John 1:2-41

²Fo God mek de wol, de Wod been dey wid God.

³Shru dat Wod, God mek ebryting. Ain nottin een de whole wol wa God mek dat been done dout de Wod.

⁴De Wod, e de one wa all life come fom. An dis life yah de life wa da mek all people see de light.

⁵De light da shine een de daak, an de daak ain neba been able fa pit out dat light.

⁶God sen one man fa come eenta de wol, an dat man name been John.

⁷E come fa tell people bout de light, so dat ebrybody kin bleebe wen dey yeh wa e say.

⁸John esef ain been de light. E jes come fa tell people bout de light.

⁹De light wa e taak bout, dat de true light wa come eenta de wol an da shine pon ebrybody.

¹⁰So den de Wod been dey een de wol, an shru um God mek all ting een de wol. Stillyet, de people een de wol ain been know who e been.

¹¹E come ta e own place, bot e own people ain wahn hab nottin fa do wid um.

¹²Stillyet, some bleebe pon um. Ta all dem, e gim de right fa be chullun ob God.

¹³Dey ain git fa be chullun ob God same way like people een de wol hab chullun. Dey ain chullun ob God cause dat wa somebody wahn, needa cause some man wahn dat fa be. Bot God esef mek um come fa be e chullun.

¹⁴De Wod come fa be a man, an e lib mongst we fa a wile. We see de glory God gim, cause e de onliest Son ob de Fada God. An e gii we all de blessin ob God an mek we know wa true bout God.

¹⁵John beena tell people bout um. E holla say, “Dis de poson A beena tell oona bout wen A say, e gwine come wen A done done de wok wa God sen me fa do. Bot e great fa true, way mo den me, cause e done been dey fo A bon.”

¹⁶Cause e full op wid blessin fa we, e da bless we mo an mo.

¹⁷Moses bring we de Law, bot Jedus Christ de one wa bring we God blessin an mek we know wa true.

¹⁸Nobody ain neba see God. Bot God onliest Son, e one wid e Fada, an de Son mek people know who God da.

¹⁹De Jew leada dem een Jerusalem sen Jew priest an Levite ta John fa aks um say, “Who ya da?”

²⁰John ain back op one bit wid wa e say. E tell um plain an out een de open, say, “A ain de Messiah.”

²¹Wen John ansa um so, dey aks um say, “Den who ya da? Ya Elijah?” John ansa say, “No, A ain Elijah.” So dey aks um say, “Ya de Prophet wa we beena look fa?” John say, “No.”

²²So den dey say, “Well, tell we who ya da. De people wa sen we gwine aks we fa gim ansa. Wa ya kin tell we bout yasef?”

²³Wen John ansa um, e tell um wa de prophet Isaiah been say. John say, “A de one wa da holla een de wildaness say, ‘Mus mek de road scraight fa de Lawd pass by.’ ”

²⁴Den dem wa de Pharisee dem sen, dey come ta John.

²⁵Dey aks um say, “Ef ya ain de Messiah, an ya ain Elijah, an ya ain de Prophet, den hoccome ya da bactize people?”

²⁶John ansa say, “A da bactize people wid wata, bot dey one mongst oona dat oona ain know.

²⁷E gwine come wen A done done de wok wa God sen me fa do. A mesef ain fit eben fa loose e shoe.”

²⁸All dis happen een Bethany, pon de east side ob de Jerden Riba. Dat weh John beena bactize people.

²⁹De nex day John see Jedus da come ta um. An e say “Look yonda, de Lamb ob God da come fa tek way de sin ob people all oba de wol!

³⁰E de one A beena taak bout wen A say, ‘One man gwine come atta A done done de wok wa God sen me fa do. Dat man great fa true, way mo den me, cause e done been dey fo A bon!’

³¹A ain been know who dat poson gwine be, bot A come fa bactize people wid wata so dat de Israel people kin know who e da.”

³²Den John tell bout wa e been see. E say, “A see God Sperit come fom heaben like a dob an stay dey pon um.

³³A ain been know dat e de poson A beena wait fa, cep dat God wa sen me fa bactize people wid wata done tell me bout um. God say, ‘Ya gwine see de Sperit come down pon one poson an stay dey pon um. Dat de one wa gwine bactize people wid de Holy Sperit.’ ”

³⁴John tell um say, “A done see dis happen, an A da tell oona say, ‘Dis man, e de Son ob God.’ ”

³⁵De nex day John been dey gin wid e ciple dem een de same place weh e beena bactize people.

³⁶Wen John see Jedus waak by, e say, “Look yah! Dat de Lamb ob God!”

³⁷Wen John ciple dem yeh wa John say, dey gone folla Jedus.

³⁸Den Jedus ton roun an shim da folla um, an e aks um say, “Wa oona da look fa?” Dey aks um say, “Rabbi, weh ya da stay?” (Rabbi mean “Teacha.”)

³⁹Jedus ansa um say, “Oona come look!” So dey gone wid um an see weh e beena stay. Dat been bout fo o’clock een de ebenin, an dey stay wid um til night time.

⁴⁰One ob dem two people wa yeh wa John say an gone wid Jedus been name Andrew, de broda ob Simon Peter.

⁴¹Fus ting, Andrew gone an find e broda Simon, tell um say, “We done find de Messiah.” (Messiah mean “de Christ.”)