Leemiso Maxaafaa 6:10-33

¹⁰Neeni qassikka guuttaa zin77aasa; guuttaa xiskkaasa; kushiyaa shiishsha ekkada, guuttaa shemppaasa.

¹¹Yaatiyo wode hiyyeesatettai panggaadan, pacai ola miishshaa oiqqida asadan, ne bolli yaana.

¹²Iita asinne hanttaara asi, yuuyi yuuyidi wordduwaa odees;

¹³i ba aifiyan qim77otees; ba tohuwan bessees; ba biradhdhiyan malaatees.

¹⁴A uluwan geellatettai de7ees; i iitabaa qoppees; ubbatookka i ooshshaa medhdhees.

¹⁵Hegaa gaasuwan bashshai akeekennan a bolli yaana; i hassayennan meqqana; meqqidikka paxenna.

¹⁶GODAI ixxiyo usuppun yohoti de7oosona; i shenetiyo yohoti ubba laappuna:

¹⁷karidi xeelliya aifiyaa, worddotiya inxxarssaa, ashkke asata woriya kushiyaa,

¹⁸iitabaa maqqiya wozanaa, iitabaakko eesotidi woxxiya tohuwaa,

¹⁹wordduwaa bolli wordduwaa gujji gujjidi odiya worddo markkaa, ishatu giddon ooshshaa medhdhiya asa.

²⁰Ta na7au, ne aawaa azazuwaa pola; ne aayyiyaa nena tamaarissidoogaakka aggoppa;

²¹eta ubbatoo ne wozanan oiqqa; ne qooriyankka qachcha.

²²Neeni hemettiyo wode, eti nena kaalettana; neeni zin77iyo wode, eti nena naagana; neeni beegottiyo wodekka, eti nena zorana.

²³Aissi giikko, ha azazoti xomppe; timirttetikka poo7o; qassi seeraikka de7uwaakko efiya oge.

²⁴Ha azazotinne ha timirtteti iita maccaarippenne azina machchi cimo inxxarssaappe nena naagana.

²⁵I puulaa ne wozanan qaaqqatoppa; i qim77otankka omoodettoppa.

²⁶Issi attumaasi issi oittaa immidi, shaaramuxa maaccaasa demmanau danddayees; shin azina machcho laggettiyoogee nena worissana.

²⁷Issi asi tamaa idimmin, a maayoi meetettennan attanau danddayii?

²⁸Issi asi tamaa bonqquwaa yedhdhi hemettin, a tohoi xuugettennan attanee?

²⁹Asa machcho laggettiya urai hegaakka mala; o bochchiya ubbai qaxxayettennan attenna.

³⁰Kaisoi namisettidi, baayyo maanau wuuqqikko, asai a karenna.

³¹SHin i oiqettidabaa gidikko, laappun kushe qanxxana; ba son de7iya miishsha ubbaakka immana.

³²SHin maccaasaara shaaramuxiya asi wozana paca; he urai ba shemppuwaa bashshees.

³³Deshettiyoogeenne kauyyiyoogee a gakkida saama. A yeellai appe mulekka qucettenna.