YOHANA. 1:2-41

²Songela haichanduso Mbuli kakala na Mulungu.

³Mulungu kavilumba vinhu vose kubitila heyo, haduhu kinhu chochose kilumbigwe na Mulungu bila heyo.

⁴Mbuli ija kakala iyo ichanduso cha ugima, na ugima uno uwo ugala mulangaza mwa wanhu wose.

⁵Mulangaza uno womulika mdiziza, na ziza hadidaha kuuhuma.

⁶Mulungu kamtuma munhu imwe yokemigwa Yohana,

⁷keza kamba msindila, giladi yalave usindila wa mulangaza uja, avo wanhu wose watogole kubitila heyo.

⁸Heyo mwenyego hakalile mulangaza, ila keza kamba msindila wa mulangaza.

⁹Uno uwo mulangaza wa kweli, uwamwemwesa wanhu wose, ukalile ukwiza muulumwengu.

¹⁰Heyo iyo mulangaza ukalile muulumwengu, avo Mulungu kaulumba ulumwengu mkubitila heyo, ila ulumwengu haumtangile.

¹¹Keza mwa wanhu zake mwenyego, ila wanhu zake mwenyego hawam'bokele.

¹²Ila wanhu wose wam'bokele na kumtogola, kawagwelela udaho wa kuwa wana wa Mulungu,

¹³awo watendigwe wawe wana wa Mulungu si sama ya mulopa ama sama ya manogelwa ga lukuli ama sama ya manogelwa ga munhu, ila sama ya manogelwa ga Mulungu.

¹⁴Mbuli kagaluka munhu, kakala hamoja na tweye. Tuyona yenzi yake, yenzi ya kamba mwana imwe iiyeka wa Tata, yamemile ngekewa na kweli.

¹⁵Yohana kazipeta mbuli zake Yesu. Kenula dizwi yolonga, “Ino iyo munhu inikalile nimulonga, avija vinilongile, ‘Kokwiza hachugu changu, ila heyo iyo mkulu kubanza nie, kwavija kipigiti nie sinavumbuka heyo kakala baho.’ ”

¹⁶Avija viyamemile ngekewa tweye tose tubokela motelo zose.

¹⁷Mulungu katugwelela Malagizo kubitila Musa, ila ngekewa na kweli viza kubitila Yesu Kilisto.

¹⁸Haduhu munhu yoyose yamonile Mulungu, ila Mwana yeiyeka, ayo yali hamgwazo wa Tata, iyo yamtendile Tata yatangigwe.

¹⁹Uno uwo usindila uyalavile Yohana kipigiti wakulu wa Wayahudi viwawatumile wakulu wa nhambiko na Walawi kulawa Yelusalemu wakamuuze, “Gweye iyo yalihi?”

²⁰Yohana kawedika kawalongela kinaganaga, “Nie sili Kilisto.”

²¹Wamuuza, “Kumbe gweye iyo yalihi? Gweye kwa Eliya?” Yohana kawalongela, “Nie sili Eliya.” Wamuuza, “Gweye kwa Muhokozi ija?” Kawalongela, “Nie sili Muhokozi ija.”

²²Wamulongela, “Basi tulongele gweye iyo yalihi? Giladi tukawalongele waja watutumile. Mzingelegeza zako gweye mwenyego koilongaze?”

²³Yohana kalonga, kuno yokwiga mbuli za Muhokozi Isaya, yolonga, “Nie dijo ‘Dizwi da munhu yoguta muluwala, Igoloseni nzila yondayabite Mndewa.’ ”

²⁴Waja iwasenga, watumigwe na Mafalisayo,

²⁵wamuuza Yohana, “Kamba gweye huli Kilisto ama Eliya ama Muhokozi ija, habali ubatiza?”

²⁶Yohana kawalongela, “Nie nobatiza na mazi, ila mmwanza wenu mweye mwimile aho kema munhu hamumtangile.

²⁷Ayo yondayeze hachugu changu, nie silumba hata kudohola nzabi za ng'hwabasa zake.”

²⁸Mbuli zino zose zilawilila mkiwambo cha Betania ng'ambu ya ulawilo wa zua ya Lwanda lwa Yolodani, aho Yohana hayakalile yobatiza.

²⁹Zua da ikabili Yohana kamona Yesu yokwiza, kalonga, “Lola! Mwana Ng'hondolo wa Mulungu yosola vilozo va ulumwengu!

³⁰Ino iyo munhu inikalile nimulonga, ‘Kokwiza munhu hachugu changu, yali mkulu kubanza nie, kwavija kakala baho kipigiti nie sinavumbuka.’

³¹Nie mwenyego simtangile kamba heyo iyo Kilisto, ila nie niza kubatiza na mazi sama ya kilamso kino, siku kogubuligwa mwa wanhu wa Islaeli.”

³²Na Yohana kalava usindila uno, yolonga, “Nimona Loho wa Mulungu yohumuluka kulawa kuulanga kamba hua na kukala uchana yake.

³³Nie sambinimtange, ila ayo yandagize nie kubatiza na mazi, kanongela, ‘Uhamona Loho wa Mulungu yohumuluka na kukala uchana ya munhu, iyo, iyo munhu yondayabatize na Loho wa Mulungu.’

³⁴Na nie nigona gano, na nilava usindila kamba, ino iyo Mwana wa Mulungu.”

³⁵Zua da ikabili Yohana kakala yemile kabili bahaja na wanahina zake wabili,

³⁶viyamuwene Yesu yobita behi na hewo, kalonga, “Loleni! Mwana Ng'hondolo wa Mulungu.”

³⁷Waja iwanahina wabili viwamuhulike yolonga gano, wamkweleleza Yesu.

³⁸Yesu viyahinduke kawona womkweleleza, kawauza, “Mozahila choni?” Wamuuza, “Labi, kwahi kuukala?” “Labi,” nhegulo yake “Mkulufunzi.”

³⁹Yesu kawalongela, “Izoni mulole.” Avo wachola wahone haja hayakalile yokala, na wakala na heyo zua dija jose. Ikala kamba saa longo dimwe ichungulo.

⁴⁰Imwe wa wanahina waja wabili yamuhulike Yohana yolonga na kumkweleleza Yesu kakala Endelea mkulu wake Simoni Petulo.

⁴¹Kinhu cha ichanduso kiyatendile Endelea kikala kumzahila ndugu yake Simoni na kumulongela, “Tumona Masihi.” Mbuli ino nhegulo yake iyo, “Kilisto.”