Ion 1:2-41

²Pala nganige, ka ina orume ke sane ke lele tale, nae i ke momo kala nge Nutu.

³Orume kinung keke lele nge Pangamologa laeala, ba ka sana otte lele balakala nge i.

⁴Mauling ka puna nge i, ba mauling laeala ke tunge olamana ta ragau kinung.

⁵Olamana laeala ka lamana nga osuguna, ba osuguna ka sana kana gingginga ta ulongpite.

⁶Na agau te a Nutu baꞌe ke atu ora giana nge Ion.

⁷I ke atu ta i a aturungpotakana ta turungpotange olamana laeala, ta baina ragau kinung nga loreapatokona kurumea pulingmalagangana ka pangamologa.

⁸I muni ka sana i a olamana laeala. Ke sa. I ke atu ta i turungpotange olamana laeala.

⁹Olamana a kaomannmannangana kia ore tunge olamana ta ragau kinung ke atu ta mogalo laekia e ngape.

¹⁰I ke momo nga mogalo laekia e ngape, ba oru re nga mogalo laekia keke lele nge i, ava re nga mogalo laekia ke sane ke kelapatokone.

¹¹I ke atu ta ragau rae i, ava ragau rae i ka sana loreangatakale.

¹²Ava ta ragau ra loreangatakale ba loreapatokona te i, ri keke rave Nutu patongana kerea ka goe rae i.

¹³Ava ka sana ri ra goe rae Nutu kurumea lelengareangana nga agau te, o kurumea agau lonangana o avale natale lonangana. Ke sa. Keke lele nge Nutu mana.

¹⁴Bae Pangamologa laeala ke lele i a agau, na ke momo ngaliua nge mangng. Ba mangng ka kele lamanangana e toakala. Ka i a Tamana goe kena mana ae i lamanangana. Ba ka i a lama ora lopengana ae Nutu a i tungumane ba pangamologa a kaomannmannangana keke ponu nge i.

¹⁵Ion ke role ka turungpotangana e ta Pangamologa laeala e lele i a agau, ba ke kiu roma, “Aekia ka i ae aelama a iau rorole te roma, ‘Agau e la atung ngarume nge iau ke ngailu nge iau, ta i ke momo pala nge iau.’”

¹⁶Ba lonana ae i ke ponutalao, minmina na ita kinung kaka rave lonana raumana muni.

¹⁷Ta ragau ravungareangana ka bangapagame ke lele kurumea Nutu tungngana ka bangapaga nginngina te Moses. Ava ragau ravungareangana ka lopengana ae Nutu a i tungumane ba ragau ravungareangana ka pangamologa a kaomannmannangana ke lele kurumea Nutu tungngana kae Iesus Karais.

¹⁸Ka sana agau te kele Nutu ka kae te, avae Nutu Tuna a i kena mana ore momo nge Tamana bavana ke papote Nutu.

¹⁹Na ka inae Iura re ngae Ierusalem ke baꞌe pirisme ba Livaime ta ri balinglage roma, “Ka one a tai?” nae Ion ke panane i muni.

²⁰I ke sane kauli ava ke turupota roma, “Ka sana iau ae Karais.”

²¹Na ri keke ballage roma, “Ava, ka one a tai? Ka one ae Ilaia?” Nae Ion ke role roma, “Ka sana iau ae Ilaia.” Ba keke ballage muni roma, “Ka one a agau e toe Nutu kaona a i role pala ta i bange?” Nae Ion ke ale balinglaga nga kanrea roma, “Ke sa.”

²²Na keke ballage muni roma, “Ka one a tai? Ngo turu te mangng nga baina mangng nga loagaliu ka pangamologa alangana ta reke ba mangng. Ko role mina ngaetai kone?”

²³Nae Ion ke ala rea ka pangamologa a Aisaia a i a agau e toe Nutu kaona paꞌe pala roma, “Ka iau a agau e kurkura kalingngana nga ina a sana ragau ngia roma, ‘Ngaka patupe pamau ae Avolau.’”

²⁴Ka baina Parisio palu ra ri ke ba rea

²⁵keke ballage roma, “Ngaroma sana one ae Karais, o Ilaia, o agau laeala e toe Nutu kaona, na ke meimia na one ko pamagoegoea ragau?”

²⁶Nae Ion ke ala rea roma, “Iau ka pamagoegoea ragau ka me, ava ka agau te ke momo ngaliua nge miau ora sana lomiaumatana kia.

²⁷I ka i a agau e atu ngarume nge iau, ba ka sana iau a agau e pe ta iau polange oalo nge nga kesingsilagi ngae i.”

²⁸Na oru nginngina keke lele ngae Betani nga Me Ae Ioran bavana tetoto, nga inaeala ae Ion pamagoegoea ragau ngia.

²⁹Me ngangaila, nae Ion ke kele Iesus ine tatu, na ke role roma, “Ngaka kele. Sipsip Goekia ae Nutu ore atu ta ravunglelepatali ka re nga mogalo laekia e ngape nga baingarea reke sosoali ikolong e tatu!

³⁰Aekia ka i a agau ama iau rorole te roma, ‘Agau e la atung ngarume nge iau ke ngailu nge iau, ta i ke momo pala nge iau.’

³¹Iau muni ka sana kelapatokone, ava iau ka atu ba ka pamagoegoea ragau ta baina ragau re ngae Israel nga loreamatana kia.”

³²Nae Ion ke role ka turungpotangana roma: “Iau ka kele Kannu Ae Nutu ke atupisigi nga tava ma i a manu a kulao ba ke mommo nge i.

³³Taroma i e ba iau ta pangamagoenge ragau ka me sane te role kau ka pangamologa pala, na iau ala sana ta kelapatokone. Ava i ke role kau pala roma, ‘Agau a one kele Kannu ae iau ine atupisigi be mommo nge i ka i a agau e la pangamagoenge ragau kae Kannu E Tupu.’

³⁴Ba iau ae Ion ka kele tapu, ba ka turupota roma, agau laeala ka i ae Nutu Tuna.”

³⁵Ka kae tetoto muni, nae Ion ke meisinsi kala nga barangalele lua ra kanna.

³⁶Na i ke kele Iesus ine tatao na ke role roma, “Ngaka kele. Sipsip Goekia ae Nutu iala e tatao.”

³⁷Na ka ina barangalele lua rae Ion kanna ke longe ine role minmina, na keke loakurumea Iesus.

³⁸Minmina nae Iesus ke kampiliu, na ke kela rea ineke tataokurumea, na ke ballaga rea roma, “Kaka meimia?” Na keke role roma, “Rabai” (a mirana roma Apangalomatanakana), “one ko mommo nga ine ngaetai?”

³⁹Nae Iesus ke ala rea roma, “Ka atu, na ngaka kele.” Minmina na ri keke loa ba keke kele ina i mommo ngia. Na keke momo kala nge i ka kae laeala. Ba kae ke pa basema kae matana a tangulelu ka sinro.

⁴⁰Nae Saimon Pita teiteikia ae Anru ka i a te nga pana lua nginngina reke longe Ion pangamologangana beke loakurumea Iesus.

⁴¹Ba oru e kapunu ta i kumangng kia, i ke loa ta kalingpa ka tataokia ae Saimon ba ta roleng kia roma, “Mangng ka kalipa ka agau a i ae Mesaia” (ora mirana roma Karais).