1“Eme irec faicnao forisierâ Basaŋ mâreŋko fembeŋ. Ehame Basaŋ ŋicwofuŋ Ogo e ŋicfâc‐ticne sasawa jaŋehec waharâ râsi enârehuc Ederei hae ira ʒika fuŋkembiŋ.
2Wofuŋzi ine kecʒiŋuc nazawec: ‘Ŋoŋe ere mi hâwic‐ŋopaoc, noni hâcne e jahacne â ŋicfâc‐ticne erâ mâreŋ‐ticne meŋeŋicko râe‐fârekopac. Irec ŋoŋe Amori ŋicwofuŋ Sihoŋ e Hesiboŋ haeo juhame wiac ecnembiŋ sâc ijaha Ogo ecnenʒepieŋ.’
3Wofuŋ Anutu‐nâŋeczi iŋuc murâ Basaŋ ŋicwofuŋ Ogo â ŋicfâc‐ticne sasawa menâŋecko râec‐jopame qâmiziec‐jopa‐fârembeŋ.
4Erâ hae wiac‐ticne ŋerawec i moc mi behehuc ro rauc efârembeŋ. Nâŋâc hae sâko 60, Arigoba hae mâreŋ, Basaŋ ŋicwofuŋ Ogo ere uucmaŋ hâcne i rofârembeŋ.
5Hae i basanaŋkekicne erâ sac ʒoranehec, erâ motâc sâko i babasanaŋ‐ticnehec sasawa. Erâ hae piic piic sac tâmiric i wâc bocjaha rocjopambeŋ.
6Ehuc Hesiboŋ ŋicwofuŋ Sihoŋ ecnembeŋ sâc ijaha ehuc fic hae sasawa hetâc qâtâtie‐fârehuc ŋic ŋokac â naru motec mâmâc qâmiziec‐jopa‐fârembeŋ.
7Mâc bulimakao sasawa â haeo ʒikare merâfâc fowec i ʒikare mateŋ‐nâŋec rocjopambeŋ.
8Nâŋâc dameŋ ira hâcne Amori ŋicwofuŋ jajahec jahere mâreŋ Jordaŋ opâ ʒiŋucnao Aroroŋ opâo fuŋkerâ raku Herimoŋ tikio tarakac i jofac rombeŋ.
9(Sidoŋ ŋic jaŋe Herimoŋ tiki irec ʒâŋe Sirioŋ muhapie Amori ŋic jaŋe Seniri mueŋgopieŋ.)
10Wâneŋko fic hae ŋerawec erâ Gileade mâreŋ sasawa â Basaŋ mâreŋ raku Saleka â Ederei haeo tarakac, Basaŋ ŋicwofuŋ Ogo ere uucmaŋte hae mâreŋ sasawa hâcne i rofâ qâfârembeŋ.
11(Basaŋ ŋicwofuŋ Ogo e hâcne Refaim ŋic jaŋere soctofa moc buc juwec. Qâŋɋâŋ‐ticnere fofo buse heutuckehuc gufukicne i Amoŋŋic jaŋere hae moc ʒâŋene Raba ira foweczi fokac. Ʒoricne‐ticnere sâc i 9 kubi â otecne‐ticnere sâc i 4 kubi ekac. Sâc i kubi omanere sâc manahuc mukicne.)
12“Nâŋâc mâreŋ ro rauc embeŋ dameŋ ira Rubeŋ â Gade jahere gurufâc Aronoŋ wâneŋ tofanao Aroe hae ŋekac irecnec fuŋkerâ mâreŋ forakac i mecne erâ Gileade tiki mâreŋ ŋifecne i mâmâc jarepo.
13Gileade mâreŋ ŋifecne â Basaŋ mâreŋ sasawa, ŋicwofuŋ Ogo ere uucmaŋ, Arigoba hae mâreŋ sasawa i hâcne Manase guru dâkâne jaŋe jarepo. (Basaŋ hae mâreŋ sasawa irec ʒâŋe Refaim mâreŋ mueŋgopieŋ.
14Manasere ŋokâ Jairi ere ɋâric moc e Arigoba hae mâreŋ, Basaŋ hâcne, i rorâ raku Gesuri â Makati ŋic jaŋere mâreŋ qaŋeŋnao rotarawec, ehuc hae wiac irec ʒâŋe ‘Jairi hae boze’ mume foweczi fokac jaha.)
15Makiri e ine Gileade mâreŋ râcnepo.
16Rubeŋ â Gade jahere gurufâc jaŋe ine Gileade mâreŋko domarâ raku Aronoŋ wâneŋ ʒâʒâŋiŋko mâreŋ ma fokac i jâururâ raku Jaboko opâo Amoŋŋic jaŋere mâreŋ mao tarakac mâreŋ i hâcne jarepo.
17Erâ Araba wâneŋ, Jordaŋ opâzi ma eha Kinerete riqickonec raku Araba hâwec, Hâwec Hâmocne hâcne, ira hurâ Pisiga tiki fuŋnao ʒoaŋ wewefunao forakac wâneŋ i mâmâc jarepo.
18“Eme no dameŋ ira dâŋ kecʒiŋuc muhuc ŋaza mutâc epo: ‘Wofuŋ Anutu‐ŋeŋiczi mâreŋ ʒi hâcne ro rauc eniŋte ŋare tahac ewec, irec momori ŋicfâc‐ŋeŋic jaŋe ʒikare wiac‐jeŋichec Israe ŋic qomâfâc‐ŋeŋic bânie‐jarehuc opâ ʒi fotâcnenʒepieŋ.
19Ŋokac naru motecfâc‐ŋeŋic â lama bulimakaofâc‐ŋeŋic jaŋe ine hae mâreŋ qikiŋne‐ŋarepo ʒira ŋefârenʒepieŋ (lama bulimakaofâc‐ŋeŋic jaŋe guru sâko i no manakopac).
20Eme Wofuŋzi ŋoŋe wama bâfua‐ŋarewec iŋuc jaha qomâfâc‐ŋeŋic jaŋe bâfua‐jareocmu. Eme Wofuŋ Anutu‐ŋeŋiczi Jordaŋ opâ ocniŋucnao mâreŋ jare tahac ekac i ro rauc efarenʒepieŋ. Iŋuc epie tarame ŋoŋe ru sâc mâreŋ kâdoc qaŋarepo ʒira risienʒepieŋ.’
21Erâ dameŋ ira Josua wâc kecʒiŋuc âzâcne mutâc epo: ‘Wofuŋ Anutu‐ŋeŋiczi ŋicwofuŋ Sihoŋ â Ogo wiac ejacteme ʒâŋe fârigezi honemeŋ sâc ijaha ŋicwofuŋ gâcne jaŋe ejareha mâreŋ‐jeŋic ro rauc eniŋmu.
22Irec ŋoŋe jaŋere mi hâwic‐ŋopazejec; Wofuŋ Anutu‐ŋeŋic e bafic‐ŋopahuc iŋuc hâcne eocmu.’
23“Erâ no dameŋ ira ʒiŋuc muhuc Wofuŋ mu wâwâsic ecnepo:
24‘O Wofuŋ Anutu, go kiŋaŋŋicge no ʒai ʒonʒoŋ â tâpirigere fuŋne naza nowatuc emeŋ; sambâŋkonec me mâreŋkonec mo nemuzi goki wiac qeŋ bipinehec ebac emeŋ irec sâc moc ezac?
25Irec mana‐narehaŋ Jordaŋ opâ ocniŋucnao mâreŋ biaŋ fokac, tiki mâreŋ biaŋne â Lebanoŋ tiki hâcne, i honezepac.’
26Wofuŋ eki ine ŋoŋere erâ aaric mana‐narehuc dâŋnane qatararâ ʒiŋuc nazawec: ‘Sâcne mumec, irec dâŋ mocwâc mi muc.
27Go Pisiga tiki botâŋnao ferâ ʒâŋege bâfeŋnerâ fitec rame ʒoaŋ huhunaopec, â faic mâreŋkopec â juwic mâreŋkopec erâ ʒoaŋ wewefunaopec hae mâreŋ fokac i hone‐fârezemec, Jordaŋ opâ ʒi fotâcnerâ ine mi razemec.
28Josua ine mu baafec ecnerâ hâbidâŋ âzâcnetec ŋic ŋokac micne bajarehuc opâ fotâcnerâ, mâreŋ honecmu i bâtâc bajareme ro rauc enʒepieŋ.’
29Iŋuc nazame nâŋe Bete‐Peoro hae ŋifecnao wâneŋ fokac ira ʒuhuckerâ ŋec juc embeŋ.
