Kukulutu 20

1

2

3

4

5

6

7

8

9

10

11

12

13

14

15

16

17

18

19

20

21

22

¹Ḿpʋ́ɣʋ́ mɑ nɑ́ ɩsɔtɑɑ tillu nɔɣɔlʋ nɑ ɩ́ lɩɩnɑ ɩsɔtɑɑ nɑ ɩ́ tiiki, nɑ ɩ́ tɔkɑ ɩ niŋ tɑɑ kɛ́ lumɑŋ pʋ́ʋ́ɣʋ́ sɔsɔɔʋ sɑɑfʋ nɑ ɑlukpɑlɩɩŋ tɑŋkɩɩŋ nɩɩlɩ.

²Tǝnɑɣɑ ɩ siisɑɑ nɑ ɩ́ kpɑ tʋm sɔsɔ kʋpǝŋ ɩnɩ nɑ ɩ́ tʋ-ɩ ɑlukpɑlɑ sɩ ɩ́ cɑɣɑ ḿpʋ́ɣʋ́ pɩɩsɩ iyɑɣɑ (1000). Ɩlɔɣɔʋ kɛ pɑ yɑɑ mpʋ sɩ: Tʋm sɔsɔ kʋpǝŋ, nɑ kʋlʋm ɩnǝɣǝlɛ Sɑtɑnɩ.

³Ḿpʋ́ɣʋ́ ɩsɔtɑɑ tillu kpɑɣɑ-ɩ nɑ ɩ́ pɛtɩ lumɑŋ pʋ́ʋ́ɣʋ́ sɔsɔɔʋ tɑɑ nɑ ɩ́ tǝkɩ, nɑ ɩ́ kɑlǝsɩ nɑ ɩ́ tʋ pǝ tɔɔ kɛ́ kʋyʋsʋm sɩ tʋm sɔsɔ ɩ́ tɑɑ tɑsɑ mpɑɑ hikuɣu nɑ ɩ́ tolisi kɑteŋɑsɩ tɔɔ yǝlɑɑ, hɑlǝnɑ pɩɩsɩ iyɑɣɑ (1000) ŋkɛ kɑ́ tɛ nɑ pǝ́cɔ́. Pǝ wɑɑlɩ ɩlɛ pɑɑ tʋlɩ-ɩ wɛɛ nɑɑlɛ.

⁴Ḿpʋ́ɣʋ́ mɑ nɑ́ kumlee nɑ pǝ́ hɑwɑ ɑ tɔɔ cɑɣɑlɑɑ kɛ pǝsʋɣʋ sɩ pɑ́ hʋʋkɩ tɔm. Nɑ mɑ́ nɑ́ tɔtɔɣɔ mpɑ pɑ heelɑɣɑ tɑmpɑnɑ nnɑ ɑ tɔɔ Yesu kulɑɑ tɔ nɑ Ɩsɔ Tɔm nɑ pɑ́ lɛntɩ-wɛɣɛ pǝ tɔɔ tɔ pɑ lǝsɑsɩ. Pɛlɛ pɑ tɑɑ sɛɛ wontuɣu ŋkʋ nɑ kʋ lɛɛsʋɣʋ. Pǝyele pɑ tɑ tʋ wontuɣu ŋkʋ kʋ kʋyʋsʋm kɛ pɑ tokuŋ yɑɑ pɑ niŋ tɑɑ. Ḿpʋ́ɣʋ́ pɑ femɑ nɑ pɑ́ nɑ́ Kilisiti pɑ́ tɔɣɔ kɑwulɑɣɑ kɛ pɩɩsɩ iyɑɣɑ (1000).

⁵Amɑ pɩɩsɩ iyɑɣɑ (1000) ŋkɛ kɑɑ tɛmɑ nɑ pǝ́cɔ́ sǝtɑɑ lɛlɑɑ fe. Sǝtɑɑ tɑɑ fem kɑncɑɑlɑɣɑ nyǝm ntɛ́.

⁶Mpɑ pɑɑ fe fem kɑncɑɑlɑɣɑ nyǝm pǝnɛ pǝ tɑɑ tɔ mpɛɣɛlɛ leleŋ nɩɩlɑɑ, nɑ mpɛɣɛlɛ pǝ pɑɑsɑɑ nɑ pǝ́ kooli koolee kʋpɑnɑ. Sǝm kʋlɛlǝm ɩɩ tɑsǝɣɩ-wɛɣɛ pǝsʋɣʋ. Amɑ pɑɑ lɑ Ɩsɔ nɑ Kilisiti pɑ kɔtǝlɑɑ, nɑ pɑ́ nɑ-ɩ pɑɑ tɔɣɔ kɑwulɑɣɑ kɛ pɩɩsɩ iyɑɣɑ (1000) tɑɑ.

⁷Pɩɩsɩ iyɑɣɑ (1000) ŋkɛ kɑ kɔŋ nɑ kɑ́ yoosi ɩlɛnɑ pɑ́ tʋ́lɩ́ Sɑtɑnɩ kɛ ɩ sɑlǝkɑ tɑɑ.

⁸Nɑ ɩ kɑ́ cɔɔ ɑntulinyɑ piitimnɑɑ tǝnɑ tɔɔ tǝpɑɩ nɑ ɩ́ puɣusi yǝlɑɑ. Mpɛɣɛlɛ Kɔkɩ nɑ Mɑkɔkɩ. Ɩ kɑ́ koti-wɛ sɩ pɑ́ yoo, nɑ pɑɑ wɛɛ pɑɣɑlɛ ɩsɩɩ teŋku nɔɣɔ kɑnyǝŋɑ pee.

⁹Pɑ lɩɩnɑ ntɛ́ nɑ tɛtʋ tǝnɑ tɔɔ kɛ́ pɑɑ le, nɑ pɑ́ tɑ́ kotɑɣɑ kɛ Ɩsɔ yǝlɑɑ tǝsikile nɑ Ɩsɔ luɣu tɛɛ ɩcɑtɛ. Amɑ kɔkɔ lɩɩnɑ ɩsɔtɑɑ nɑ kɑ́ kʋ pɑ tǝnɑ tǝnɑŋnɑŋ.

¹⁰Ḿpʋ́ɣʋ́ pɑ pɛtɑ Ɩlɔɣɔʋ wei ɩ puɣusɑɣɑ-wɛ tɔɣɔ kɔkɔ nɑ ɑsimti pǝ teŋku wei ɩ tɑɑ pɑɑ tɛmɑ wontuɣu nɑ Ɩsɔ kʋyɔɣɔtʋtʋ tɛlǝsʋlʋ pɔpɔtʋ kɛ pɛtʋɣʋ tɔ ɩ tɑɑ. Ilim nɑ ɑhoo kɛ pɩɩ nɑɑsǝɣɩ-wɛɣɛ tɑm tɔɔ kɛ́ mpʋ.

¹¹Ḿpʋ́ɣʋ́ mɑ nɑ́ kumte sɔsɔɔlɛ kʋhʋlʋmlɛ nɑ tǝ tɔɔ cɑɣɑlʋ. Tǝnɑɣɑ tɛtʋ nɑ ɩsɔtɔnʋɣʋ mʋkɑ yem kɛ́ ɩ ɩsɛntɑɑ tǝkpɑtɑɑ.

¹²Pǝ wɑɑlɩ kɛ́ mɑ nɑ́ sǝtɑɑ sɔsɑɑ nɑ sǝkpemɑ nɑ pɑ́ sǝŋɑ kumte ɩsɛntɑɑ. Ḿpʋ́ɣʋ́ pɑ hɛtɑ tɑkǝlɑsɩ. Ɩlɛnɑ pɑ́ hɛtɩ tɑkǝlɑɣɑ lɛŋkɑ tɔtɔ, kɛlɛɣɛlɛ weesuɣu nyǝŋkɑ. Ɩlɛnɑ pɑ́ sʋʋ sǝtɑɑ kɛ tɔm nti nti pɑɑ lɑpɑ nɑ pɑ́ ŋmɑɑ-tǝɣɩ tɑkǝlɑsɩ nsɩ sɩ tɑɑ tɔɣɔ hʋʋnɑʋ.

¹³Ḿpʋ́ɣʋ́ teŋku lǝsɑ sǝtɑɑ mpɑ ɩ kɑ lipɑ tɔ. Nɑ sǝm nɑ sǝtɑɑ tǝcɑɣɑlɛ nɑ́ɑ́ lǝsɩ tɔtɔɣɔ yǝlɑɑ mpɑ pɑɑ wɛ pǝ tɑɑ tɔ. Ɩlɛnɑ pɑ́ pɔɔsɩ pɑɑ wei kɛ́ nti ɩ kɑ lɑpɑ tɔ.

¹⁴Pǝ yelɑ sǝm nɑ sǝtɑɑ tǝcɑɣɑlɛ, ɩlɛnɑ pɑ́ pɛtɩ pɛlɛɣɛ kɔkɔ teŋku tɑɑ. Kɔkɔ teŋku ɩnǝɣǝlɛ sǝm kʋlɛlǝm.

¹⁵Ye wei ɩ hǝtɛ ɩ́ fɛɩ weesuɣu tɑkǝlɑɣɑ tɑɑ, kɔkɔ teŋku tɑɑ kɛ́ pɑ pɛtǝɣɩ-ɩ.