San Juan 1:2-41

²Ni lá Diidxqui agac rbeznény Dios chi guzulo gurixti guɨchliu.

³Irate de ni nuu, pur laany gucchuudeni. Xíteete quɨt xi nuuti ni quɨt guc pur laany.

⁴Ne laany napny guelnabány. Chiy guelnabányqui ná bieeny par irate bɨnguɨchliu.

⁵Ne bieenqui rzieenny xquelrieny de bniety ax más, más nacay xquelriendeb, per quɨt xo suti guelnacayqui lo bieeny xte Dios.

⁶Guu tuby bniety ni bdialá Juany. Laab ná ni bcuabee Dios

⁷par gucbɨ zec tuby testigu. Bedgüeeb diidx pur xpieeny Dios te par chalee chaldilaaz ira bnietny.

⁸Per gati lagacti Juany guc xpieeny Dios sino que laab beedtisbɨ par gudixteeb lo de bniety xa ná bieenqui.

⁹Te pur ni ná merpac bieenqui laany rzieenny xquelrieny ira bniety guɨchliu ne abeedny lo guɨchliu.

¹⁰Laany guzuguaany lo guɨchliu, ne masquɨ pur laany nuu guɨchliu, per de bniety guɨchliu quɨt nizigueldti niumbee laany zec ni ná par niumbeedebny.

¹¹Bdzɨnny lo guɨchliu lo naciony Israel ne masquɨ gucny bniety Israel, per de bniety Israel quɨt baantideb cuend xtiidxny.

¹²Per masquɨ ziy, irate de ni baany cuend laany ne güeldilaazdebny, bdeedny laadeb guelrnabee par gacdeb de lliin Dios.

¹³Ne masquɨ lliin bniety guɨchliu rac bniety o masquɨza pur xgab bniety o pur zéed gan gap bniety lliinni lo guɨchliuré, per gati pur ziyti a ná bniety lliin Dios sino que pur guelreldilaaz anádeb lliin Dios.

¹⁴Diidx ni gulezné Dios desdɨ gulo, laany gucny bniety. Gubánny lo guɨchliu cun dunnɨ, ne gati gullieezti ná guelrcaaz xtenny ax púrpac didxldí guniiny. (Dunnɨ gunán guelrnabee xtenny, guelrnabee ni cuáany pur laatisny nány Lliinpac Dios.)

¹⁵Chi bené Juany de bniety xtiidxny, laab guniib: —Jesúsreniy ná ni rzeeta chi guniia laat dec ni gueed después de nare laany mazru sacny que naa te pur agac gulal nuuny que nare.

¹⁶Pur laany iratecnɨ ardxapnɨ guelnabány zectispac laany, ne dxi pur dxi cayunldeeny quian.

¹⁷Pur Moisés bnɨɨdx Dios dunnɨ ley xtenny, per pur Jesucrist gucbeeldín xa ná guelrcaaz ne didxldí xtenny.

¹⁸Gady chúuti dxi iniá bniety Dios, quesoltisy tubyzi Lliinny ni rbezné laany abliuu dunnɨ xa ná Dios.

¹⁹Chiy desde Jerusalén de gurtisy xte de bniety Israel bxiaalddeb de bxoz cun de bɨny levitas par güenabdiidxdeb Juany tú náb. Chiyru bené Juany laadeb diidx.

²⁰Bziruub irairate lodeb raipbɨ laadeb: —Gati naretia naa Crist.

²¹Chiy gubíi gunabdiidxdeb laab: —¿Túza liú dxa? ¿Ta liúy Elías? Juany cuaibbɨ: —Gati naretiay. Chiyru raipdeb laab: —O, ¿ta liúy profet ni ná par gueed? Laab cuaibbɨ: —Gati naretiay.

²²Chiy raipdeb laab: —¿Túza liú, pɨs? Te pur ná par chonén rson lo de ni bxiaald dunnɨ. Gunii dunnɨ tú liú.

²³Chiyru raipy Juany laadeb: —Nare naa tuby ni rbɨxtia nez lo yiubiz rut quɨt tu rbezti: “Gulgaany tuby ldí nez par Xtadnɨ ni rnabee”, zec ni gunii profet Isaías desdɨ gulal.

²⁴Chiyru de bɨny ni bxiaald de fariseu par ininédeb Juany,

²⁵gunabdiidxdeb laab: —Belati gati liú noo Crist nicza Elías, nicza profet ni ná par gueed, ¿xizani rtiubnisu bniety pɨs?

²⁶Juany ax cuaibbɨ lodeb: —Nare rtiubnisa cun nis. Per lot nuu tuby bniety ni gady gumbeetit.

²⁷Ne laaniy ná par gueed después de nare, ax niclɨ lo xcurachny quɨt riáldti ixaicquia te pur mazru sacny que nare.

²⁸Irate de cosré guc nez rut lá Betábara, ni ná stuby lad ruu gueeu Jordán rut btiubnis Juany de bniety.

²⁹Chi bragueel stuby dxi, Juany gunáb dec zedzɨngax Jesús rut zuguaab, ax guniib: —Gulguiaa. Bnietreniy abcuabee Dios par gatyny zec tuby Corder pur de xtuld bniety guɨchliu.

³⁰Laaniy rzeeta chi guniia laat: “Después de nare gueed tuby bniety ni mazru sac que naa, te pur laany agac gulal nuuny que naa.”

³¹Ne niclɨ nare quɨt gucbeetia dec laaniy ná par gueedny, per nare zelda par catiubnisa de bniety cun nis par chalee gumbee de bniety Israel laany.

³²Ziyza raipy Juany laadeb: —Nare gunáa biat Spíritu Sant llayabaa zec tuby palom axtquɨ quiany.

³³Masquɨ quɨt rumbeetiany, per ni bxiaald nare par itiubnisa cun nis laany guniiny nare: “Chi inioo yiat Spíritu Sant axt quia tuby bniety, laaniy ná ni rtiubnisny bniety cun Spíritu Sant.”

³⁴Nare agunáany, ne nanldízaca dec laany nány Lliin Dios.

³⁵Chi bragueel stuby dxi deni zuguané Juany tiop de xpɨnbɨ,

³⁶chi gunáb zeteed Jesús, ax guniib: —Gulguiaa. Bnietreniy abcuabee Dios par gatyny zec tuby Corder.

³⁷Chi bindiag iropte de xpɨnbɨ ziy, ax guzanalddeb Jesús.

³⁸Deni bziecquilo Jesús, chi gunány zanalddeb laany, ax raipny laadeb: —¿Xi rguíilytɨ? Laadeb ax cuaibdeb: —Maistrɨ, ¿calí rbezbiu?

³⁹Chiyru raipy Jesús laadeb: —Gultaa te íguiaat. Chiyru güedeb par gunádeb calí rbezny, ax biannédebny dxiqui, te pur zecti rca tap gudxiy.

⁴⁰Tuby de xpɨny Juany ni güenald Jesús, pur ni bindiagbɨ ni gunii Juany, laab bdialáb Andrés bets Simóny Bed.

⁴¹Andrésqui nidonidoote betsbɨ Simóny güetíilybɨ ax raipbɨ laab: —Abdxialnɨ Mesías (zelo diidxqui, Crist).