1Dii aubarika dà Saragu lán à ò nà, à kɛ̀nɛ lán à lɛ́ gbɛ̃̀nɛ nà.
2Ben à nↄ̀ sì à nɛ́ ì kↄ̃n Ibraĩo gↄ̃gbɛ̃ ũ à zikũ guu gurↄↄ kɛ̀ Luda dìɛnɛa.
3Ibraĩ tↄ́ kpà nɛ́ pìnɛ Isaaku.
4À bã̀ngu kɛ̀nɛ à gurↄ sↄraagↄ̃dee zĩ lán Ludaa dìɛnɛ nà.
5À kà wɛ̃̀ basↄↄro a nɛ́ pì igurↄ.
6Ben Sara bè: Luda yáadↄziyã kɛ̀mɛ, gbɛ̃ kɛ̀ mà píngi é yáa dↄmao.
7À bè dↄ: Weé we wà be Ibraĩnɛ yã mɛ́ gↄ̃ nɛ́dandee ũↄ́? Àɛ ma nɛ́gↄ̃gbɛ̃ ìo a zikũ guu.
8Kɛ̀ nɛ́ pì bíta kũ̀ à kɛ̃̀ yↄ̃a, ben Ibraĩ à kɛ̃na yↄ̃a pↄnnaa kɛ̀.
9Sara è nɛ́ kɛ̀ Igipiti nↄgbɛ̃ Agyara ì kↄ̃n Ibraĩo ègↄ̃ Isaaku yáa dↄↄmɛ,
10ben à bè Ibraĩnɛ: Ǹ pɛ́ zↄ̀ pìa kↄ̃n a nɛ́o, zaakɛ zↄ̀ nɛ́ pì é túbi ble kↄ̃n ma nɛ́ Isaakuoro.
11Yã pì Ibraĩ pↄↄ yàka maamaa, zaakɛ à nɛ́mɛ,
12ben Luda bènɛ: Ǹton tó n nↄ̀sɛ yaka n nɛ́ kↄ̃n n nↄgbɛ̃ zĩkɛri pìo yã musuro. Yã kɛ̀ Sara e oonnɛ píngi ǹ ma, zaakɛ Isaaku boriinↄn weégae beńnɛ n boriinↄ ũ.
13Mɛ́ tó zↄ̀ nɛ́ pì borii kɛ se, zaakɛ n nɛ́mɛ.
14Ben Ibraĩ fɛ̀ɛ kↄngↄ idɛ'idɛ, à pↄ́blee sɛ̀ kↄ̃n í tùuo à kpà Agyaraa. À dìnɛ, ben à à nɛ́ kpàa dↄ. À à gbàrɛ, ben à gàa èe likↄ̃aa zↄ̃ↄ Bɛsɛba gbáan.
15Kɛ̀ í yã̀aḿma, à gↄ̃kparɛ pì tò lí gbáru,
16ben à gàa à vɛ̃̀ɛ aɛ kàzulɛɛki zã̀ lɛ́n, zaakɛ à bè á yezi à a nɛ́ gana ero. Kɛ̀ à gàa à vɛ̃̀ɛ kãa lɛ, ben à nà ↄ́ↄdↄnaa.
17Luda gↄ̃kparɛ pì ↄ́ↄ dↄↄ mà, ben Luda Malaika lɛ́ zù Agyarazi zaa musu à bè: Bↄ́ bé à n lee Agyara? Ǹton vĩa kɛro, zaakɛ Luda nɛ́ pì ↄ́ↄ dↄↄ mà guu kɛ̀ à kún.
18Ǹ fɛɛ ǹ n nɛ́ pì sɛ́ ǹ à kũ a ↄↄa, zaakɛ mɛ́ tó à gↄ̃ bori ìsi ũ.
19Luda nↄgbɛ̃ pì wɛ́ɛ kɛ̃̀nɛ, ben à lↄ̀gↄ è. À gàa à í tↄ̀ a tùu pa, ben à mↄ̀ à kpà a nɛ́ pìa à mì.
20Ludaa kú kↄ̃n nɛ́ pìo ai à ìsi kũ̀. Ègↄ̃ kú gbáan, ben à gↄ̃̀ tofekari ũ.
21Gurↄↄ kɛ̀ à kú Parani gbáa pì guun à da Igipiti bùsu nↄↄ sɛ̀nɛ.
22Gurↄ beeea Abimɛlɛki kↄ̃n a zĩ̀kpɛɛnↄ gbɛ̃nsi Fikↄluo gàa Ibraĩ kiia aↄ̃ bènɛ: Ludaa kúnyo yã kɛ̀ nɛ́ɛ kɛɛ guu píngi.
23Ǹ la damɛ kɛ̀ gↄ̃ↄ ǹ sí kↄ̃n Ludao kɛ̀ nɛ́ bↄ ma kpɛɛro ke ma nɛ́nↄ ke ma boriinↄ. Lán ma gbɛ̃kɛɛ kɛ̀nnɛ nà, ǹ kɛmɛ lɛ kↄ̃n bùsu kɛ̀ ń kú à guu gbɛ̃ zĩ̀tↄ ũuo.
24Ben Ibraĩ bènɛ: Ma la dànnɛ.
25Ben Ibraĩ lↄ̀gↄ kɛ̀ Abimɛlɛki gbɛ̃nↄ sìa yã sɛ̀ɛ à sìnnɛ.
26Abimɛlɛki bè: Má gbɛ̃ kɛ̀ aↄ̃ yã beee kɛ̀nↄ dↄ̃ro, nɛ́ɛ omɛ yãro, gbã̀an má mà.
27Ben Ibraĩ sãanↄ kↄ̃n zùnↄ kũ̀ à kpà Abimɛlɛkia, ben aↄ̃ lɛdolɛ kɛ̀ kↄ̃o.
28Ben Ibraĩ sãnunu mɛ̀n swɛɛplaaanↄ bↄ̀ à kàɛ ńdona.
29Abimɛlɛki à là à bè: Sã mɛ̀n swɛɛplaaa kɛ̀ n ń káɛ ńdona pìnↄ yã dɛ diamɛ?
30Ben à wèàla à bè: Ǹ sã mɛ̀n swɛɛplaaa pìnↄ sí sèeda ũ kɛ̀ mámbe ma lↄ̀gↄ pì yↄ̃̀.
31Beee yãnzi wà tↄ́ kpà guu pìnɛ Bɛsɛba, zaakɛ gwen aↄ̃ la dànkↄ̃nɛ.
32Lɛn aↄ̃ lɛdolɛ kɛ̀ Bɛsɛba lɛ, ben Abimɛlɛki kↄ̃n a zĩ̀kpɛɛnↄ gbɛ̃nsi Fikↄluo lìara wà tà Filisitininↄ bùsun.
33Ibraĩ sãma lí tↄ̃̀ Bɛsɛba, ben à Dii Luda Gurↄpingide sìsi gwe.
34Ben à gurↄplaa kɛ̀ Filisitininↄ bùsu pì guu.
