SAN JUAN 1:2-41

²Are mé jehe ovehe ngain Dios.

³Co de ixin jehe mé, Dios joinchechjian cainxin cosa; ẍonhi cosa que jí que jeha Dios joinchechjian de ixin jehe mé.

⁴Co jehe mé tti danjo vida, co are chojni ditticaon ngain jehe mé, vida jihi inchin joadingasán para ixin cain chojni.

⁵Co joadingasán jihi jinchengasán ngain tti jí naxin xehe, co tti naxin xehe ttixinha ncheganga jehe joadingasán mé.

⁶Co Dios coinchiehe ná xí que vinhi Juan.

⁷Co xí mé vehe xa ná testigo para nichja xa de ixin jehe joadingasán mé para que cain chojni rroguitticaon na de ixin jehe tti nichja xí mé.

⁸Juan jeha jehe tti joadingasán, jehe jeho ná testigo que joí para nichja ndoa de ixin joadingasán mé.

⁹Tti mero joadingasán que nchengasenhe cain chojni, ojittí ngataha nontte ngain tiempo mé.

¹⁰Co jehe Xenhe Dios, tti dinhi Palabra que Dios nichja, vehe ngataha nontte, co masqui jehe joinchechjian nontte, chojni ngataha nontte joatsoanha na jehe.

¹¹Jehe joí ngain nacioen pero chojni de nacioen vayeha na.

¹²Pero ixinha mé, icanxin chojni vayé na jehe co vitticaon na. Co ngain chojni jihi jehe joanjo joachaxin de dinhi na xenhe Dios.

¹³Co jehe na jeha inchin xenhe ná ndodaha de ngataha nontte nttihi que doan inchin cain chojni, co jeha ixin ná xí joinao ná nc̈hí, o ixin ná xí joinao concjihi xenhe; jehe na jeha jamé na, jehe na mero xenhe Dios ixin Dios ndac̈ho jañá.

¹⁴Co jehe Xenhe Dios, tti dinhi Palabra que Dios nichja, conchjian ná xí co vehe ngayá na, co jehe anto rinao cainxin chojni, co jehe chonxin cainxin tti ndoa. Co janha na vicon na tti joachaxin que jehe chonda ixin jehe tti nacoaxinxon Xenhe Ndodá na que ttjen ngajni.

¹⁵Juan nichja jian de ixin jehe xí mé, co ndac̈ho: ―Xí jihi tti janha vandac̈hjan are ndac̈hjan que jehe tti tsí después de janha, mé tti icha importante que janha ixin ovehe icha saho que janha.

¹⁶Jehe chonda cainxin tti jian co cain ján na dayé na tti jian mé cada nchanho ixin jehe nttanchaon na.

¹⁷Tti ley de Dios vayé na de ixin Moisés, pero tti rinao na cain chojni co tti ndoa, cayoi mé ttixin de ngain Jesucristo.

¹⁸ẍonhi tiempo ná chojni vicon Dios. Pero tti nacoaxinxon Xenhe Dios que jí ngain jehe chonxin Xan jian ngain jehe, co Xan mé Xan jointtagatsoan na de ixin Dios.

¹⁹Chojni judío que vinttechonda joachaxin ngain Jerusalén rroanha na canxion dána co canxion xí que vinttechonda xa ẍa ngain nihngo icha importante. Rroanha na chojni mé ngain Juan, tti vancheguitte chojni, para joanchianguihi na ixin quensen jehe.

²⁰Co jehe ndac̈ho claro: ―Janha jeha Cristo na tti Dios rroanha.

²¹Cottimeja cjan na joanchianguihi na: ―¿Quensen jaha remé? ¿Ajaha tti profeté Dios dinhi Elías? Co Juan ndac̈ho: ―Nahi, jeha janha. Cottimeja joanchianguihi na: ―¿Queẍén remé? ¿Ajaha tti profeté Dios que Moisés ndac̈ho que tsí? Co Juan ndac̈ho: ―Nahi.

²²Cottimeja ndache na: ―¿Quensen jaha remé? Ixin chonda na que rrondattjan na tti chojni que rroanha na nttihi tti rrondac̈ho jaha. ¿Quehe rrondachjenji ni ra ixin quensen jaha remé?

²³Juan ndac̈ho: ―Profeta Isaías nichja de ixin janha are jehe ndac̈ho que tsinhi ra tté ná chojni que toyaoxin de ngagaha jna que rrondac̈ho: “Danttjehe ra ná nttiha nao para ixin jehe tti chonda cain joachaxin.”

²⁴Co chojni mé xifariseo rroanha na para joanchianguihi na Juan cain mé.

²⁵Co jehe na ndac̈ho na ngain: ―Mexinxin, si jeha jaha tti Cristo que Dios rrorroanha, ni jeha Elías, ni jeha tti profeté Dios, ¿quedonda ncheguitte chojni?

²⁶Juan ndac̈ho: ―Janha nttaguitte chojni conixin jinda, pero de ngayá ján na ẍo judío na jí ná chojni que chonxinha ra.

²⁷Chojni mé tsí después de janha masqui jehe icha importante que janha. Co janha jiquininxinha na ni siquiera tsonxindangá corrié catté.

²⁸Cain jihi conhe ngain tti lugar que dinhi Betábara, que jí lado c̈hinxin nchanho de río Jordán, tti vancheguittexin Juan chojni.

²⁹Ndoexin Juan vicon Jesús jitonchienhe ngain jehe, co Juan ndac̈ho: ―Tsjenxin ra, xí jihi inchin tti coleco que ẍanjo para ngain Dios ixin jehe xa sanjo xa cuerpoe xa inchin ná coleco para tsjenga xa hna cain cosa jianha que nchehe chojni ngataha nontte.

³⁰Janha nichja de ixin jehe xa are ndac̈hjan: “Después de janha, tsí iná xí co jehe xa icha importante xa que janha ixin ovehe xa icha saho que janha.”

³¹Janha mismo venonaha quexehe xí mé, pero janha joihi para jointtaguitte chojni conixin jinda para que chojni judío satsoan na jehe xí jihi.

³²Cai ndac̈ho Juan: ―Janha vicon Espíritu Santo xincanjinxin de ngajni inchin ná conttoanajni, co vittohe ngataha jehe xí jihi.

³³Hasta ngain nchanho mé, janha ẍa venonaha quensen jehe xa, pero Dios, tti coetonna para jointtaguitte chojni conixin jinda, jehe ndachjenji na: “Are sicon Espíritu Santo rroxincanji co sittohe ngataha ná xí, xí mé tti sincheguittexin chojni conixin Espíritu Santo.”

³⁴Janha ovicon xí mé, co janha ná testigo na de ixin jehe xí mé que jehe xa ndoa tti Xenhe Dios.

³⁵Ndoexin nttiha vehe Juan iná conixin yó xí que vacao.

³⁶Co are vicon Juan vatto Jesús, ndac̈ho Juan: ―Tsjenxin ra, yá tti inchin coleco que ẍanjo para ngain Dios.

³⁷Tti yó xí que vacao Juan coinhi xa tti ndac̈ho, co sarroé xa Jesús.

³⁸Cottimeja Jesús tsjehe tti joixin, co vicon ixin terroé cayoi xí mé, co ndac̈ho ngain xa: ―¿Quehe tettjé ra? Jehe xa vinttendac̈ho xa: ―Maestro, ¿quettinó rrihi?

³⁹Jesús ndac̈ho: ―Ẍacoi ra sitsjehe ra. Cottimeja vinttecji cayoi xí mé para vintteguicon xa quettinó vehe Jesús co ngoixin rato mé nttiha tavintte xa ngain Jesús hasta ndajoexin nchanho mé ixin hora mé cjoi inchin nó hora tsocjin.

⁴⁰Ná de jehe tti yó xí que vinttequinhi tti ndac̈ho Juan co sarroé xa Jesús, ná de jehe xa vinhi xa Andrés, co mé cjoi xanchó Simón Pedro.

⁴¹Andrés iẍonhi chonhe, jehe sacjoi joicjé Simón, xanchó jehe Andrés, co ndac̈ho ngain Simón: ―Vittja na tti Mesías. Co Mesías rroc̈ho Cristo tti Dios rroanha.