Kukulutu 4

1

2

3

4

5

6

7

8

9

10

11

12

13

14

15

16

17

18

19

20

21

22

¹Pǝlɛ pǝ wɑɑlɩ pǝ tɑsɑ-m lɑpʋ ɩsɩɩ toosee tɑkɑ nɑ mɑ́ nɑ́ pǝ tʋlɑ ɩsɔtɔnʋɣʋ tɑɑ kɛ́ nɔnɔɣɔ. Ḿpʋ́ɣʋ́ pǝ yɔɣɔtǝɣɩ nɑ pǝ́ sɛɛkɩ ɩsɩɩ ɑkɑntǝlɛ sɛɛkʋɣʋ tɔ. Mɑɑ tɛmɑ-kɛɣɛ nɩɩʋ kɛ hɑtuu lɔŋ. Tǝnɑɣɑ pǝ tɔmɑ-m sɩ: Kpɑ cǝnɛ nɑ mɑ́ hʋlɩ-ŋ nti tǝ wɛɛ sɩ tɩɩ kɔɔ tǝnɛ tǝ wɑɑlɩ tɔ.

²Ḿpʋ́ɣʋ́ Feesuɣu tɛɛnɑ-m kpɑkpɑɑ nɑ mɑ́ nɑ́ ɩsɔtɑɑ tǝnɑɣɑ kɑwulɑɣɑ kumte, nɑ nɔɣɔlʋ cɑɣɑ tǝ tɔɔ.

³Ɩ ɩsɛntɑɑ tee kɔkɔ kɛ́ nɑ pǝ́ nǝɣǝsǝnɑ ɩsɩɩ liɣitee pɛɛ kɛ tɔm nɑɑlɛ nnɑ ɑ cɔlǝtɑɑ tɔ. Nɑ kɑ́ɣɑ́lʋ́ cɔɔnɑ kumte nɑ ɩ́ tee kɔkɔ nɑ pǝ́ nǝɣǝsǝnɑ ɩsɩɩ liɣitee pǝlɛ kɑsɑsɑŋɑ nyǝntɛ.

⁴Kumlee hiu nɑ liɣiti kɑ cɔɔnɑ kumte ńtɛ́, nɑ sɔsɑɑ hiu nɑ liɣiti cɑɣɑ ɑ tɔɔ, nɑ pɑ́ suu wontu kʋhʋlʋmtʋ nɑ pɑ́ temɑ wʋlɑ nteniŋ.

⁵Kumte ńtɛ́ tǝ tɛɛ, tɛʋ nyǝɣǝsɑɣɑ ŋmɛlɛʋ ŋmɛlɛʋ kɛ́, nɑ pǝ́ yɔɣɔtǝɣɩ, nɑ tɛʋ hʋliɣi kpɑŋ kpɑŋ. Fǝtǝlɑnɑɑ sɔsɑɑ nɑɑtosompɔɣɔlɑɣɑ nɑ́ mʋkɑɣɑ kumte ɩsɛntɑɑ. Fǝtǝlɑnɑɑ sɔsɑɑ mpɛɣɛlɛ Ɩsɔ Feesiŋ nɑɑtosompɔɣɔlɑɣɑ.

⁶Kumte nɔɣɔ tɔɔ, tiŋ pɔnɑ ɩsɩɩ teŋku, nɑ pǝ tɑɑ nɑɑ tǝcɛɩcɛɩ ɩsɩɩ tiŋ kʋpɑmpɑŋ nɔɣɔlʋ. Pǝ cɔɔnɑʋ kumte luɣu luɣu tǝkpɑm tɔ, weesiŋ nyǝ́mɑ nɑpǝlǝɣɩ liɣiti mpɑ pɑ tɑɑ nɑ pɑ wɑɑlɩ ɩsɛ wɑɑsɑɑ tǝwisiwisi tɔ, mpɛ pɑ pɩɩlǝnɑ.

⁷Kɑncɑɑlɑɣɑ tʋ nǝɣǝsǝnɑ kɛ́ ɩsɩɩ tɔɣɔlɑɣɑ, nɑɑlɛ nyǝŋ nɑ́ nǝɣǝsǝnɑ ɩsɩɩ nɑule, tooso nyǝŋ ɩsɛntɑɑ nɑ́ nǝɣǝsǝnɑ yʋlʋ. Pǝ yelɑ liɣiti nyǝŋ tɔ ɩ́lɛ́ ɩ nǝɣǝsǝnɑ kɛ́ ɩsɩɩ hɛkǝlɛ sɔsɔ kʋlʋɣʋʋ ɩsɔtɑɑ tɔɣɔ.

⁸Weesiŋ nyǝ́mɑ mpɛ pɑ liɣiti kɛ́ mpʋ tɔ pɑɑ pɑ tɑɑ wei ɩ wɛnɑ keŋ nɑɑtoso nɑɑtoso kɛ́, nɑ ɩsɛ wɑɑsɑ pɑɑ pɑ tɑɑ wei ɩ tɑɑ nɑ ɩ wɑɑlɩ tǝwisiwisi. Tɑm pɑ wɛ ḿpʋ́ɣʋ́ nɑ pɑ́ yooki yontu sɩ: Nɑŋŋ tʋ, nɑŋŋ tʋ nɑŋŋ tʋ ntɛ́ Tɑcɑɑ Ɩsɔ Tomɑ tǝnɑ tʋ. Ɩ kɑ́ wɛɛ, nɑ ɩ wɛɛ, nɑ ɩ kɑ́ kɔɔ.

⁹Weesiŋ nyǝ́mɑ liɣiti ɩnɩ ɩ kʋlǝɣɩ yontu yoou sɩ ɩ tɑlǝɣɩ nɑ ɩ́ sɑ nɑ ɩ́ sɛɛ wei ɩ cɑɣɑ kumte tɔɔ nɑ ɩ́ wɛ tɑm tɔɔ tɔ sɩ ɩ́ nɑ tǝmlɛ.

¹⁰Ɩlɛnɑ sɔsɑɑ hiu nɑ liɣiti ɩnɩ ɩ́ hǝntɩ wei ɩ́ cɑɣɑ ḿpʋ́ɣʋ́ kumte tɔɔ nɑ ɩ́ wɛ tɑm tɔɔ tɔ ɩ tɛɛ, nɑ pɑ́ sɛɛ-ɩ, nɑ pɑ́ kɔɔlɩ pɑ nteniŋ nɑ pɑ́ sɩɩ kumte ɩsɛntɑɑ. Nɑ pɑ tɔ sɩ:

¹¹Tɑcɑɑ nɑ tɑ́ Ɩsɔ, teeli nɑ sɑmtʋ nɑ tomɑ. Pʋwɛ, pǝ mʋnɑ-ŋ kɛ́. Pǝ tɑɣɑ pʋlʋ tɔɔ, nyɑ́ lɑpǝnɑ wontunɑɑ tǝnɑ tɔ se. Nɑ nyɑ́ nɔkǝnɑ nɑ pǝ́ wɛɛ nɑ pǝ́ hɑ-wǝɣɩ weesuɣu.