Johannes 1:2-41

²Ewe Kapas a nom ren Kot seni me lepoputän.

³Kot a föri mettoch meinisin ren ewe Kapas, esap wor och lein förian kewe a för lükün i.

⁴Ewe Kapas i ewe popun manau, nge ei manau a uwato saram ngeni aramas meinisin.

⁵Ewe saram a tittin lon rochopwak, nge rochopwak esap tongeni akufu.

⁶Kot a tinala nöün chon künö, eman mwän itan Johannes.

⁷A feito pwe epwe asile ngeni aramas usun ewe saram, pwe meinisin repwe rong ewe pworaus o lükü.

⁸Püsin i esap ewe saram, nge a feito pwe epwe asile ngeni aramas usun ewe saram.

⁹Iei ewe saram mi let, a feito fanüfan o asarama aramas meinisin.

¹⁰A nom lon fanüfan o fanüfan a för ren, nge fanüfan esap silei i.

¹¹A tori fanüan, nge aramasan resap etiwa.

¹²Nge iö kana ra etiwa o lükü i a ngeniir manaman pwe repwe wiliti nöün Kot.

¹³Resap wiliti nöün Kot usun än eman uputiu ngeni saman, pun resap uputiu won tipen fituk are tipen mwän, nge püsin Kot a föri pwe ir nöün.

¹⁴Ewe Kapas a wiliti aramas o nonom lefilach. Sia nengeni an we ling, ewe ling Saman a ngeni, pun i Nöün Aleman, a uren ümöümöch me let.

¹⁵Iwe, Johannes a kapas usun i, a kökkö fän leüömong o apasa, “Iei i ätewe üa kapas usun lupwen üa üra, ‘I epwe feito müri, nge a lap seniei, pun a nom mwen ai üsamwo uputiu.’”

¹⁶Seni an ümöümöch mi somosomola sia angei feiöch esap ükütiu.

¹⁷Kot a ngenikich ekewe allük ren Moses, nge ümöümöch me let a torikich ren Jesus Kraist.

¹⁸Esap wor eman aramas a küna Kot fän eu. Nge Nöün Kot Aleman mi nom ren ewe Sam a fen pwäri ngeni aramas usun Kot.

¹⁹Iei usun mine Johannes a pwärätä lupwen ekewe nöüwisen chon Juta mi nom lon Jerusalem ra tinala ekoch souasor me ekoch chon ewe ainangen Lefi ren Johannes ar repwe aisini, “En iö?”

²⁰A pwärätä fän wenechar, nge esap tukumala, “Ngang sap Kraist.”

²¹Iwe, ir ra aisini, “Nge iö chök en? En Elias?” Johannes a pölüeni, “Apw, sap ngang Elias” Ra pwal aisini, “En ewe Soufos?” Johannes a pölüeni, “Apw.”

²²Mürin ra üreni, “Kopwe asile ngenikem ika en iö, pwe aipwe asile ngeni chokewe mi tinikeemito mine ka pölüeni ngenikem. Met ka apasa usun püsin en?”

²³Iwe, Johannes a pölüeniir lon mine ewe soufos Aisea a apasa, “Ngang möngüngün ewe eman mi kökkö fän leüömong lon ewe fanüapö: Oupwe awenechara alen ewe Samol.”

²⁴Mürin ekewe chon künö ekewe Farisi ra tiniirela

²⁵ra aisini Johannes, “Ika sap en Kraist ika Elias ika ewe Soufos, pwota chök ka föri angangen papatais?”

²⁶Johannes a pölüeni, “Ngang üa papataisi aramas ren koluk, nge eman a nom leimi, ämi ousap silei.

²⁷I ätewe mi feito müri, nge ngang üsap fen mwo nge fich ngeni ai üpwe apichi ririn ipwan sus.”

²⁸Ekei mettoch meinisin ra fis lon Petania ötiuen ewe chanpupu Jortan ia Johannes a föri ewe angangen papatais ie.

²⁹Iwe, sorotän ewe rän Johannes a küna pwe Jesus a feito ren, iwe, a apasa, “Iei i ewe Lamen Kot a uweela tipisin chon fanüfan.

³⁰Iei i ätewe üa fen kapas usun, lupwen üa apasa, ‘Eman mwän epwe feito müri, nge i a lap seniei, pun a nom mwen üsamwo uputiu.’

³¹Üsap mwo silei ika iö i, nge üa feito o papataisi aramas ren koluk pwe üpwe pwäri i ngeni chon Israel.”

³²Iwe, Johannes a pwärätä, “Ngang üa küna Ngünün Kot a feitiu seni läng lon lapalapen eman lisom o nonom won.

³³Püsin ngang üsap silei i, nge Kot ewe mi tiniei pwe üpwe papataisi aramas ren koluk, a üreniei, ‘Kopwe küna ewe Ngünün Kot epwe feito o nonom won eman mwän, i ätewe epwe papataisi aramas ren Ngünmifel.’

³⁴Ngang üa küna ei, üa pwal pwärätä pwe ätei Nöün Kot.”

³⁵Sorotän ewe rän Johannes me ruoman nöün kewe chon kaiö ra pwal ütä ikenan.

³⁶Nge lupwen Johannnes a küna Jesus pwe a fetaleto, a apasa, “Iei i ewe Lamen Kot!”

³⁷Iwe, lupwen ekewe ruoman chon kaiö ra rongorong mine a apasa, ra tapwela mürin Jesus.

³⁸Nge Jesus a sapsefäl o küna pwe ra tapwela mürin, iwe, a aisiniir, “Met oua kütta?” Ra pölüeni, “Ia ka nom ie, Rabbi?” (Wewen ei kapas Rabbi ‘Sense’)

³⁹Jesus a pölüeniir, “Oupwe feito o püsin nenengeni.” (Lon ena otun ina epwe kulok rüanü leolopal.) Iwe, ra eti Jesus o küna ia a nonom ie o ra nonom ren lon ewe ränin.

⁴⁰Eman me lein ekewe ruoman Andru pwin Simon Petrus.

⁴¹Andru a müttir küna pwiin we Simon o üreni, “Äm aia küna ewe Messaia.” (Wewen ei kapas Messaia ‘Kraist’.)