Kukulutu 7

1

2

3

4

5

6

7

8

9

10

11

12

13

14

15

16

17

18

19

20

21

22

¹Pǝlɛ pǝ wɑɑlɩ mɑ nɑ́ ɩsɔtɑɑ tillɑɑ liɣiti sǝŋɑ tɛtʋ ŋkuluŋɑsɩ liɣiti tɔɔ, nɑ pɑ́ kpɑ sɩ tǝnɑsɩ heelim nɑ pɑ́ tɔkɑɑ sɩ heelimɑɣɑ ɩ tɑɑ fɛtɛ tɛtʋ nɑ teŋku nɑ tʋɣʋ nɑkʋlɩ kʋ tɔɔ.

²Nɑ mɑ́ nɑ́ ɩsɔtɑɑ tillu nɔɣɔlʋ ɩ́lɛ́ tɔtɔ, nɑ ɩ́ lɩɩnɑ ilim tǝlɩɩlɛ tɔɔ nɑ ɩ́ tɔkɑ Weesuɣu tʋ Ɩsɔ kʋyʋsʋɣʋ. Ḿpʋ́ɣʋ́ ɩ yɔɣɔtǝnɑ nɔɣɔ sɔsɔɣɑ kɛ ɩsɔtɑɑ tillɑɑ liɣiti wei pɑ hɑ tomɑ sɩ pɑ́ lɑ tɛtʋ nɑ teŋku pǝ tɑɑ kɛ nɑŋɑnɑŋɑ tɔ sɩ:

³Ɩ́ tɑɑ lɑtɑ ɩsɑɣɑtʋ kɛ tɛtʋ nɑ teŋku nɑ tɩɩŋ pǝ tɔɔ, hɑlǝnɑ tǝ́ tɛ tɑ́ Ɩsɔ pǝyɑlɑɑ tokuŋ tɑɑ kɛ́ yʋsʋɣʋ nɑ pǝ́cɔ́.

⁴Ḿpʋ́ɣʋ́ pɑ heelɑ-m mpɑ pɑ tokuŋ tɑɑ pɑ yʋsɑ Ɩsɔ kʋyʋsʋm tɔ pɑ nyʋɣʋ. Pɑ wɛ yʋlʋnyɔɔŋ iyisi nɩɩnʋwɑ nɑ iyisi nɩɩlɛ nɑ liɣiti (144000) kɛ Ɩsɛɣɛlɩ nyǝ́mɑ kpekɑ tǝnɑ tɑɑ.

⁵Yʋlʋnyɔɔŋ iyisi nɑɑnʋwɑ nɑ nɑɑlɛɣɛ (12000) pɑ́ yʋsɑ Yutɑ kpekǝle tɑɑ. Lupɛŋ kpekǝle tɑɑ kɛ́ iyisi nɑɑnʋwɑ nɑ nɑɑlɛ (12000). Kɑtɩ nyǝntɛ kɛ́ iyisi nɑɑnʋwɑ nɑ nɑɑlɛ (12000).

⁶Asɛɛ nyǝntɛ kɛ́ iyisi nɑɑnʋwɑ nɑ nɑɑlɛ (12000). Nɛfǝtɑli nyǝntɛ kɛ́ iyisi nɑɑnʋwɑ nɑ nɑɑlɛ (12000). Mɑnɑsee nyǝntɛ kɛ́ iyisi nɑɑnʋwɑ nɑ nɑɑlɛ (12000).

⁷Simiyɔŋ nyǝntɛ kɛ́ iyisi nɑɑnʋwɑ nɑ nɑɑlɛ (12000). Lefii nyǝntɛ kɛ́ iyisi nɑɑnʋwɑ nɑ nɑɑlɛ (12000). Ɩsɑkɑɑ nyǝntɛ kɛ́ iyisi nɑɑnʋwɑ nɑ nɑɑlɛ (12000).

⁸Sɑpulɔŋ nyǝntɛ kɛ́ iyisi nɑɑnʋwɑ nɑ nɑɑlɛ (12000). Yosɛɛfʋ nyǝntɛ kɛ́ iyisi nɑɑnʋwɑ nɑ nɑɑlɛ (12000). Pɛncɑmɛɛ nyǝntɛ kɛ́ iyisi nɑɑnʋwɑ nɑ nɑɑlɛ (12000).

⁹Pǝ wɑɑlɩ mɑ nyǝnɑɣɑ tɔtɔ, ɩlɛnɑ mɑ́ nɑ́ yǝlɑɑ kupiŋ, nɔɣɔlʋ kɑɑ pǝsɩ nɑ ɩ́ kɑlɑ pɑ tǝnɑ mpɑ pɑɑ wɛ pǝ tɑɑ tɔ. Kɑteŋɑsɩ tǝnɑ tɑɑ nɑ kpekɑ tǝnɑ tɑɑ nɑ piitim tǝnɑ tɑɑ nɑ nsǝmɑ tǝnɑ tɑɑ yǝlɑɑ kɑ wɛnnɑ. Nɑ pɑ́ sǝŋɑ kumte nɑ Ɩwǝyɑɣɑ pɑ ɩsɛntɑɑ, nɑ pɑ́ suu cɑpɑnɑɑ kʋhʋlʋmɑɑ nɑ pɑ́ tɔkɑ pɑcʋntʋ kɛ pɑ niŋ tɑɑ.

¹⁰Nɑ pɑ́ yɔɣɔtǝɣǝnɑ nɔɔsɩ sɔsɔɔnsɩ sɩ: Tɑ Ɩsɔ wei ɩ cɑɣɑ kumte tɔɔ tɔ ɩ́ nɑ Ɩwǝyɑɣɑ pɑ yɑpǝnɑ tɑ́ nyɔɔŋ.

¹¹Ɩsɔtɑɑ tillɑɑ tǝnɑ nɑ́ sǝŋɑɑ nɑ pɑ́ cɔɔnɑ kumte nɑ sɔsɑɑ nɑ weesiŋ nyǝ́mɑ liɣiti ɩnɩ. Ḿpʋ́ɣʋ́ pɑ hǝntɑ ɑtɛ tǝnɛnɛnɛ nɑ pɑ́ sɛɛ Ɩsɔ.

¹²Nɑ pɑ́ tɔŋ sɩ: Ḿpʋ́ɣʋ́ pǝ wɛɛ. Tɑ́ Ɩsɔ tǝnnɑ tɑlǝtʋ, nɑ teeli, nɑ lǝmɑɣɑsɛɛ, nɑ nyɑnɑ tǝmlɛ sɛɛʋ, nɑ sɑmtʋ, nɑ pǝsʋɣʋ, nɑ tomɑ kɛ tɑm tɔɔ. Ami.

¹³Tǝnɑɣɑ sɔsɑɑ mpɛ pɑ tɑɑ nɔɣɔlʋ pɔɔsɑ-m sɩ: Yǝlɑɑ mpɑ pɑ suu cɑpɑnɑɑ kʋhʋlʋmɑɑ tɔ pɑ kɛ́ mpɑ nɑ leɣe pɑ lɩɩnɑɑ?

¹⁴Ɩlɛnɑ mɑ́ cɔ-ɩ sɩ: Mɑ cɛ nyɑ́ nyǝmnɑ. Ḿpʋ́ɣʋ́ ɩ heelɑ-m sɩ: Mpɑ pɑɑ nɑwɑ kʋnyɔŋ sɔsɔɔʋ ŋkʋ tɔɣɔlɛ. Pɑ cɔtɑ pɑ cɑpɑnɑɑ kɛ́ nɑ pɑ́ hʋlǝsɩ-wɛɣɛ Ɩwǝyɑɣɑ cɑlǝm tɑɑ.

¹⁵Pǝ tɔɔ kɛ́ pɑ sǝŋɑ Ɩsɔ kumte tɛɛ nɑ pɑ́ lɑkɩ ɩ tǝyɑɣɑ tɑɑ kɛ́ tǝmlɛ kɛ tɑm tɔɔ. Wei ɩ cɑɣɑ ḿpʋ́ɣʋ́ kumte tɔɔ tɔ ɩ kɑ́ cɑɣɑ pɑ kiŋ nɑ ɩ́ kentiɣi pɑ tɔɔ.

¹⁶Nyɔɣɔsɩ yɑɑ lʋkɔtʋ kɑɑ tɑsɑ-wɛɣɛ kpɑʋ. Ilim kɑɑ nyɑɣɑ-wɛ, hɑŋɑɣɑ nɑkǝlɩ kɑ kɑɑ tɑsɑ-wɛɣɛ lɑpʋ.

¹⁷Pǝ tɑɣɑ pʋlʋ, Ɩwǝyɑɣɑ ŋkɑ kɑ wɛ kumte hɛkʋ tɔ ŋkɛ kɑɑ tiikiɣinɑ-wɛ, nɑ kɑɑ pukinɑ-wɛɣɛ weesuɣu lʋm sɛɛlɑɑ kiŋ. Nɑ Ɩsɔ kɑ́ hɩɩsɩ pɑ ɩsǝlʋm tǝnɑ tǝpɑɩpɑɩ.