Jon 1:2-41

²Gariya bun ĩ Negur ado dibodon.

³Ĩ bunem ereb ereb ganan inon, Od anĩ sã bun ereb inodin taka to ibodok.

⁴Mata ĩ bun ibodon, mata anĩ tamo neid fula fiya.

⁵Fula fiya anĩ gugum bun lalan ifenek, anĩ ere, gugum ĩ fula fiya anĩ to kelein.

⁶Tamo taka Negurem sur fe di, isin, ĩ yana Jon.

⁷Ĩ fula fiya anĩ yaor fe, kurõ fesiyouf nigin isin, are tamo kayau ganan ĩ bunem momoi douf nigin age fen.

⁸Ĩ anĩ fula fiya sã, ĩ fula fiya anĩ kurõ fesiyouf nigin isin.

⁹Fula fiya bagai yogo tamo kayau ganan lalan ifenẽdif, ĩ tenebur isin.

¹⁰Ĩ teneub bun ibodon, are ĩ bunem teneub inon, anĩ ere, tamo kayau tenebur ein, ĩ to kelein.

¹¹Ĩ yogon bagai anidi bun isin, anĩ ere, yogon bagai anidi ĩ to daleyen.

¹²Anĩ ere, idi ĩ daleyen, ĩ yana nigin momoi den anidi bun, Negur idi Negur nẽ gere tar wowã douf nigin igirnẽdin.

¹³Sina tama nẽ naud bunem to Negur gere tar wowã den, bouwa nẽ oroya bunem sã, tamo nẽ wau irõya buneg sã, anĩ ere, Negur yogo age fe di, wowã den.

¹⁴Od anĩ tamo wõ ye fen, ada atun ibodon. Ada yogon fula fiya medeĩya tailen, fula fiya medeĩya are Naal Tekelei Yogo Dogol nẽ, ĩ Tama bun tamal wau ifenẽya ado momoi barikã isin.

¹⁵Jon ĩ nigin kurõ falaisi wogõ yen. Ĩ iweig fen, iron, “Ĩ enei nigin aya arokenein, ‘Taka ĩ aya dumeun isif, ĩ aya wal fiyaya, ere nigin, ĩ ket ibodon.’”

¹⁶In wau ifenẽya barikã bunem, ada adok el fiya tale fen, anĩ teten el fiya musei talen.

¹⁷Are Moses bunem lo anĩ talen, anĩ ere, wau ifenẽya ado momoi anĩ, Jesus Kristus bunem isin.

¹⁸Taka nem Negur to bagai ilen, anĩ ere, Negur Naal Tekelei Yogo Dogol, ĩ Tama wagen ibod ken, ĩ nigin yaor fen.

¹⁹Juda tamo Jerusalem temeleid idim, pris tunĩ, Lewi nẽ ibor geid sur difedi di, Jon ĩ aim yeya anĩ to difiyẽ di, Jon ĩ eig ye kurõ fesin.

²⁰Ĩ wa fiya sã, kurõ falaisi, “Aya Kristus sã,” yen.

²¹Idi ĩ to difiyen, “Age fiyauf are, õ ai? Õ Eliya de?” Ĩ iron, “Aya ĩ sã.” Idi diron, “Õ Profet amã tari mafef anim de?” Ĩ iron, “Sã.”

²²Age ye di, idi diron, “Õ ai bagai? Õ amã urokanamã len, idi amã sur difaman anidi gein ke ma malauf. Õ ogo nigin ere wof?”

²³Jon profet Asaia nẽ od bun solof iron, “Aya anĩ, ait taka gerere tuan iweig irok, ‘Odug nẽ naab madur gouf.’”

²⁴Farisia tamo tunĩ sur difedin anidim

²⁵to difiyen, “Õ Kristus sãf, Eliya sãf, Profet anĩ sãf are, ere nigin naan ugunẽdif?”

²⁶Jon aitedin yale iron, “Aya naan nem naan agunẽdif, anĩ ere, ã atun, taka ã keleĩ sã anĩ ifaref.

²⁷Ĩ anĩ aya dumeun dõ fiyaf, aya to biya nigin, in ye su nẽ malũ biru fediya kisi feleya sã.”

²⁸Enei ganan Betani oun Jordan naan sitakã, Jon naan igunẽdin nẽ an wõ yen.

²⁹Naa taka di, Jon, Jesus wagen iyok isi mog, ile fen, iron, “Ulegef, Negur nẽ Sipsip Naal, ĩ tamo ganan neid mosor yaleledif!

³⁰Enei nigin au fen, oron, ‘Taka ĩ aya dumeun isif, ĩ aya wal fiyaya, ere nigin, ĩ ket ibodon.’

³¹Aya yug ĩ keleĩ san, anĩ ere, aya asi, naan nem naan agunẽdif nẽ gariya are, Israel tamo kayau bun ĩ yaor fouf nigin.”

³²Age ye fen, Jon enei kurõ feis iron, “Aya, Awa Uur saa ilun tamal kuburir gen isi, ĩ bun ibod mog, ailen.

³³Aya ĩ to kelein, anĩ ere, taka ĩ, aya naan nem naan agunẽdiyouf nigin sur fiyan im irokanan, ‘Tamo anĩ, Awa Uur isi, ĩ bun ibod mog, ulouf, im Awa Uur Fateul nem naan igunẽdiyouf.’

³⁴Aya ailen nigin kurõ afeis, ‘Eĩ Negur Naal,’ auf.”

³⁵Naa taka di, Jon, in dõ fiya tar uru geid, baban an difaren.

³⁶Ĩ, Jesus isi ile di, ile fen, ĩ iron, “Ulegef, Negur nẽ Sipsip Naal!”

³⁷Sain Jon nẽ dõ fiya tar uru enei karĩ de fen, idi Jesus dõ difiyen.

³⁸Jesus falei yel, idi ĩ dõ difiyẽ mog, ile fen, to fedin, “Ã ere oroyeik?” Idi diron, “Rabi (anĩ nẽ gariya, Tise), õ nain ubodõdig?”

³⁹Ĩ iron, “Umag fen, ulogouf.” Age ye di, idi dile, ĩ ibodõdig anĩ dile fen, naa anĩ bun, ĩ geid dibodon. Are aragau fo kilok age fiya.

⁴⁰Endru, Simon Pita ne tura ĩ, idi uruwom ereb Jon wogõ yen anĩ karĩ de fen, Jesus dõ difiyen anĩ taka.

⁴¹Ereb uruwa Endru age fen are, ĩ tura Simon imir ile fen, irokenen, “Amã Mesia (anĩ Kristus) fotou mafen.”