Proveps-Knare Nomaniza 12

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

¹Azerinte fatgohu kegu'ma avesintemo'a, ama' antahizamofonku avesinente. Hianagi azeri ante fatgohu kegu'ma avesrama hunte'mo'a, neginagi vahe mani'ne.

²Knare zamavu'zamavama nehaza vahera, Ra Anumzamo'a avesi nezamanteanagi, havi zamavu'zmavama hunaku'ma retroma nehaza vahera, Ra Anumzamo'a haviza hu'naze huno ke huzmantegahie.

³Kefozama hanaza zantetira mani'zazmia retrora osugahaze. Hianagi fatgo zmavu'zmavazama hanazana, arafunare'za mani'nageno, vahe'mo'za eri tasagira osugahaze.

⁴Hentofa avu'ava'ene a'mo'a, nevena knare agi nemie. Hianagi knare avu'ava osania a'mo'a, neve zaferinafi namu reno kasriankna hugahie.

⁵Fatgo vahe'mo'ma antahizama retroma hania antahizamo'a, knare huno fatgo hu'ne. Hianagi havi zamavu'zamava nehanaza vahe'mo'zama, tami'naza antahi'zana, regavatga hugahaze.

⁶Kefo zamavu zamavama nehaza vahe'mokizmi ke'mo'a, vahe zamahe nefria vahe'mokizmi zamazankna hu'ne. Hianagi fatgo vahe'mofo kemo'a, vahe'mokizmia zamagu'nevazie.

⁷Kefo zamavu zamavama nehaza vahe'mo'za, haviza hu'za fanane nehaze. Hianagi fatgo vahe'mokizmi nagamo'za, oti hanavenetize.

⁸Antahizama'amo knare'ma hu'nesia nera, vahe'mo'za husga huntegahaze. Hianagi antahiza zmimo'ma fatgoma osu vahera, vahe'mo'za zamavesra huntegahaze.

⁹Eri'za vahe'ama mani'nenia vahe'mo'ma, anteramino amane vahe maniazama hanimo'a, zamunte omane vahe'mo'za zamagra'a zamavufga erisga nehazageno ne'zazmia omane vahera zmagatere'naze.

¹⁰Fatgo vahe'mo'a zgagafa'amofona kegvagriso'e hunezamante. Hianagi kefo zamavu'zamavama nehaza vahe'mo'za, zgagfa zamia kevga hugahazanagi, kanonkeve zamigahaze.

¹¹Amuho hu'za hozama antaza vahe'mo'za, rama'a neza me'nenige'za negahaze. Hianagi neginagi vahe'mo'za, nena rga'a omne'zante knazmia ahe friza erizana e'nerize.

¹²Kefo zamavu'zamavama nehaza vahe'mo'za, kefo zamavu'zamava hu'za eriza vahe'mokizmi zante ke zmanunu nehaze. Hianagi fatgo vahe'mo'za, arafuna rene'za raga rentegahaze.

¹³Kefo zamavu'zamavama nehaza vahe'mo'za, havigema nehaza kezamifinti, krifu ahazankna nehaze. Hianagi fatgo vahe'mo'za, ana krifufina ohe'za agate'neraze.

¹⁴Knare zmageru'ene vahe'mo'za, kezmireti knare'zana e'nerize. Hagi eri'za vahe'mo'za, anahu kna hu'za erizazmireti mizazmia e'nerize.

¹⁵Neginagi vahe'mo'zama zamagesama antahizana, zamagrama nehazazamo'a fatgo hu'ne hugahazanagi, ama antahizane vahe'mo'za rumo'zama antahintahima zamiza kea nentahize.

¹⁶Neginagi vahe'mokizmia zmarimpa he'zamo'a ame huno amate eama hanigenka kegahananagi, ama' antahizane vahe'mo'a, azeri havizama nehinke'no'a, rimpa he'zamo'a eama hanigenka onkegahane.

¹⁷Tamage'ma hu vahe'mo'a, keagare'ma otisimofona tamage huno hufore huntegahie. Hianagi havigema hu vahe'mo'a, keagare'ma otisimofona havige huno hu frakintegahie.

¹⁸Antahintahima osuno ame'ama huno hu ke'mo'a, kazimo vahe avufafi reankna nehie. Hianagi, antahintahima huteno keagagama hu vahe'mofo kemo'a, zamaza huno zamazeri neganamare.

¹⁹Tamage ke'mo'a mevava hugahie. Hianagi havigema hu kemo'a, zazatera omanegahie.

²⁰Kefo antahintahine vahe'mokizmi zamagu'afina vahe'ma rezmavataga hu antahizamo avitene. Hianagi rimpa fru zanku'ma nehaza vahe'mo'za, muse hugahaze.

²¹Fatgo vahe'mokizmirera hazenke zana omegahie. Hianagi havi zamavu zamava ene vahe'mokizmirera, hazenke zamo'a avitegahie.

²²Ra Anumzamo'a havigema haza vahekura, tusiza huno agotezmanteno avesra hunezamante. Hianagi, tamage'ma nehaza vahekura, tusi muse nehie.

²³Ama' antahizane vahe'mo'za ame hu'za antahintahi zazmia eri ante ama nosaze. Hianagi neginagi vahe'mo'za, neginagi antahintahizamia ame huza hu ama nehaze.

²⁴Hanavetinka eri'zama erisanana, kva vahe fore hugahane. Hianagi feru vahe'ma manisanana, kazokzo eri'za vahe manigahane.

²⁵Antahintahi hakarema hu'zamo'a, vahe'mofona azeri antepri nehie. Hianagi zmazeri hanaveti ke'ma vahe'ma huzami zamo'a, zamazeri antesga nehige'za muse nehaze.

²⁶Fatgo vahe'mo'za tava'ozamire'ma nemaniza vahe'mokizmia, knare antahiza zamiza knare kante zmavare'za nevaze. Hianagi kefo zamavu zamavama nehaza vahe'mo'za, zamavre'za havifi nevaze.

²⁷Feru vahe'mo'zama zgagfa ahe'sazana onkregahaze. Hianagi kazigazi huno eri'zama eri'zamo'a, vahe'mofona mrerisa feno zama'e.

²⁸Fatgo avu'avama huno manizamo'a, knare nomanizamofo ka me'ne. Hagi ana fatgo avu'avama avaririzamo'a, frizana omanene.