Rom 7:10-20

¹⁰A kum Warkurai ra o God i pitar tari sur in pitar a nilaun tang, i pitari kut a minat tang.

¹¹Uni a sakino petutna i sio pas a kisapi tiro korot una Warkurai sur in toro pas iau, ra una dekdekin a Warkurai i um doko iau.

¹²I mo ra dat tasmani lena, a Warkurai katu dur uni, ma a kum du wasiso na Warkurai rop katu dur un det, det tokodos, ma det wakak.

¹³Pepetlai, a utna ra i wakak i um doko iau? Awu ut! A sakino petutna i um doko iau. A sakino petutna i papam nama kum wakak na wasiso na Warkurai, ra i pitar a minat tang, sur in talapor lena a ngas na petutna ri i laulau. Una kum Warkurai dat tama lele pasi lena, a sakino petutna i laulau doko.

¹⁴Dat tasmani lena, a kum Warkurai anun o God, a kum utna na nion. Ikut iau a musano kut taginin upiso, ma a sakino petutna i ker tar iau sur an tene ititula anunu.

¹⁵Ka talapor un asau ra a ser pami. Uni asau ra a nemi sur an pami, ka pami, ikut asau ra a ngeti, a ser pami.

¹⁶Ra a ser pam asau ra ka nem na pami, i ese i lena a mulaot lena a kum Warkurai anun o God i wakak.

¹⁷I mo ra awu sur iau mo a pam a kum utna ri, awu. A sakino petutna ut ra i laun un iau i pami.

¹⁸A tasmani lena katu wakak na utna kuri i laun un iau. A wasiso lenra una sakino nemnem ina pining. Uni, a nemi ut sur an pam a wakakino, ikut ka pet lar pasi.

¹⁹Uni, ka pam asau ra i wakak, ra a nemi sur an pami. Ikut a sakino petutna ra ka nemi sur an pami, i ra a ser pami.

²⁰Ra a ser pam asau ra ka nemi sur an pami, awu sur iau mo a pami, a sakino petutna ra i laun un iau, i ser pami.