Kukulutu 13

1

2

3

4

5

6

7

8

9

10

11

12

13

14

15

16

17

18

19

20

21

22

¹Ḿpʋ́ɣʋ́ mɑ nɑ wontuɣu nɑkʋlɩ nɑ kʋ lɩɩkǝnɑ teŋku tɑɑ. Kʋ hǝŋ wɛ nɑɑnʋwɑ nɑ kʋ nyɔɔŋ kɛ nɑɑtosompɔɣɔlɑɣɑ. Nɑ nteniŋ temɑ pɑɑ kʋ hǝlʋɣʋ ŋku kʋ tɔɔ. Nɑ pǝ́ ŋmɑɑ kʋ nyɔɔŋ tɔɔ kɛ́ hǝtɛ nte tǝ tʋʋkɩ Ɩsɔ tɔ.

²Wontuɣu ŋku mɑ nɑ mpʋ tɔ kʋ nǝɣǝsǝnɑ kpou kɛ́, nɑ kʋ nɔɔhɛɛ nɑ́ nǝɣǝsǝnɑ wontuɣu ŋku pɑ yɑɑ sɩ wusi tɔ kʋ nyǝnɑ, kʋ nɔɣɔ ɩsɩɩ tɔɣɔlɑɣɑ nyǝŋkɑ. Ḿpʋ́ɣʋ́ tʋm sɔsɔ hɑ-kʋɣʋ ɩ tomɑ nɑ ɩ kɑwulɑɣɑ kumte nɑ ɩ pǝsʋɣʋ sɔsɔɔŋkʋ.

³Wontuɣu ŋkʋ kʋ nyɔɔŋ tɑɑ lɛŋkʋ cɑɣɑ kɛ́ ɩsɩɩ pɩɩ kʋ-kʋɣʋ ɩsɑɣɑkʋɣʋ. Amɑ timpi pɩɩ kʋ-kʋɣʋ ɩsɑɣɑkʋɣʋ kɛ mpʋ tɔ pǝ wɑɑwɑ. Ḿpʋ́ɣʋ́ ɑntulinyɑ tǝnɑ pʋɣʋlɑ wontuɣu ŋkʋ nɑ pɑ́ wɛ kʋ wɑɑlɩ.

⁴Tǝnɑɣɑ yǝlɑɑ tǝnɑ sʋʋ tʋm sɔsɔ kɛ sɛɛʋ kɛ ɩ hɑʋ ɩ pǝsʋɣʋ kɛ wontuɣu tɔ pǝ tɔɔ. Nɑ pɑ sɛɛkɑɣɑ wontuɣu tɔtɔ nɑ pɑ́ fɑɑlǝɣɩ sɩ: Wontuɣu kʋnɛ kʋ tɑkɑ wɛɛ kɛlɛ? N kɛ ɑwe nɑ nyɑ́ nɑ-kʋ ɩ́ sǝŋ nɑ ɩ́ yoo?

⁵Ḿpʋ́ɣʋ́ pǝ hɑ wontuɣu kɛ mpɑɑʋ nɑ kʋ́ yɔɣɔtɩ kɑlɑmpɑɑnɩ tɔm nɑ kʋ tʋʋ Ɩsɔ. Nɑ pǝ́ hɑ-kʋɣʋ pǝsʋɣʋ sɩ kʋ pɑɑsɩ nɑ kʋ́ lɑ́ ɩsɔtʋnɑɑ nɩɩlɛ nɑ nɑɑlɛ tɑɑ.

⁶Tǝnɑɣɑ kʋ sʋʋ Ɩsɔ kɛ́ footuɣu, nɑ kʋ yɑɑ ɩ hǝtɛ nɑ timpi ɩ wɛɛ tɔ nɑ pɑ tǝnɑ mpɑ pɑ wɛ ɩsɔtɑɑ tɔ nɑ kʋ tʋʋ.

⁷Nɑ pǝ́ hɑ-kʋɣʋ mpɑɑ sɩ kʋ yoonɑ Ɩsɔ yǝlɑɑ nɑ kʋ́ kǝlɩ-wɛ. Nɑ pǝ́ hɑ-kʋɣʋ pǝsʋɣʋ sɩ kʋ kpiliki kpekɑ tǝnɑ nɑ piitim tǝnɑ nɑ nsǝmɑ tǝnɑ yǝlɑɑ nɑ kɑteŋɑsɩ tǝnɑ yǝlɑɑ.

⁸Atɛ yǝlɑɑ tǝnɑ kɑ́ sɛɛnɑ-kʋ. Mpɑ pɑ hǝlɑ pɑ tɑ ŋmɑɑ Ɩwǝyɑɣɑ ŋkɑ pɑ kʋwɑ tɔ kɑ weesuɣu tɑkǝlɑɣɑ tɑɑ kɛ́ tuu ɑntulinyɑ kɑncɑɑlɑɣɑ tɔ mpɛ pɑɑ sɛɛnɑ-kʋ.

⁹Ye wei ɩ kɛ́ tɔm nɩɩlʋ pʋntʋ ɩ́ nɩɩ.

¹⁰Ye pǝ tʋ yʋlʋ wei kɛ́ hɑtuu ɩ tɑnɑŋ tɛɛ sɩ pɑɑ tǝkɩ-ɩ sɑlǝkɑ, ɩsɩɩ pɑ tǝkɑ-ɩ sɑlǝkɑ ɩnɩ, pɩɩ sɑɑlǝɣɩ. Nɑ ye pǝ tʋ wei ɩlɛɣɛ hɑtuu ɩ tɑnɑŋ tɛɛ sɩ pɑɑ kʋ-ɩ nɑ lɑɣɑtɛ, ɩsɩɩ pɑ kʋ-ɩ nɑ-tɛ, pɩɩ sɑɑlǝɣɩ. Pǝ tɔɔ kɛ́ Ɩsɔ yǝlɑɑ kɑ tɔkɩ suulu nɑ pɑ́ tʋ Ɩsɔ kɛ́ nɑɑni kɛ́ ḿpʋ́ɣʋ́ tɑm.

¹¹Ḿpʋ́ɣʋ́ mɑ nɑ́ wontuɣu lɛŋkʋ nɑ kʋ lɩɩnɑ tɛtʋ tɛɛ. Kʋ hǝŋ wɛ nɑɑlɛ nɑ ɩ́ nǝɣǝsǝnɑ ɩwǝyɑɣɑ hǝŋ, nɑ kʋ yɔɣɔtɑɣɑ ɩsɩɩ tʋm sɔsɔ.

¹²Kʋ lɑpǝnɑ kɑncɑɑlɑɣɑ wontuɣu pǝsʋɣʋ tǝnɑɣɑ kʋlɛ kʋ ɩsɛntɑɑ. Nɑ kʋ cɑɑlɑɣɑɑ tɛtʋ nɑ tǝ tɔɔ yǝlɑɑ sɩ pɑ́ sɛɛ kɑncɑɑlɑɣɑ wontuɣu ŋku pɩɩ kʋwɑ ɩsɑɣɑkʋɣʋ nɑ pǝ́ wɑɑ tɔ.

¹³Ḿpʋ́ɣʋ́ wontuɣu nɑɑlɛ nyǝŋkʋ kʋnɛ kʋ lɑpɑ piti tǝmɑ sɔsɔɔnɑ. Hɑlǝnɑ kʋ lɑkɑɣɑ nɑ kɔkɔ lɩɩkǝnɑ ɩsɔtɑɑ nɑ kɑ́ tiiki ɑtɛɣɛ yǝlɑɑ tǝnɑ ɩsɛntɑɑ.

¹⁴Pǝ hɑ-kʋɣʋ mpɑɑʋ sɩ kʋ́ lɑ piti tǝmɑ nnɑɣɑ kɑncɑɑlɑɣɑ wontuɣu ɩsɛntɑɑ tɔ, kʋ tolisɑ ɑtɛ yǝlɑɑ kɛ́ nɑ-yɛ. Kʋ heelɑɣɑ ɑtɛ yǝlɑɑ sɩ pɑ́ lu wontuɣu ŋku lɑɣɑtɛ hikɑɑ nɑ pɑɑ nɑ mpʋ kʋ wɛnɑ kʋ weesuɣu tɔ kʋ lɛɛsʋɣʋ.

¹⁵Ɩlɛnɑ pǝ́ hɑ́ wontuɣu nɑɑlɛ nyǝŋkʋ ŋkʋɣʋ pǝsʋɣʋ sɩ kʋ woso weesuɣu feesiŋ kɛ kɑncɑɑlɑɣɑ wontuɣu lɛɛsʋɣʋ tɔɔ, nɑ lɛɛsʋɣʋ ŋkʋ kʋ yɔɣɔtǝɣɩ, nɑ kʋ́ pǝsɩ nɑ kʋ́ kʋ́ pɑ tǝnɑ mpɑ pɑɑ sɛɛkɩ-kʋ tɔ.

¹⁶Ḿpʋ́ɣʋ́ wontuɣu ŋkʋ kʋ cɑɑlɑ yǝlɑɑ tǝnɑ tǝpɑɩ, piyɑ nɑ sɔsɑɑ nɑ ɑpilɑ nɑ kʋnyɔntʋnɑɑ nɑ yomɑɑ nɑ kɑsɑɣɑmpiyɑ, sɩ pɑɑ yʋsɩ pɑɑ wei ɩ niŋ ntɔɣɔŋ tɑɑ nɑ ɩ tokuɣu tɑɑ.

¹⁷Ye pɑ tɑ yʋsɩ wei kɛ́ kʋyʋsʋm pǝnɛ, pʋntʋ ɩɩ pǝsǝɣɩ nɑ ɩ́ yɑ yɑɑ ɩ́ pɛɛtɩ pʋlʋ. Kʋyʋsʋm mpǝɣǝlɛ wontuɣu ŋkʋ kʋ hǝtɛ, yɑɑ kʋkɑlǝtʋ nti tǝ hʋ́lǝ́ɣɩ́ sɩ kʋ hǝtɛ tɔ.

¹⁸Lǝmɑɣɑsɛɛ tǝhʋllɛ ntɛ́ cǝnɛ. Ye wei ɩ wɛnɑ lɑɣɑtʋ pʋntʋ pǝsǝɣɩ nɑ ɩ́ cɛkǝnɑ wontuɣu ŋkʋ kʋ kʋkɑlǝtʋ, pǝ tɑɣɑ pʋlʋ tɔɔ, kʋkɑlǝtʋ ntɩ tǝ lɩɩ yʋlʋ hǝtɛ kɛ́. Kʋkɑlǝtʋ ntǝɣǝlɛ nɑsǝtoso nɑ nɩɩtoso nɑ nɑɑtoso (666).