Text copied!
CopyCompare
Kâte Bible - Sâcmutâc Hâsine

Sâcmutâc Hâsine 13

Help us?
Click on verse(s) to share them!
1“Ŋondeŋ‐ŋeŋicko porofete burecne me guŋ burec mamana ŋic moc fuarâ wiac ʒâŋe furu â mâsi hâhâwicne moc fuaocmu irec dâŋ ŋazaocmu mecne.
2Izi juku fârine fuame ʒiŋuc muocmu: ‘Nemu furune bâjâpec‐jopahuc kiŋaŋ qajarenʒepieŋ.’
3Iŋuc ŋazame dâŋticne mi mananʒepieŋ. Maŋ qâqâtâc‐ŋeŋic Wofuŋ Anutu‐ŋeŋic erao furu jaha râepie foekac me mâcne, irec fuŋne taniŋkeocte Wofuŋ Anutu‐ŋeŋiczi esâic‐ŋopaocmu hâcne.
4Ŋoŋe Wofuŋ Anutu‐ŋeŋic bâjâpehuc sâcmutâc â micdâŋ‐ticne mana rereŋ erâ kiŋaŋ qacnehuc erao qohotanʒepieŋ.
5Porofete burecne me guŋ burec mamana ŋic e ine Wofuŋ Anutu‐ŋeŋiczi kâpâcwâru, Aigita mâreŋ hâcne, irecnec batarac‐ŋoparâ jowac‐ŋopa wahawec ere dâŋ qataraniŋte qazu‐ŋarewec irec qâhâmonʒepieŋ. Ŋic eki hâcne Anutu‐ŋeŋiczi kike hata‐ticne bâjâperâ raniŋte mutâcne‐ŋarewec i beheniŋte esoc qafeŋ eŋarewec. Ŋoŋe wiac hehesicne ŋondeŋ‐ŋeŋicko fuame bâsuepie razejec.
6“Neŋgocgere ŋokâ, hahacge hâcne, me gahacne ŋokâ me otâge me joroc ŋonâŋge me âgo fâri‐jâmbâŋge, ŋic ŋokac i jaŋe eatucguhuc ʒiŋuc gazaniŋmu: ‘Ajoc, nâŋâc nemu gâcne kiŋaŋ qajarenaŋ.’ Go gahacne â mamacfâcge ŋoŋe ine nemu i moc mi manac‐jopaeŋgopieŋ.
7Ŋic bembeŋko me ʒoricko me mâreŋ tofane ŋifec â ŋifec rârecguhuc jueŋgopieŋ
8jaŋere nemure iŋuc mu qafeŋ egarepie mi mana‐jarezemec â busâqoc mana‐jarehuc mi ŋezic‐jopazemec erâ kiŋjeŋic wâc mi hesoŋkezemec.
9Aricne, ŋic i jaŋe qâhâmoc‐jopazo; qanaŋ go gahac fuŋkerâ jopatec ʒâhec ine ŋic ʒeŋgoma jaŋe qâhâmoc‐jopanʒepieŋ.
10Ŋoŋe ŋic i jaŋe Wofuŋ Anutu‐ŋeŋiczi kâpâcwâru fic, Aigita mâreŋkonec hâcne, jowac‐ŋopa wahawec ere meonec batarac‐ŋopazo fotarie‐ŋarembiŋte qânâzi hehâmoc‐jopanʒepieŋ.
11Eme Israe ŋic sasawa ŋoŋe irec dâŋ manarâ hâwic‐ŋopame wiac hehesicne mocwâc mi enʒepieŋ.
12“Ŋoŋe Wofuŋ Anutu‐ŋeŋiczi hae wiac gâcne ŋare tahac eme ira ŋec juc ehapie dâŋ ʒiŋuc mecne ŋazapie mananiŋmu:
13Ŋic repic qapicne gâcne ŋondeŋ‐ŋeŋickoneczi fuarâ hae rune eatuc‐jopahuc ʒiŋuc muŋgopieŋ: ‘Ajoc, nâŋâc ra nemu gâcne kiŋaŋ qajarenaŋ.’ Ŋoŋe ine nemu i jaŋe moc mi manac‐jopaeŋgopieŋ.
14Irec ŋoŋe dâŋ iŋucne mana taraniŋte aijakic jaha mu wioc enʒepieŋ. Eme ŋondeŋ‐ŋeŋicko wiac mamakâcne iŋucne fuarâ fokac, ŋoŋe iŋuc mana taraniŋmuo ine
15hae irec rune qâhâmoc‐jopanʒepieŋ, ehuc bulimakaofâc‐jeŋic â wiac‐jeŋic gâcne sasawa haeo fokac i bâsirowec‐jopa‐fârenʒepieŋ.
16Ŋoŋe mafa wiac‐jeŋic sasawa hae ʒoŋao ropie fisime ficjeŋichec rikepie Wofuŋ Anutu‐ŋeŋicte bâzi hâcbuc rikekicne tinac ezejec. Hae i heɋârerâ mi banʒepieŋ, i mâc sesuctac jaha fohuc juzejec sanaŋ.
17Wiac ʒocte biŋe mukicne i moc mi ronʒepieŋ; eme Wofuŋ e kimbeŋ‐ticnere ʒocbâruŋ qaʒue wahame busâqoc mana‐ŋarerâ buuruc qaŋarehuc mamacfâc‐ŋeŋic mupaŋke‐jarewec irec sâc basawec‐ŋopaocmu.
18Ŋoŋe Wofuŋ Anutu‐ŋeŋicte sâcmutâc dâŋ â micdâŋ‐ticne miŋecgac ŋaza mutâc ekopac i mana rereŋ eniŋmu â ere maio wiac epene sâckeekac i eniŋmuo ine iŋuc hâcne eŋareocmu.