Lom 7:10-20

¹⁰Ɩlɛnɑ mɑ́ mǝlɩ sǝtʋ. Pɩɩ wɛɛ sɩ kʋheelitu ntɩ tǝ́ wɑɑsɩ. Amɑ mɑ kiŋ ɩlɛ tǝ mǝlɑ mɑɣɑ kʋɣʋ kɛ́.

¹¹Pǝ tɑɣɑ pʋlʋ tɔɔ, ɩsɑɣɑtʋ hikɑ mpɑɑʋ nɑ tǝ́ puɣusɩ-m nɑ kʋheelitu ntɩ, nɑ tǝ́ kʋ-m nɑ kʋheelitu ntɩ.

¹²Ɩsɔ kʋsǝsɩɩtʋ wɛ tǝnɑŋŋ, nɑ kʋheelitu nɑ́ wɛ tǝnɑŋŋ tɔtɔ nɑ tǝ́ siɣisɑɑ nɑ tǝ́ tewɑ.

¹³Teu nyǝm mpɩ pǝ mǝlǝnɑ ntɛ́ nɑ pǝ́ kɔnɑ mɑɣɑ sǝm nɑ? Aɑɩ, pǝ tɑɣɑ mpʋ se, pɑɑ pǝcɔ. Ɩsɑɣɑtʋ lɑpǝnɑ kɔkɔlɔ ɩnɩ. Tǝnɑɣɑ tǝ kulinɑ tǝ tɩ wɑɑlɩ sɩ ntǝɣǝlɛ ntɩ. Tǝ kpɑɣɑ mpi pǝ wɛ teu tɔɣɔ nɑ tǝ́ kʋnɑ-m. Tǝnɑɣɑ kʋsǝsɩɩtʋ yelɑɑ nɑ ɩsɑɣɑtʋ tɔm lɑ sɔɣɔntʋ nɑ pǝ́ tɛɛ cɑɑsɑ.

¹⁴Tǝ nyǝmɑ́ mpʋ sɩ Ɩsɔ kʋsǝsɩɩtʋ tɔkʋɣʋ wɛ lotu tɑɑ tɔm kɛ́. Amɑ mɑɣɑ yʋlʋ kɛ yʋlʋ kɛ́ nɑ ɩcɑntʋ tǝlɔ, nɑ pǝ pɛɛtɑ-m nɑ ɩsɑɣɑtʋ nɑ mɑ́ pǝsɩ tǝ yom.

¹⁵Mɑ tɑ cɛkǝnɑ mpi mɑ lɑkɩ tɔ. Pǝ tɑɣɑ pʋlʋ tɔɔ, mɑɑ lɑkɩ mpi mɑ sɔɔlɑ lɑpʋ tɔ. Amɑ mpi mɑ kisɑɑ tɔ mpǝɣɩ mɑ lɑkɩ.

¹⁶Mɑ tɑ sɔɔlɩ mpi nɑ mɑ́ lɑkɩ-wɩ tɔɣɔ mɑ nyǝmnɑɑ sɩ Ɩsɔ kʋsǝsɩɩtʋ wɛ teu.

¹⁷Ye mpʋ pǝ tɑɣɑ mɑ́ lɑkǝnɑ mpʋ. Amɑ ɩsɑɣɑtʋ nti tǝ wɛ mɑ tɑɑ tɔ tǝlɛ tǝ lɑkǝnɑ.

¹⁸Mɑ nyǝmɑ́ teu sɩ kʋpɑntʋ nɑtǝlɩ tǝ fɛɩ mɑ kiŋ, mɑ pilimile tǝnɛ tǝ tɔm kɛ mɑ tɔŋ. Kʋpɑm pɑɑ mɑ luɣu wɛ teu sɩ mɑ́ lɑ kʋpɑntʋ, mɑɑ pǝsǝɣɩ tǝ lɑpʋ.

¹⁹Mɑɑ lɑkɩ kʋpɑntʋ nti mɑ sɔɔlɑɑ tɔ. Amɑ ɩsɑɣɑtʋ nti mɑ kisɑɑ tɔ ntǝɣɩ mɑ mǝlɑɑ nɑ mɑ́ lɑkɩ.

²⁰Mɑ lɑkɩ nti mɑɑ cɑɑ tɔ, pǝ tɑɣɑ mɑ́ nɔkǝnɑ. Amɑ ɩsɑɣɑtʋ nti tǝ kɑntɑ mɑ tɑɑ tɔ ntɩ tǝ tǝnnɑ mpʋ.