc eniŋte miŋecgac Jordaŋ opâ fotâcneniŋmu.
2Jaŋe ŋic kâcɋene â ʒoricne, Anaka ere ɋâricfâc hâcne; ŋoŋe jaŋere dâŋ ʒiŋuc mupie manaeŋgopieŋ: ‘Mo ŋiczi Anaka ɋâricfâc‐ticne sâcne sanaŋke‐jareocmu?’
3Irec ŋoŋe miŋecgac ʒiŋuc mananʒepieŋ: Wofuŋ Anutu‐ŋeŋic e ʒocbâruŋ iŋucne bânie‐ŋarehuc ŋic keci jaŋe bawahac‐joparâ ʒâŋe fai‐ŋeŋicko sipiric‐jopaocmu; irec Wofuŋzi mupaŋke‐ŋarewec irec sâc jopa jâpec ejarehuc ɋeŋ jaha omaec‐jopanʒepieŋ.
4“Wofuŋzi ŋic keci jaŋe ʒâŋe fai‐ŋeŋicko jopa qâtâtiec ejareme maŋŋeŋiczi kecʒiŋuc mi munʒepieŋ: ‘Wofuŋ e tiŋne juju‐nâŋecte erâ mâreŋ ʒi ro rauc enaŋte bacnâpo warewec.’ Aricne, Wofuŋ e ŋic gurune gurune keci jaŋe hehesic‐jeŋicte erâ ʒâŋe fai‐ŋeŋicko jopa jâpec ejareocnu.
5Ŋoŋe tiŋne â maŋɋaɋac juju‐ŋeŋicte erâ mâcne, ŋic gurune gurune keci jaŋere hehesicte erâ mâreŋ i ro rauc eniŋmu. Wofuŋ e irec hâcne ŋic keci jaŋe ʒâŋe fai‐ŋeŋicko jopa jâpec ejareocmu; erâ wâc mamacfâc‐ŋeŋic Abraham, Isaka â Jakobo dâŋ mupaŋke‐jarewec i basanaŋkeocte iŋuc eocmu.
6“Irec ŋoŋe ʒiŋuc mananʒepieŋ: Wofuŋ Anutu‐ŋeŋic e mâreŋ biaŋne ʒi tiŋne juju‐ŋeŋicte erâ ŋare tahac mi eocmu; ŋoŋe ŋicguru râŋgeŋ qaŋqaŋne hâcne.
7Ŋoŋe mâreŋ burocnao Wofuŋ Anutu‐ŋeŋic maŋbâiŋ ecnembiŋ irec manasuhuc mi nikec‐ŋopazejec. Ŋoŋe Aigita mâreŋkonec wahambiŋ dameŋ ira fuŋkerâ Wofuŋte dâŋ qatara warehuc juku hae mâreŋ ʒira fisimbiŋ.
8Ŋoŋe Horebe tikio ira Wofuŋ maŋbâiŋ hâhâwicne ecnepie aaric mana‐ŋarehuc sipiric‐ŋopazo muwec.
9Eme no Wofuŋzi ŋoŋehec ʒâʒâfic ewec irec qorac tapa ropemurâ tikio ferâ ŋafe ʒoaŋ 40 juhuc nânâ opâ moc mi nâpo.
10Ehame Wofuŋ Anutu e qorac tapa jajahec e jahacne mezi qâreŋkerâ narewec. Ŋoŋe tumaŋnehapie Wofuŋzi tikio ʒocbâruŋ maŋko juhuc dâŋ nazawec i sasawa qorac tapa ira hâcne qâreŋkekicne fowec.
11Eme ŋafe ʒoaŋ 40 tarame Wofuŋzi ʒâʒâfic qorac tapa jajahec i narewec.
12Ehuc ʒiŋuc nazawec: ‘Ajoc, go ŋicfâcge Aigita mâreŋkonec bacjopa waremeŋ jaŋe wiac mamakâcne eŋgopieŋte biac faharerâ huc. Jaŋe hata jaza jowatuc epo i biac râpeckehuc aeŋzi ɋâŋ qâqâtâc moc bambiŋ.’
13“Erâ Wofuŋ e ʒuhuckerâ ʒiŋuc nazawec: ‘Manakic, no ŋicguru keci jaŋe râŋgeŋ qaŋqaŋne jaha juhapie honec‐jopakopac.
14Irec behehaŋ bâsirowec‐jopape ʒâŋe biŋe‐jeŋic mâreŋko omaezejec; ehame go basawecgupe jaŋere sâc sirickehuc ŋicguru kâcɋene â tâpiri sâkohec ezemec.’
15Iŋuc nazame forisierâ tikionec wahapo; ehuc qorac tapa jajahec bacjofa wahahape tikio ʒoc bâruŋkehuc domawec.
16Eme ʒâŋe firâ ʒiŋuc honec‐ŋopapo: Ŋoŋe wiac mamakâcne ehuc Wofuŋ Anutu‐ŋeŋic bunao bahuc bulimakao ɋâŋ qâqâtâc moc bambiŋ; ŋoŋe Wofuŋzi hata ŋaza mutâc ewec i biac beherâ qâsoriembiŋ hâcne.
17No iŋuc honerâ qorac tapa jajahec bacjofa wahapo i ʒâŋe fai‐ŋeŋicko behepe qanʒaŋnewec.
18Eme mârâc epo iŋuc jaha ehuc Wofuŋ fodapecnehuc juhape ŋafe ʒoaŋ 40 tarawec; erâ ŋoŋe sâqocne barâ Wofuŋte maio wiac mamakâcne ehuc bunao bambiŋte erâ nânâ opâ moc mi nâhuc jupo.
19Erâ Wofuŋ e aarickeme kimbeŋ qaŋarehuc bâsirowec‐ŋopazo muwec irec hâwicnume wira wâwâsic ecnepo; eme Wofuŋ e dameŋ ira wâc mana‐narewec.
20Erâ Wofuŋ e Aroŋte wâc aarickeme bâsirowezo mume ere erâ mâmâc numucnepo.
21Eme tikionec waharâ bulimakao ɋâŋ qâqâtâc bambiŋ, wiac repicne i hâcne ʒocko behepe ʒame rorâ henʒaŋ qanʒaŋnepe uucne eme opâ tikionec wahahuc fokac ira tiepe huwec.
22“Ŋoŋe Tabera â Masa erâ Kibero‐Hatawa hae mâreŋ ira wâc iŋuc jaha Wofuŋ maŋbâiŋ ecnepie aarickewec.
23Eme Wofuŋ e Kadesi‐Baranea haeonec ʒiŋuc muhuc sorec‐ŋopawec: ‘Ŋoŋe ferâ mâreŋ ŋare tahac epo i ro rauc enʒepieŋ’; iŋuc muhuc ŋazame ŋoŋe Wofuŋ Anutu‐ŋeŋicte sâcmutâc dâŋ qatararâ e jahacne mi manasiŋkehuc dâŋticne wâc mi reŋkembiŋ.
24No fuŋkerâ manac‐ŋopapo dameŋ ira hâcne Wofuŋ fecnehuc jumbiŋzi juŋgopieŋ jaha.
25“Wofuŋzi bâsirowec‐ŋopazo muwecte ŋafe ʒoaŋ 40 ere maio fodaperâ fohuc jupo.
26Ehuc ʒiŋuc muhuc Wofuŋ wâsickepo: ‘O Wofuŋ Anutu, go ŋicfâcge â ʒâŋetucfâcge tâpiri sâko â mesanaŋgezi Aigita mâreŋkonec batarac‐joparâ jowac‐jopa wahameŋ jaŋe mi bâsirowec‐jopac.
27Go kiŋaŋŋicfâcge Abraham, Isaka â Jakobo jaŋere manasuhuc ŋicguru ʒi maŋsanaŋ â hehesic erâ sâqocne‐jeŋichec jaŋe honec‐jopatec boc mi gâpârezejec.
28Iŋuc mi etec Aigita mâreŋkonec jowac‐nâpo wahameŋ irec rune jaŋe ʒiŋuc munʒipiŋte: “Wofuŋ e mâreŋ mupaŋke‐jarewec ira râec‐jopazo eipierâ qaisoc‐jopahuc mâreŋ burocnao jopa qâhâmoc ejareocte jowac‐jopa rawec.”
29Jaŋe ŋicfâcge â ʒâŋetucfâcge tâpiri sâko â mesanaŋgezi jowac‐jopa wahameŋ hâcne.’
