Jon 1:2-41

²Vô buc mugên ilage i dô hɨxôn Anutu,

³dɨ Anutu nêl dɨ xomxo tyo tung susu vɨhati, dɨ susu ti o lam môp bangwe lêm. Nge, xomxo tyo tung susu vɨhati.

⁴Dɨ ici va ge mavɨha kehe, dɨ mavɨha wê i vông ge linac vô xomxo mɨ he dô vac xêseac.

⁵Xêseac wê i vông ge linac vac mapɨtoc, dɨ mapɨtoc o tɨyi wê ob hɨvun xêseac tige xôn ge lêm.

⁶Anutu vông xomxo ti lam lê nêbê Jon.

⁷Jon lam nêl xêseac kehe kɨtong vô xomxo ên nêb he vɨhati i ngô kɨyang wê i nêl ge dɨ vông i vin.

⁸Ici va ge o xêseac tyo lêm. Nge, lam ên nêb ob nêl xêseac tige kɨtong vô xomxo.

⁹Xêseac tige lop mɨ lam kɨbun ga, dɨ i xêseac nôn wê ob linac lec xomxo vɨhati ge.

¹⁰Ici va tung susu kɨbun ga dɨ ici va lam dô kɨbun, lêc xomxo kɨbun ga, he o xovô i lêm.

¹¹La vac ben vɨgwe kehe lê, lêc lie o kô i lec nivɨha lêm.

¹²Lêc xomxo wê kô i lec nivɨha dɨ vông i vin ge, od vông he tu Anutu nue.

¹³Môp wê he tu Anutu nue ge o tɨyi xocbê môp wê xomxo kɨbun ga kô nue ge lêm, dɨ kehe o yêp vac xovôên wê xomxo vông ge lêm. Nge, Anutu vaci vông he tu i nue.

¹⁴Kɨyang lam tu xomxo gê kɨbun ga dɨ i dô vac xe mahɨgun, om xe xê xêseac wê i vông ge. Xêseac tige Anutu vông vô nu tuc tibed, dɨ xêyaa vin lecên yuu kɨyang nôn hɨvun i xôn.

¹⁵Jon nêl xomxo tige kɨtong dɨ keac vya levac ên nêbê, “Xomxo tyo tiga, wê a nêl kɨyang lec ilage ên a nêbê xomxo ngwe wê ob val tɨmuên ge luu a vêl, ên buc wê a gên ma ge, xomxo tiga dô tax.”

¹⁶Ici va tu vɨzid vɨyang vɨyang ge kehe om vông vɨzid tɨbeac vô il luu vêl.

¹⁷Ilage Anutu nêl xolac vô Moses mɨ i nêl vô xomxo, lêc xêyaa vin lecên hɨxôn kɨyang nôn, Yesu Kɨlisi vaci kô mɨ lam.

¹⁸Xomxo ti o yê Anutu lec manôn lêm. Nu tuc tibed wê dô hɨxôn Ma Anutu ge wê lam nêl Anutu kehe kɨtong vô il.

¹⁹Yuda levac wê dô Jelusalem ge vông xomxo wê mi si daa gee hɨxôn xomxo Livai ya la vô Jon dɨ he la kɨnêg vô i ên nêbê, “Ông ge letya?”

²⁰Om Jon nêl i kehe kɨtong yêp seac vô he dɨ o yax vun lêm, om nêl i kɨtong ên nêbê i o Kɨlisi ti wê he dô bin ge lêm.

²¹Om he kɨnêg ên nêbê, “Om ông letya? Ông tɨyi xocbê plopet Ilaija, me?” Lêc Jon nêl vô he ên nêbê, “A o Ilaija lêm.” Om he kɨnêg nang ên nêbê, “Ông ge plopet ti wê xe mi dô bin ge, me?” Lêc Jon nêl ên nêbê, “A o plopet tige lêm.”

²²Om he kɨnêg tii vac ên nêbê, “Ông ge letya? Xe obêc mɨlax nêl kɨyang tibêna vô xomxo wê vông xe lam ge? Om ông nêl ông kehe kɨtong vô xe.”

²³Om Jon nêl vô he tɨyi xocbê kɨyang wê plopet Aisaia kɨvuu ilage bêga nêbê, “A ga xomxo ti wê tyuc vya levac vac vɨgwe mahɨgun pɨleva ên nêbê, ‘Xam viac Apumtau môp wê ob lam vac ge i yêp nivɨha.’”

²⁴Xomxo tigee, tɨbii Palisi vông he lam,

²⁵mêd he kɨnêg vô Jon ên nêbê, “Ông nêl ên ông nêbê ông o Kɨlisi lêm, dɨ nêl ên ông nêbê ông o Ilaija lêm, dɨ nêl ên ông nêbê ông o plopet tige lêm, lêc bêna lêc ông lipac xomxo ya mia?”

²⁶Om Jon nêl ên nêbê, “A lipac xomxo ya mia pɨleva, dɨ xomxo ti val le vac xam mahɨgun lêc xam o xovô lêm.

²⁷A lam tax dɨ xomxo tige obêc val tɨmuên, lêc a o nigvɨha tɨyi wê aob pɨwelac yihi vêl ên su wê i vông ge lêm.”

²⁸Jon nêl kɨyang tige gê Betani wê yêp mia Jodan kehe vɨlu ganê. Vɨgwe tige wê Jon mi lipac xomxo vac ge.

²⁹Tɨtige Jon yê wê Yesu val ge om nêl ên nêbê, “Xam wê lê, ge bwoc sipsip nu wê Anutu vông i lam kɨbun ên nêb i lam yib dɨ kɨtya xomxo nên nipaên vêl ge.

³⁰Ge xomxo wê a nêl kɨyang lec ilage ên a nêbê, ‘A lam tax dɨ xomxo ti wê ob val tɨmuên ge luu a vêl, ên buc wê a gên ma ge, xomxo tige dô tax.’

³¹A gên o xê xomxo tige lêm, lêc a lam lipac xomxo ya mia, ên a nêb a ob nêl xomxo tige kɨtong vô xomxo Islel.”

³²Nang dêc Jon nêl kɨtong bêga ên nêbê, “A xê wê Myakɨlôhô Ngɨbua lam gê kɨsii ganê tɨyi xocbê menac tucluu dɨ lam yêp lec Yesu kɨsii.

³³A gên o xovô i lêm, lêc Anutu wê vông a lam lipac xomxo ya mia ge nêl vô a tax ên nêbê, ‘Ông obêc wê Myakɨlôhô Ngɨbua lop mɨ lam dô lec xomxo ti ge od ông xovô bê xomxo tige wê ob lipac xomxo ya Myakɨlôhô Ngɨbua.’

³⁴A xê wê kɨyang tige vô nôn lec ge om a nêl kɨtong bê xomxo tige, Anutu nu.”

³⁵Vɨgwe vɨdiiên tɨtige Jon le hɨxôn i nue ngɨvihi yuu,

³⁶lêc yê wê Yesu val ge, om nêl ên nêbê, “Wê lê, ge bwoc sipsip nu wê Anutu vông ge.”

³⁷Nu ngɨvihi yuu ge ngô wê Jon nêl ge om la tɨmu vô Yesu mɨ he la.

³⁸Mêd Yesu pɨlepac i dɨ yê wê yuu la vô i vɨxa ge om kɨnêg vô yuu ên nêbê, “Muu lam ên vatya?” Lêc yuu nêl ên nêbê, “Labai, ông dô vac xumac tina?” Labai ge, kehe bêga nêbê xolac kehe.

³⁹Om Yesu nêl vô yuu ên nêbê, “Muu lam wê lê.” Om yuu la hɨxôn Yesu mɨ la yê xumac wê Yesu yêp vac ge. Ge hɨyôv manôn yuudɨyuu wê hucên ge om yuu dô hɨxôn Yesu dɨ vɨgwe buc.

⁴⁰Xomxo yuu wê ngô Jon vya dɨ la hɨxôn Yesu ge, ngwe Andlu wê Saimon Pita li ge,

⁴¹om Andlu la vô li Saimon dɨ nêl vô ên nêbê, “Xe xê Mesaia.” Mesaia ge, lê ngwe nêbê Kɨlisi dɨ kehe bêga nêbê xomxo ti wê Anutu vông i lam ge.