Juan 1:2-41

²Lee diiz naban ree ndoʼa kon Diox desde ndala.

³Ne por diiz naban mdexkwaa reta kwaa, ne os nagte por diiz naban neeka thib re kuu nzo nal gatexkwaate.

⁴Lee diiz naban ree nak yalnaban, ne lee yalnaban nak xni lo re men yezlyu.

⁵Lee xni ree ndaa xni lo yalkow, ne lee yalkow gagt tuyye.

⁶Ngoo thib mbyi kuu le Juan, Diox mtaal Juan,

⁷tsa myaad Juan par mndaa Juan kwent chaan xni, tsa yelaaz re men zha kuu nak xni por lee Juan.

⁸Nagt Juan xni, per lee Juan nak thib zha kuu mtaal Diox mndaa kwent chaan xni.

⁹Tsa lee xni kuu wlipaa nak xni kuu nteni lo re men, ndyaad lo yezlyu ree.

¹⁰Lee zha kuu nak diiz naban myaad lo yezlyu ree, ne tegal por lee zha mdexkwaa Diox yezlyu ree; per lee re men yezlyu ree mlebeet zha zha.

¹¹Lee zha myaad por re tawlaz zha, per lee re tawlaz zha mkayaat zha zha.

¹²Per lee re zha kuu mkayaa zha ne ngwalaaz zha, mndaa zha diiz lo re zhaʼa, par gak re zhaʼa zhiinn Diox.

¹³Lee re zha ree nak zha zhiinn Diox, tak tata nlaaz Diox, ne nagte tak nlaaz xut zhay o xnaa zhay.

¹⁴Lee diiz naban ngok men, mban zha ne ngoo zha xid re nee, mwii nee yalnkelaaz chaan zha ne mne nee wli kuu nzhab zha. Ne noga mwii nee yalnabee chaan zha kuu mndaa Xut zha lo zha; ne yalnabee ree mloo beeta lee zha nak Xgann Diox.

¹⁵Juan mndaa kwent chaan zha, leettsa nzhab Juan: ―Zha ree nak zha kuu mtethʼn lo goo leettsa mnin: “Lee zha kuu ndyaad tut bluz nake na, mas nataak zhaʼa nake na, tak nzoʼa zhaʼa desde ndala leettsa terka galʼn”.

¹⁶Ne retalee nkayaaʼaa yalwen lo zha, thibe ne tedibe nkayaaʼaa.

¹⁷Moisés nak cho mndaa ley chaan Diox lo re men, per lee yalnkelaaz chaan Diox ne kuu wli myaad por Jesucrist.

¹⁸Neeka thib men ter wii Diox, beeta Xgann Diox kuu thita lo Diox, kuu thibka ndo lo Diox mwii lo Diox, ne lee Xgann Diox nak cho mloo naa xa nak Diox.

¹⁹Leettsa lee re zha Israel zha Jerusalén, mtaal re ngwleyy ne re zha kuu ntsow ayud re ngwleyy ngwanaabdiz lo Juan, naa cho nak Juan.

²⁰Tsa lee Juan mkab lo re zha, ne nzhab Juan: ―Nagtʼn Crist Kuu Mtaal Diox Nabee.

²¹Tsa lee re zha mre mnaabdiz lo Juan, ne nzhab: ―¿Cho naka tsa? ¿Chu lu nak Lí, profet kuu ngoo ndala? Juan mkab ne nzhab: ―Nagte na. Tsa mre re zha nzhab: ―¿Chu lu nak tedib re profet kuu ngoo ndala, kuu naka diiz yaad? Lee Juan mkab ne nzhab: ―Nagte na.

²²Tsa mre re zha mnaabdiz zha: ―¿Cho naka tsa? Tak ndoblo gab nee thib kwaa lo re zha kuu mtaal nee. ¿Chu tak neʼa lo nee naa cho naka?

²³Juan mkab ne nzhab: ―Na, nak taxal thib bos kuu nii thib ta yubiz, taxal nzhab profet Isaí zha ndala, or kuu nzhab zha: ¡Bxaal goo thib net nali par te Zha Nabee! Is. 40:3

²⁴Tsa lee re zha kuu mtaal re fariseo lo Juan, mre mnaabdiz lo Juan,

²⁵ne nzhab: ―Os leeʼa nagta Crist Kuu Mtaal Diox Nabee, neeka nagta Lí, ne neeka nagta thib re profet, ¿chebee ntsowleyya re men tsa?

²⁶Juan mkab, ne nzhab: ―Na ntsowleyy re men kon nit, per xid goo ndo thib zha kuu nlebeet goo,

²⁷lee zha ndyaad tut bluz nake na, per masraa nataak zha nake na, ne kona neeka korre dits labyid zha ndoblotʼn xakʼn.

²⁸Ne reta koree ngok thib ta le Betania, tedib lad roo yoo Jordán, ta mtsowleyy Juan re men.

²⁹Ne lee tedib wiza mwii Juan lee Jesús ndyaad lo Juan, tsa nzhab Juan: ―¡Wii goo, zha ree nak Mbak zhiil Diox, kuu nkib falt chaan re men yezlyu ree!

³⁰Zha ree nak zha kuu mndan kwent lo goo or kuu mnin: “Tut bluz nake na ndyaad thib zha kuu mas nataak nake na, tak nzoʼa zha desde ndala leettsa terka galʼn”.

³¹Tegal mlebeetʼn zha, per mtsowleyyʼn re men kon nit, par lebee re zha Israel zha.

³²Ne noga mndaa Juan kwent ne nzhab Juan: ―Mwiin lee Mbi Nayon mroo lobee taxal thib palom mla dits zha.

³³Ne lee na netʼn cho nak zha tsya. Per lee zha kuu mtaalʼn tsowleyyʼn re men kon nit, ne lon: “Loka zha kuu wiiʼa la Mbi Nayon dits ne yaan Mbi Nayon lo, zhaʼa nak zha kuu tsowleyy kon Mbi Nayon”.

³⁴Ne na mwiiy, ta mod ndan kwent lo re men, lee zha nak Xgann Diox.

³⁵Ne lee tedib wiza, leeka tya ndo Juan kon chop zha kuu ngeteed lo Juan.

³⁶Or mwii Juan lee Jesús nderid tya, tsa nzhab Juan: ―¡Wii goo, zha baa nak, Mbak zhiil Diox!

³⁷Ne mbin rop zha kuu ngeteed lo Juan kuu nzhab Juan, tsa mndeke rop zha dits Jesús.

³⁸Or mtsere lo Jesús lee rop zhaʼa ndeke dits Jesús, tsa mnaabdiz Jesús lo rop zha, ne nzhab Jesús: ―¿Kwan nkwaan goo? Lee rop zha mkab ne nzhab: ―Maestr, ¿pa nzoʼa?

³⁹Jesús mkab ne nzhab lo rop zha: ―De goo, tsa ne gooy. Tsa ngwa rop zha, ne mwii zha pa nzo Jesús, ne myaanka rop zha kon Jesús wiza, tak ndaʼa or, ora nzhak teeka las cuatro wiza.

⁴⁰Ne lee Ndres wets Simún Pey, nak thib zha lo rop zha kuu mbin kuu nzhab Juan, ne mndeke zha dits Jesús.

⁴¹Ne or mzal Ndres wets Ndres kuu le Simún, tsa nzhab Ndres lo Simún: ―Mwiiʼa nee Zha Kuu Mtaal Diox Nabee (zha le Crist).