Ioane 1:2-41

²Ia ede huia bagubaguna eai wa Eaubada maena.

³Ginauri gamagaridi ia tauginauridi ede; ginauri gamagaridi se hetubudi iabom mo tauhetubudi ede.

⁴Mauri ia aloboeana eai; na mauri wa tatao edi mara ede.

⁵Marana ie sina masigiri boeana eai; masigirina mara wa i heasaasaei.

⁶Tau esau i laoma, Eaubada i hetamariama: ia esana ede Ioane.

⁷Ia i loama, tauribahemasarahana, marana wa i hemasaraha, ia arinai abo tatao gamagaridi se nuatudidini.

⁸Wau marana ia nige’e; i laoma mo bena marana i riba hemasaraha.

⁹Mara tahunuana i laolaoma ede, ia ede tatao gamagaridi tanoubu eai ta i hemaradi.

¹⁰Ia tanoubu eai ta ie mia; ia tanoubu tauginaurina ede; tanoubu hinage ia nige se nuatui.

¹¹Ia i laoma enanayao mamohoi aridi eai, enanayao mamohoi ia se otaotaei.

¹²Headi ia se awaabiei, arinai i hegigiboridi isi se hemala Eaubada nanatunayao; isi wa ia se sogohididini;

¹³isi osina eai nige se hetubudi, hinage buluma dobilana eai nige’e; hinage tau nuana eai nige’e; Eaubada iabom i hetubudi.

¹⁴Riba wa abo i hemala buluma, maeda ta miaesega, (ena lolo ai itayao doha Tamana natueseesegana ena lolo), ainauia, eo riba mamohoina i monau.

¹⁵Ioane ia i ribahemasaraha, i eogayoga, i ene, “Ia ede nei lahinae ea ribaei wa, ‘Esau murigu eai i laoma, ia abo i bagubagunaegu: ia taubagunaegu mamohoina ede.’”

¹⁶Ia nuana gigibori i monau, arinai ai gamagarimai enamai ai abi, i ainauia to i ainauia.

¹⁷Mose laugagaeo i ledima: na ainauia eo riba mamohoina Iesu Keriso i ledima.

¹⁸Nige sora huia esau tau esau Eaubada ie ita; Natueseesegana Tamana nuapouna eai ie mia, ia mo i hemasaraha.

¹⁹Ioane ena riba ede ina, Iudea tataodi Ierusalema eai, kohena eo Levi tataodi headi se hetamaridi ia arinai, se hesio, si ene, “Oa ede eai?”

²⁰Ia abo i ribahemasaraha, nige i harere: i ribamasaraha mo, “Eau ta nige Keriso.”

²¹Se oimuri arinai, si ene, “Oa ede saha? Oa Elia ede?” I ene “Nige’e.” “Oa peroveta wa?” I ene “Nige’e.”

²²Abo se ribalau ia arinai, si ene, “Oa ede eai? tauhetamarimai se hesio wa abo ai lau ai heribadi. Oa edoha u ribaeuioim?”

²³I ene, “Eau esau arinana barabara eai i eogayoga, ‘Guiau ena eda au hedudurai,’ doha Isaia peroveta i ribaei.”

²⁴Tauhetamaridi wa, isi ede Parisea peledi.

²⁵Isi se hesiolau ia arinai, si ene, “U ene oa nige Keriso, oa nige Elia, oa nige peroveta esau, ue saha u hebahebapatiso?”

²⁶Ioane i heribadi i ene, “Eau goila eai ea hebapatiso: esau boeamiu eai i totoro omi nige au ita.

²⁷Ia ede teina wa murigu eai i laoma, eau nige ea lolo ia aena umna mainana ea eairi.”

²⁸Ina ginauri ta se tubutubu Betania eai, Ioridana hari tehana eai, Ioane ena aba hebahebapatiso.

²⁹Mara‐ie‐tom Ioane Iesu i italaei i laoma ia hesabana, i ene, “Au ita, Eaubada ena Arenio tanoubu edi baaea i abihaidi.

³⁰Ia ede lahinae ea ribaei wa, ea ene, ‘Esau murigu eai i laoma, ia i bagunaegu, ia taubagunaegu mamohoina ede.’

³¹Eau hinage ia nige ea ita: egu nuatu mo Isaraela eai abo i taumasaraha, paana ede ea laoma ta, goila eai ea hebahebapatiso.”

³²Ioane i wasawasaei, i ene, “Eau Earua ea iita galewa eai i dobidobima doha bunebune, i mia ia potana eai.

³³Ia nige ea nuatui: goila eai ea hebapatisoi ta tauhetamariguma i heribagu i ene, ‘Ena Earua u ita i dobima, i taru tau esau potana eai, ia ede Earua Tabuna arinai abo i hebahebapatiso.’

³⁴Ea itayao, eo ea ribahemasaraha, teina ia Eaubada Natuna ede.”

³⁵Mara‐ie‐tom abo hinage Ioane eo ena heaheata labui maena se totoro.

³⁶I itaitalau Iesu i laulau, i ene, “Au ita, Eaubada ena Arenio!”

³⁷Heaheata labui wa ena riba se ataiei, Iesu se hemuriwatai.

³⁸Iesu abo i torobui, i itadi se hemuriwataiyama, ie ribalau isi aridi eai i ene, “Saha au eooi?” Si ene, “Rabi e, (heaheasonina ede doha si ene, Tauheata e), haedi ue mia?”

³⁹I ribalau isi aridi eai, i ene, “Au laoma au ita.” Se lau ena aba mia se ita, nei asubenana ne maedi se mia: paana mahana hesaudoudoina eai.

⁴⁰Wau taudi labui wa Ioane ena riba se ataiei, eo ia se hemuriwatai wa, esau Anederea, Simona Petero ena tau.

⁴¹Ia ena tau mamohoi Simona i lobai bagunai, i ribalau ia arinai i ene, “Mesia ai lobaiyao” (heaheasonina ede Keriso).