1Matakani ia ura henia tauna ese, aonega ia ura henia noho, to sisiba hereva dekenai idia badu taudia be kavakava.
2Tau namona be Lohiabada dekena amo, hariharibada ia abia noho, to dika karaia totona ia laloa noho tauna, be Lohiabada ese dika tauna ia gwauraia noho.
3Kara dika ese tau ta dekenai, noho namo do ia henia lasi, to kara maoromaoro taudia be idia gini goada noho.
4Hahine namona ese iena adavana dekenai, matauraia bona moale ia henia noho, to iena adavana dekenai hemarai ia havaraia hahine ese, iena tau ia hisihisi henia noho, turia hamanokaia gorere bamona.
5Kara maoromaoro taudia edia laloa be maoromaoro, to kara dika taudia edia sisiba be mai koikoi danu.
6Kara dika taudia edia hereva, be taunimanima alaia totona ena hereva, to kara maoromaoro taudia edia ududia hereva ese, taunimanima idia hamauria noho.
7Kara dika taudia idia moru noho, bona idia boio momokani, to kara maoromaoro taudia edia ruma bese taudia, be do idia mauri noho momokani.
8Bema oi be mai aonega danu neganai, taunimanima ese oi do idia hanamoa, to bema oi be kavakava neganai, taunimanima ese oi do idia negea.
9Dagi maragi dekenai oi noho, to mai oiemu aniani be namo, to oi sibona lohia tauna oi gwauraia, to oi be hitolo noho, be dika.
10Kara maoromaoro tauna ese, iena boromakau ia bogahisihisi henia noho, to kara dika taudia edia kudouna, be mai dagedage danu.
11Iena tano ia gaukaralaia namonamo tauna, ese aniani momo do ia davaria, to anina lasi karadia dekenai, iena nega ia haorea tauna be kavakava.
12Kara dika taudia edia ura tamona, be dika do idia karaia noho, to kara maoromaoro taudia ese namo idia havaraia noho.
13Kara dika tauna be sibona ena hereva ese, do idia hadikaia, tarapu ese do ia hadikaia bamona, to kara maoromaoro tauna ese, kerere dekena amo ia roho mauri noho.
14Oiemu davana be oiemu hereva bona oiemu kara hegeregerena, ma oiemu gaukara hegeregerena ahuna do oi abia.
15Kavakava tauna ese ia laloa iena dala be maoro, to aonega tauna ese sisiba do ia kamonai henia.
16Kavakava tauna ese iena badu ia hedinaraia haraga noho, to laloa kehoa tauna ese, ia dekenai idia hereva dika henia neganai do ia laloa lasi.
17Hereva momokani tauna ese, hereva maoromaoro ia gwauraia hedinarai noho, to hereva koikoi gwauraia tauna ese, kara maoromaoro dalana ia hadikaia noho.
18Ia hereva haraga tauna ena hereva, be tuari kaia ia gwadaia noho bamona, to aonega tauna ena hereva ese, taunimanima idia hamauria diba.
19Hereva koikoi be nega sisina sibona do idia abia dae, to hereva momokani be do idia noho, ela bona hanaihanai.
20Kara dika karaia dala idia tahua taudia, edia kudoudia be mai koikoi danu, to kara namodia karaia dala idia tahua taudia ese, moale bada do idia davaria.
21Kara maoromaoro taudia dekenai dika ia vara noho lasi, to kara dika taudia be idia hekwakwanai momo noho.
22Lohiabada ese hereva koikoi taudia ia badu henia noho, to idia kara momokani noho taudia dekenai, Lohiabada ia moale noho.
23Aonega taudia ese edia diba idia hunia noho, to kavakava taudia ese, edia kavakava idia gwauraia hedinarai noho.
24Bema oi gaukara auka neganai, siahu bona goada do oi davaria, to oi lahedo neganai, hesiai tauna mai guia danu do oi lao.
25Laloa metau ese oiemu moale do ia koua, to hereva namodia ese oi idia hamoalea diba.
26Kara maoromaoro tauna ese, iena turana be dala maoromaorona dekenai ia hakaua noho, to kara dika tauna ese, iena turana ia hakaua kerere noho.
27Bema oi lahedo neganai, oiemu ura gauna do oi davaria lasi, to bema oi gaukara auka neganai, kohu momo namo herea do oi davaria.
28Kara maoromaoro ena dala, be mauri dekenai ia lao noho, to kara kerere ena dala, be mase dekenai ia lao noho.
