Yoohanee 1:2-41

²Óosana ároonakina mi-ufáfara foora Yísufa Ánutuna faqa márufa márinau.

³Mi-ufánannai Yísunannai aiqáma ainaina kambíqaqoofanoo máridanoo. Sía moo áinaina sía minánnai kambíqanau. Aiqáma ainaina miná Yísunannai kai kambíqanau.

⁴Aiqáma kambíqoo ainaina miná Yísunasaaqaraa márirana maraséenoo dóo máridanoo. Mi-mariráfa maa-maqánasaaqaraa fasiqa ánaasee naundurái qóomara foora aurau rímarifa máridanoo.

⁵Mi-aurau riráfa asukunakí qáidanoo. Mi-aurau rira qoomána asukuna fannoo sía amana qumáree rafáaqa fúannoo.

⁶Ánutufa qumeé dadaaqufanoo maqásaa fasiqa moo námmari nímimaru Yoohaneefa kambíqafufanoo Ánutufa qiní saikáki fúannee qufanoo narí saikáki ani márinau.

⁷Yoohaneefa kooroo írafa animárinau. Mi-qoomána Yísunara kooroo írara áninau. Aiqáma fasiqa ánaasee miná ufa irisée Yísunara kúqaa ánoonee qiaqéera áninau.

⁸Mifá Yoohaneefa sía mi-qoomáfau márinau. Káqi mi-qoománara kooroo íanifeera animárinau.

⁹Ánutuna ufa fannoo Yísufa ánoona aurau rirafa márinau. Mi-aurau riráfa faiqí aiqámausa naunduráki qéemarufa máridanoo maqásaa faiqi ánaaqi kámmafinoo maa-maqa maaqánaki qúminau.

¹⁰Mifá maa-maqa maaqánaki ani márinau. Ánutufa mi-ufána Yísunannai maa-maqa maaqánakinaa fasiqa ánaasee áuqu quqásoofanoo misáki akooqóo qumu márufaqa sía minára íriqau.

¹¹Mifá narí áuqu maqa maaqanaki aniroofaqa miná máqannaasa minakí máriasa miná maréeqee áqusee minnísaqau.

¹²Akaqáusa asasammásee maróosa Ánutuna ufa Yísufa misára ínnee Ánutuna faiqi kámambi máriaqee qíra ufa níminau. Minára kúqaa Ánutunee qímasee naundurá ámimarusa miná faiqi kámambi máriaqee qíra úfa níminau.

¹³Ánutuna faiqi miqímariasa kambíqafi máriasa sía maa-maqa maaqánaki máriasakiqari kambíqaqau. Sía faiqí faiqi ímaríandeefau máfi kambíqaqau. Sía faiqí nári íriranannaifau Ánutuna faiqi kámmafi kambíqaqau. Ánutuna íriranannai kai kambíqafufaqa miná faiqi námukiqau.

¹⁴Mi-ufáfa Ánutuna ánoona ufa Yísufa faiqí faiqi kámambinoo maasáki qumu márinau. Qumumárufaqa miná áfeeka eeraarirana maasá miná faiqi námu kúqaa qáfaqau. Mifá narí ákoona ámaaku moodáa márunara narí ákoonasáaqaraa áfeeka eeraarirana faqa káqi áfaarirana faqa kúqaa ánoona úfa qírana faqa maraséenoo qumbiqánoo máruna qáfaqau.

¹⁵Yoohaneefa nammári nímimarufa minára Yísunara kooroo inau. Mifá maaqí qímasee faiqí ánaasee qímanniminoo qinau. Óoqai qinée qímannimiqia. Moó fannoo qiní qínaaqianna ániannoo. Qinée kambíqaafannaqoo mifá óoqai máriufa márifaqa qiní úriqarara fee qíafanafa maaná Yísufa mifá máridanoo. Yoohaneefa miqí qímaseenoo minára qímanniminau.

¹⁶Yísufa maaqóo qumu máridanoo narísaaqaraa ámiqi ámiqirana ámuaaqa ámuaaqa moómoo maasá aiqámausa qímufaqa máreemariqiafana.

¹⁷Ánutufa Mooseenannái narí sándufa narí amusúfa maasá qíminau. Ásauku mundírana Yísunannai narí káqi asasamándee nímirufa faqa kúqaa ánoona ufa qírana faqa maasá qíminau.

¹⁸Sía moó fannoo Ánutuna qáfee marúfa márinau. Narí ámaaku moodáa narí ákoona ámuqusa uqanna mifá kai narí ákoona faqa márida qáfamaseenoo maa-maqánasaa maasá qímannimirara qúminau.

¹⁹Yoohaneefa Yísunara kooroo qu úfafa maaqímasee animárinau. Yuda máqannaasa amaana máqa aanáiqikirausa faqa amaana máqaki dapi saika máree marúsa misára Reefina áiku ásauku fee qímarusa misá faqa Yeerusareenni suqúfufaqa ufa qímaseeqa faiqí akaqáusa nifeeqásee niqiqoofaqa Yoohaneenara irárara óoqufiqau. Yoohaneefa nammári nímimarufunnai Yooradanna námmarinni óoqureeqa maaqí qímasee iraqau. Óo Yoohanee, Ánutuna tamummáqara fasiqauqa kambíqaaninna tamummaqara fasiqanara ákara rúmaqoofa anée maaná mifée yáfee.

²⁰Yoohaneefa misá ufa iriséenoo sía káqi úfa qinau akooqóo kooroo qímasee qímanniminau. Qinée sía ásauku mundírausau máridau.

²¹Misá minára iriséeqa kafáa iraqau. Anée Eeriaafée máridanee. Maasá qímaqimia. Miqí qufanoo Yoohaneefa qinau sía qinée misáu. Miqí qufaqa misá iraqau. Anée mi-tamummaqara fasiqánara ákara rúmaqoo fee máridanee. Miqí qufanoo Yoohaneefa sía fee qinau.

²²Sía fee qímasoofaqa misá quándaki qiqau. Maasá niqiqaasá nána ufa fee aníara qímannimianauree. Anée yáfee. Anée aneennára náqi fee qídanee.

²³Yoohaneefa misá ufa iriséenoo maaqí qímaseenoo qímanniminau. Ánutuna tamummáqara fasiqa Eesaiaafa óoqai maaqí qímasee qiníara ákara rinau. Qinée karaambáiqara namméera qímasee qímannimira fasiqausa máridaqa. Káasau máqa maaqakiqari maaqí qímasee namméeraqidaqa. Ínnee karaambáiqa ánianínna aanna andeeqáseeqa afisúaqa.

²⁴Yeerusareendari niqiqoosa misá Farisai ámaana ufa qímarusa misá miná iriséeqa kafáa irámmiriqau.

²⁵Óo Yoohanee, anée sía ásauku mundírafa máridana. Anée sía Eeriafa máridana sía anée mi-tamummaqara fasiqáfa máridana. Anée sía misá máridana náqi fee ídanee nammáriki kéeqannimaqaidanee.

²⁶Yoohaneefa misá ufa iriséenoo maaqí qímasee qímanniminau. Qinée nammáriki faiqí ánaasee kéeqannimaqaidaqa. Ínni qámbaanai moó fannoo máridanoo ínnee minára sía írimariafanoo.

²⁷Mifá qiní qínaaqíanna ánianínafa qiní úriqararafa máriannoo. Náqimasee fee qinée miná dadaaqianáuree. Qinée kúqaa óoreeqararausa uqanna máridaqa.

²⁸Yoohaneefa Yooradanna námmariki Beetani máqusai dínni afainni nammáriki kéeqannimaqéemarufaqa misá anirée miqí qímaseemma irée maríqau.

²⁹Iqáqoofanoo kanánaana Yísufa Yoohaneefunnai óoqu fímarufanoo Yoohaneefa qáfeenoo narí faqa márusa maaqí qímasee qímanniminoo qinau. Ínnee qáfaaqa maa-fasiqáfa Ánutufa nífaueemari aandau ánaaqi narí qaindásaa kúquaninna aandaufa maasá aiqámausa maa-maqánasaaqaraasa mandáinaina minánnai maraqúqiseenoo Ánutufa dárira ufa ateekáqisaaninafa máridanoo.

³⁰Eendá qinée minára maaqí qúnafa maafá qinée sía máriafanna kamuqoo márunara qiní úriqararafa máridanoo qiní qínaaqíanna kambíqafi aniráannoo qúnafa maaná mifá máridanoo.

³¹Qinée minára sía írimariafanausa máridaqa. Isaraee máqannaa nífusaa kooroo qiaqéera nammári áuqamánnimaqaqa ánidaqa.

³²Yoohaneefa maaqí qímasee Yísunara qinau. Qinée Ánutuna maraquna qáfaunanoo mifá nakipurúnaikámambinoo innaarúnaindari qumuréenoo Yísunasaa quqéenoo.

³³Qinée qeeqá kai ásauku mundíranara sía amana mifée qianáura. Maa-saikánara diqiqoofa Ánutufa maaqí qímasee qímaqiminau. Anée faiqí moó qáfainanoo qiní maraquna fannoo akooqóo minásaa mundúfinnanara minára faiqí ánaasee qiní náaquqara maraqunannái rúmannimaqáanina fee qinnáranoo.

³⁴Maafá Ánutufa rusandeesámu másee mároofa narí ámaaku uqanna máridanoo. Qinée qeeqá qífunnai qáfeeqa ínni kooroománnimaqaidaqa.

³⁵Kanánaana iqáqoofanoo Yoohaneefa nammári áfainni narí ufa írimaru fasiqa qandá faqa márufanoo Yísufa áiqaránau.

³⁶Áiqa̱róofanoo Yoohaneefa ámiqi mándee aiquqummáseenoo qinau. Ínnee maaná qáfaaqa Ánutuna aandáu̱ ánaaqiara foora qaindásaa maasára kúquaninafa áiqaqaidanoo.

³⁷Yoohaneena ufa írimarúqanda mi-ufána irisée Yísuna dóo áfaqee fiqau.

³⁸Áfaqee fímarufanoo Yísufa quandáfi níndafeenoo qinau. Ínneeqara nánaree qiní qífáqee ánidee qufaqa miqandá qiqau. Ufasáa rakísira anée yái fee máridanee.

³⁹Yísufa iriséenoo qímanniminau dóo anirée qáfaaqa qufaqa miqandá miná faqa óonu miná máaqa qáfamasee eenáanianna óonu qáfamaseeqa miná faqa káqi kaaqóo máriqau.

⁴⁰Mi-fasiqaqandá Yísuna máaqa óonu qáfamasee miná faqa máruqanda miqandákiqari moó fannoo Andurufa márinau. Mifá Simoona moo áuqu Peetooroona ákaqa márinau.

⁴¹Andurufa naráfasaana Simoona moo áuqu Peetooroona káqi káqi paqúrimaseenoo qímaminoo qinau. Maasá Ánutuna ásauku mundíra fasiqa kambíqaannoo fee qímaqoofa dóo maasá paqúriqa qímaseenoo miná áfiqammaree Yísufinnai finau.