Kukulutu 6

1

2

3

4

5

6

7

8

9

10

11

12

13

14

15

16

17

18

19

20

21

22

¹Pǝ wɑɑlɩ kɛ́ mɑ nɑ Ɩwǝyɑɣɑ kɔɔlɑ kʋtɑɑlǝtʋ nɑɑtosompɔɣɔlɑɣɑ ɩnɩ ɩ tɑɑ kʋlʋmtʋ. Ḿpʋ́ɣʋ́ mɑ nɩɩ weesiŋ nyǝ́mɑ liɣiti mpɛ pɑ tɑɑ nɔɣɔlʋ nɔɣɔ. Pǝ lɑpɑɣɑ ɩsɩɩ tɛʋ holuɣu tɑkɑ, nɑ ɩ́ tɔŋ sɩ: Kɔɔ.

²Mɑ nyǝnɑɣɑ mpʋ ɩlɛ mɑ nɑ́ kpɑɣɑnʋhʋlʋmɑɣɑ ntɛ́, nɑ wei ɩ cɑɣɑ kɑ tɔɔ tɔ ɩ tɔkɑ tɔɔʋ. Ḿpʋ́ɣʋ́ pɑ hɑ-ɩ teeli ntenuɣu. Ɩ kɛ́ kǝllʋ kɛ́, nɑ ɩ́ tɛɛ sɩ ɩ tɑsǝɣɩ kǝlʋɣʋ tɔtɔ.

³Pǝ wɑɑlɩ kɛ́ Ɩwǝyɑɣɑ kɔɔlɑ kʋtɑɑlǝtʋ nɑɑlɛ nyǝntʋ. Ɩlɛnɑ mɑ́ nɩɩ weesiŋ nyǝ́mɑ mpɛ pɑ tɑɑ nɑɑlɛ nyǝŋ nɔɣɔ sɩ: Kɔɔ.

⁴Mɑ nyǝnɑɣɑ ɩlɛnɑ mɑ́ nɑ́ kpɑɣɑnʋsɛɛmɑɣɑ lɩɩwɑ. Nɑ pɑ́ hɑ kɑ tɔɔ cɑɣɑlʋ kɛ pǝsʋɣʋ sɩ ɩ́ yoosi tɛtʋ tɔɔ yǝlɑɑ tǝnɑ nɑ pɑ́ yoo nɑ pɑ́ kʋ tǝmɑ. Ɩlɛnɑ pɑ́ cɛlɛ-ɩ lɑɣɑtɛ tɑɑ lɑɣɑtɛ.

⁵Pǝ wɑɑlɩ kɛ́ Ɩwǝyɑɣɑ kɔɔlɑ kʋtɑɑlǝtʋ tooso nyǝntʋ, nɑ mɑ́ nɩɩ weesiŋ nyǝ́mɑ tooso nyǝŋ tɔmɑ sɩ: Kɔɔ. Mɑ nyǝnɑɣɑ mpʋ ɩlɛnɑ mɑ́ nɑ́ kpɑɣɑnʋkpɛɛtɑɣɑ lɩɩwɑ nɑ kɑ tɔɔ cɑɣɑlʋ tɔkɑ sɑnǝyɑ kɛ ɩ niŋ tɑɑ.

⁶Ḿpʋ́ɣʋ́ mɑ nɩɩwɑ ɩsɩɩ nɔɣɔlʋ nɔɣɔ tɑkɑ nɑ kɑ lɩɩnɑ weesiŋ nyǝ́mɑ liɣiti mpɛ pɑ hɛkʋ nɑ kɑ́ tɔ sɩ: Kʋyɑkʋ kʋlʋmʋɣʋ tǝmlɛ lɑpʋ kʋfɛlʋɣʋ ntɛ́ tɔɣɔnɑɣɑ pee kiloo kʋlʋm. Ɩlɛnɑ tɔɣɔnɑɣɑ pee lɛŋkɑ kɛ kiloonɑɑ tooso kɛ́ kʋyɑkʋ kʋlʋmʋɣʋ tǝmlɛ. Amɑ pǝ kpɑɣɑʋ nim nɑ sʋlʋm tɔ, tɑɑ ke pǝ́lɛ́.

⁷Pǝ wɑɑlɩ kɛ Ɩwǝyɑɣɑ kɔɔlɑ kʋtɑɑlǝtʋ liɣiti nyǝntʋ, nɑ mɑ́ nɩɩ weesiŋ nyǝ́mɑ liɣiti nyǝŋ tɔmɑ sɩ: Kɔɔ.

⁸Mɑ nyǝnɑɣɑ mpʋ ɩlɛnɑ mɑ́ nɑ́ kpɑɣɑnʋ ɑtɔntɔɔtɛ tɑkɑ lɩɩwɑ. Nɑ pɑ yɑɑ ɩ tɔɔ cɑɣɑlʋ sɩ sǝm, nɑ wei ɩ hʋ́lǝ́ɣɩ́ sǝtɑɑ tǝcɑɣɑlɛ tɔ ɩ́lɛ́ ɩ tǝŋǝɣɩ ɩ wɑɑlɩ. Ḿpʋ́ɣʋ́ pɑ hɑ-wɛɣɛ tomɑ kɛ tɛtʋ hɔɣɔlǝŋ liɣiti tɑ́ɑ́ kʋlʋmʋɣʋ tɔɔ, sɩ pɑ́ kʋ yǝlɑɑ nɑ lɑɣɑtɛ nɑ nyɔɣɔsɩ sɔsɔɔnsɩ nɑ kʋtɔmǝŋ, nɑ pɑ́ lɑ́ nɑ tɑɑlɛ wontu kʋ yǝlɑɑ.

⁹Pǝ wɑɑlɩ kɛ́ Ɩwǝyɑɣɑ kɔɔlɑ kʋtɑɑlǝtʋ kɑkpɑsɩ nyǝntʋ. Ḿpʋ́ɣʋ́ mɑ nɑ́ kɔtɑɣɑ tǝlɑtɛ tɛɛ kɛ́ mpɑ pɑɑ kʋwɑ tɔ pɑ lǝsɑsɩ. Ɩsɔ Tɔm nɑ tɑmpɑnɑ nnɑ pɑ nɑwɑ nɑ pɑ́ heeliɣi-yɛ tɔ pǝ tɔɔ kɛ́ pɑ kʋ-wɛ.

¹⁰Nɑ pɑ́ yɔɣɔtǝɣǝnɑ nɔɔsɩ sɔsɔɔnsɩ sɩ: Tɑcɑɑ nɑŋŋ tʋ nɑ tɑmpɑnɑ tʋ, pǝlee kɛ́ n kɑ́ hʋʋnɑ ɑtɛ nyǝ́mɑ, nɑ pɑ kʋɣɩ-tʋɣʋ ɩsǝntɔ tɔ, ń tʋ-wɛɣɛ sɑlǝkɑ?

¹¹Ḿpʋ́ɣʋ́ pɑ hɑ pɑɑ pɑ tɑɑ wei kɛ́ cɑpɑ kʋhʋlʋm nɑ pɑ́ heeli-wɛ sɩ pɑ́ yele nɑ pǝ́cɔ́. Pǝ kɑɑsɑ pǝcɔɣɔ, hɑlǝnɑ pɑ tɑɑpɑlɑɑ nɑ pɑ tǝmlɛ tɑɑ ɑkpelenɑɑ mpɑ pɑɑ kʋ ɩsɩɩ pɑ kʋɣʋ mpɛ tɔ pɑ nyʋɣʋ kɔɔ nɑ kʋ yoosi nɑ pǝ́cɔ́.

¹²Pǝ wɑɑlɩ kɛ́ Ɩwǝyɑɣɑ kɔɔlɑ nɑɑtoso nyǝntʋ. Ḿpʋ́ɣʋ́ tɛtʋ pɑɑsɑɑ nɑ tǝ sele teu, nɑ ilim nɑ́ɑ́ mǝlɩ piliŋ ɩsɩɩ pɑ piisuɣu pʋʋɣʋ tɔ, nɑ ɩsɔtʋ nɑ́ɑ́ mǝlɩ sɛɛʋ ɩsɩɩ cɑlǝm.

¹³Nɑ ɩsɔtʋlʋŋɑsɩ nɑ́ɑ́ lɩɩ ɩsɔtɑɑ nɑ sɩ hotiɣi ɑtɛ ɩsɩɩ heelim ciɣituɣu fiki tʋɣʋ nɑ fikinɑɑ ɑkɑɑ cɛkɩ nɑ ɑ́ hotiɣi tɔ.

¹⁴Nɑ ɩsɔtɔnʋɣʋ kɛɛlɩ ɩsɩɩ pɑ kpiluɣu tɑkǝlɑɣɑ nɑ pɑɑ nɑɑ-kɛ tɔ. Ḿpʋ́ɣʋ́ pǝ kpɛsɑ pɔ́ɔ́ŋ tǝnɑɣɑ ɩ lonɑ tɑɑ nɑ pǝ́ lǝsɑ tɛtʋ nti lʋm cɔɔnɑɑ tɔɣɔ tǝ lonɑ tɑɑ.

¹⁵Atɛ ɑwulɑɑ sɔsɑɑ nɑ nyʋɣʋ nyǝ́mɑ nyʋɣʋ nyǝ́mɑ nɑ yoolɑɑ tɑɑ sɔsɑɑ nɑ ɑpilɑ nɑ pǝsǝlɑɑ nɑ yǝlɑɑ lɛlɑɑ tǝnɑ, pɑɑ yomɑɑ pɑɑ kɑsɑɣɑmpiyɑ pɑ sewɑ nɑ pɑ́ ŋmɛlɩ kʋkpɑmǝŋ tɑɑ nɑ pɔ́ɔ́ŋ sɩɩlɑsɩ tɑɑ.

¹⁶Nɑ pɑ́ tɔŋ pɔ́ɔ́ŋ nɑ kʋkpɑmǝŋ sɩ: Ɩ́ kpǝtɩ tɑ́ tɔɔ, ɩ́ tɑkɩ tɑ́ tɔɔ kɛ́ teu tǝkulɑkulɑ nɑ tǝ́ tɑɑ lɩɩ wei ɩ cɑɣɑ kumte tɔɔ tɔ ɩ ɩsɛntɑɑ, nɑ pǝ́ hɑtǝlǝnɑ-tʋ nɑ Ɩwǝyɑɣɑ pɑ́ɑ́nɑ́ tɔtɔ.

¹⁷Pǝ tɑɣɑ pʋlʋ, pɑ pɑ́ɑ́nɑ́ kʋyɑkʋ sɔsɔɔŋkʋ tɑpǝnɑ. Awe pǝsǝɣǝnɑ nɑ ɩ́ kɑntǝlɩ?