Johane 1:2-41

²E hâcne fuŋnao Anutuhec jurâ juwarewec.

³Erâ Micdâŋ e Anuture me wâc ehuc wiac sasawa bâfua‐fârewec, â wiac fuawec i e tâmiric moc mi fuawec.

⁴Erâ juju irec rune erâ juwec. Â juju‐ticnezi ŋic tamae‐jarewec.

⁵Eme tatamaczi dapâcko tamaeme dapâczi guriŋkeocte eipiewec.

⁶Ŋic moc fuarâ juwec ʒâŋene Johane.

⁷Eki tatamacte biŋedâŋ mufuame ŋic mâmâc sasawa jaŋe tatamac rune manasiŋkeniŋte Anutuzi sorewec.

⁸Johane e jahacne tatamac rune mi juwec, e mâc tatamac runere biŋe muwec.

⁹Tatamac rune ŋic mâreŋ sâc batamaec‐jopaekac, eki hâcne dameŋ ira mâreŋko fuarâ juwec.

¹⁰E mâreŋko fufua i fuawec, erâ i sawa mâcne, mâreŋ i ekizia wâc bâfuawec, eme waharâ fuame mâreŋkonec ŋic jaŋe e sifu mi ʒâŋitambiŋ.

¹¹E jahacne me hofao fisihame gurufâc‐ticne jaŋe âgo mi ecnembiŋ.

¹²Â âgo ecnembiŋ jaŋe ine Anuture naru motecfâc eniŋte hata bâfua‐jarewec, i ʒâŋe‐ticne mana maŋ eeŋgopieŋ jaŋe hâcne iŋuc ejareekac.

¹³Jaŋe soc biucte hatao mi fuambiŋ, erâ ŋic mumupaŋte wâc mâcne, jaŋe Anuturaonec fuambiŋ.

¹⁴Eme Micdâŋ e sahac biuchec fuarâ ŋondeŋ‐nâŋecko ŋeŋe juju ewec. Eme nâŋe Wofuŋ qâreŋ‐ticne honepene Mamacte Ŋokâ jâmbâŋ mocjaha ere Wofuŋ qâreŋ ewec hâcne. E aki anonoc kadahe â dâŋ fâri qizecne bawahawec.

¹⁵Fuŋne‐ticne ine Johanezi mutaniŋkerâ hahaŋne bahuc kecʒiŋuc muwec: “No ere hâcne ŋazapo, ʒâhec warekac e bâbâni juwec, eki no mi fuahape juwarehuc juwec hâcne.”

¹⁶Nâŋe sasawa ere rowaŋkonec miti kadahe rorâ ro ehuc jumbeŋ.

¹⁷Mose e sâcmutâc dâŋ nârewec, â Jesu Kristo eki ine aki anonoc â dâŋ fâri qizecne tahac‐nâpowec.

¹⁸Anutu e ŋic moczi moc mi honewec, Ŋokâ jâmbâŋ mocjaha, Mamacte bufuŋko juekaczi ine biŋe‐ticne bawaharâ mufua‐nârewec.

¹⁹Jerusalem haeonec Judaŋic jaŋe taha bapa â taha ufuŋte kiŋaŋŋic sorec‐jopapie Johanerao rarâ, go mo ŋic mo, muhuc wiocnepie fuŋne‐ticne jazawec.

²⁰E fuŋne‐ticne mi hesoŋkehuc mutaniŋkerâ kecʒiŋuc jazawec: “No Kristo aricne.”

²¹Mume jaŋe harierâ wiocnembiŋ, “Eme go mo, go Elia me?” Eme muwec, “No e aricne.” Eme mumbiŋ, “Go porofete‐nâŋec me?” Mupie muwec, “Aricne.”

²²Eme jaŋe mumbiŋ: “Wiac go mo? Sorec‐nâpopie warembeneŋ, ra weniŋuc jazanaŋmu? Go gahacnere weniŋuc muekic?”

²³Eme jazarâ muwec: “Porofete Jesajazi mu qâreŋ ewec, i norao sanaŋkekac. No biŋe mumu ŋic, mâreŋ tuhuo juhuc kecʒiŋuc muekopac: ‘Wofuŋte hata bâʒâweniŋ.’”

²⁴Ŋic Johanerao fisimbiŋ i jaŋe farisaio jaŋere guruonec.

²⁵Irec mocwâc indiŋkerâ mumbiŋ: “Go Kristo aricne, â Elia aricne, â porofete aricne, eme wemocte ŋic Miti Opâ rua‐jareekic?”

²⁶Mupie Johanezi ʒiŋuc jazawec: “Noni ŋic opâ sawa rua‐jareekopac, â ŋondeŋ‐ŋeŋicko moc fuawec jukac, ŋoŋe e mi hone taraeŋgopieŋ,

²⁷eki hâcne râpefuŋ‐naneo warehuc jukac, e sâko no iŋucne maczi mafahe decnepe mi sâckeocmu.”

²⁸Wiac i Betania haeo Jordaŋ ocniŋucnao fuawec. Ira hâcne Johanezi juhuc ŋic Miti Opâ rua‐jarewec.

²⁹Hae fureme Jesuzi Johanerao rame taicko honerâ ŋic ʒiŋuc jazawec: “Honeniŋ, kecocni Anuture lama, eki mâreŋ sâc ŋic sâqocne‐jeŋic fainao feme âsickekac.

³⁰Ere hâcne kecʒiŋuc ŋazapo: ‘Ʒâhec warekac, e bâbâni juwec, eki no mi fuahape juwarewec.’

³¹No nahac mârâc e mi hone tarapo. Israe ŋic ŋoŋe biŋe‐ticne ŋazape mananiŋte hâcne fisirâ Miti Opâ fuŋkepo.”

³²Johane e iŋuc murâ muwec: “No Mârozi hapâ hawario sambâŋkonec waharâ fai‐ticnao herâ ŋeme honepo.

³³No nahac mârâc mi hone tarahape Miti Opâre munareweczi ʒiŋuc nazawec: ‘Mâro waharâ fai‐ticnao herâ ŋeme honecmu eki ŋic Tiri Mâro rua‐jareocmu.’

³⁴No i hâcne honepore fuŋne‐ticne kecʒiŋuc mupo: ‘Eki hâcne Anuture Ŋokâ.’”

³⁵Hae fureme Johane erâ motecfâcne jaŋeraonec jajahec mâreŋ ijaha domambiŋ.

³⁶Domahapie Jesu e ijaha fotâcneme honerâ motec jasarâ muwec: “Honenic, Anuture lama kecocni.”

³⁷Mume jahe dâŋ i manarâ Jesure râpefuŋko rapic.

³⁸Rapire Jesuzi forisierâ honec‐jofarâ muwec: “Ŋohe wemocte warekopirec?” Eme jahe mupic: “Rabi (nâŋâcne dâŋko: Qaqazu), go fic wena jukomec?”

³⁹Eme ʒiŋuc jasawec: “Ware honenic.” Mume jahe bâjâperâ fic honerâ ʒoaŋ gie bapa ira juweckoa jupic. I ʒoaŋ otewezo eha iŋuc epic.

⁴⁰Johanere dâŋ manarâ Jesu bâjâpepic moc ʒâŋene Anderea, Simoŋ Petoro ɋaticne.

⁴¹Eme eki biac hahac‐ticne Simoŋ bâfuarâ ʒiŋuc âzâcnewec: “Nâhe Mesia (Kristo hâcne) bâfuakoperec.”