Joaŋ 1:2-41

²Anôtô kêkêŋ undambê to nom atomgeŋ naŋ Biŋ tau gêmoa jagêwiŋ Anôtôgeŋ.

³Anôtô kêkêŋ gêŋ samob ŋa eŋgeŋ. Eŋ kêkêŋ gêŋ teŋ ŋa eŋ masi nec atom.

⁴Mateŋ jali ŋam gêc Biŋ tau ma mateŋ jali tau tonaŋ kêtu ŋamalacnêŋ ŋawê.

⁵Ŋawê tau tec mêŋkêpô ŋakesec, mago ŋakesec gêjam auc atom.

⁶Anôtô kêsakiŋ ŋamalac teŋ, nê ŋaê Joaŋ.

⁷Eŋ gêmêŋ gebe êwa Biŋ sa, gebe êwa ŋawê tau ŋam sa, gebe ŋamalac samob sêŋô ênê biŋ ma sêkêŋ êwiŋ.

⁸Ŋac tau tonaŋ ŋawê tau eŋ atom, gêmêŋ gebe êwa ŋawê ŋam sageŋ.

⁹Ŋawê ŋanô tau tonec mêŋkêsêp nom e kêpô ŋamalac samob.

¹⁰Eŋ gêmoa nom ma Anôtô kêkêŋ nom ŋa eŋ, mago lau nomŋa sêjala eŋ atom.

¹¹Eŋ gêmêŋ tau nê gamêŋ, mago nê lau sêkôc eŋ sa atom.

¹²Lau taŋ sêkôc eŋ sa to sêkêŋ gêwiŋ eŋ naŋ, tec kêkêŋ ŋaclai gêdêŋ êsêac gebe têtu Anôtônê ŋapalê.

¹³Êsêacnêŋ ŋam kêsêp dec to têntac kêkac ma ŋac teŋ kêka lasêŋa atom. Nêŋ ŋam jakêsêp Anôtôgeŋ.

¹⁴Biŋ tau kêtu ŋamalac mêŋgêmoa gêwiŋ aêac. Ma aêac talic ênê ŋawasi, taŋ moasiŋ to biŋŋanô gêjam eŋ auc naŋ, ma ŋawasi tau kêtôm Tama kêkêŋ gêdêŋ Latu tageŋ.

¹⁵Joaŋ gêwa eŋ ŋam sa kêkac awa sageŋ gebe “Ŋac tau, naŋ kasôm ênê biŋ gebe ‘ŋac taŋ êndaŋguc aê êmêŋ naŋ, gêmuŋ aê gebe eŋ kêtu aêŋoc ŋamata.’”

¹⁶Aêac samob takôc moasiŋ to moasiŋ aŋga gêŋ, taŋ gêjam eŋ auc samucgeŋ naŋgoc.

¹⁷Anôtô kêkêŋ biŋsu gêdêŋ Mose kêsôm lasê, ma moasiŋ to biŋŋanô kêsa aŋga Jesu Kilisi nê.

¹⁸Ŋamalac teŋ gêlic Anôtô atomanô, Anôtônê Latu tageŋ, taŋ gêŋgôŋ Tama labum naŋ, gêwa eŋ ŋam sa.

¹⁹Juda sêsakiŋ lau dabuŋwaga to Lewinê wakuc aŋga Jerusalem dêdêŋ Joaŋ sêja gebe têtu kênac eŋ gebe “Aôm asa.” Ma Joaŋ gêwa biŋ amboac tonec sa

²⁰ma kêsôm lasê to gêsaŋ biŋ teŋ auc atom, kêsôm lasêgeŋ gebe “Aê Kilisi tau atom.”

²¹Tec êsêac têtu kênac eŋ gebe “Amboac ondoc, aôm Elia me.” Ma eŋ kêsôm gebe “Aê eŋ atom.” Tec têtu kênac eŋ gebe “Aôm oc propete tau me.” Tec eŋ gêjô êsêac aweŋ gebe “Masi.”

²²Go têtu kênac eŋ gebe “Aôm asa. Ôsôm acgom gebe awa biŋ sa êndêŋ lau, taŋ sêsakiŋ aêac naŋ. Aôm taôm ôwa taôm sa acgom.”

²³Tec eŋ kêsôm gebe “Aê ŋac teŋ awa, taŋ gêmôêc gêmoa gamêŋ sawa gebe ‘Amansaŋ Apômtaunê intêna’ amboac propete Jesaia kêsôm.”

²⁴Go lau, taŋ Parisai sêsakiŋ êsêac naŋ,

²⁵têtu kênac eŋ gebe “Aôm Kilisi tau atom ma aôm Elia atom, ma aôm propete tau atom, mago amboac ondoc tec kôsagu lau.”

²⁶Tec Joaŋ gêjô êsêac aweŋ gebe “Aê tec kasagu lau ŋa bugeŋ, ma ŋac tau, naŋ amac ajala eŋ atom naŋ, tec wackêkô amac ŋaluŋgeŋ.

²⁷Eŋ kêdaguc aê gêmêŋ, ma aê katôm gebe janac pêla ênê atapa ŋalêkôŋ atom.”

²⁸Biŋ tonaŋ kêsa Betania, naŋ gêc Jordan ŋamakeŋ ônêŋa, gamêŋ taŋ Joaŋ kêsagu lau gêmoa naŋ.

²⁹Ŋageleŋ Joaŋ gêlic Jesu gêdêŋ eŋ gêmêŋ ma kêsôm gebe “Kec, nê Anôtônê domba, taŋ kêsip ŋamalacnêŋ sec su naŋ, tau tônê.

³⁰Ŋac tau, taŋ ŋawa eŋ sa gebe ‘Ŋac teŋ êndaŋguc aê êmêŋ, naŋ gêmuŋ aê gebe eŋ kêtu aêŋoc ŋamata.’

³¹Aê tec kajala eŋ kwanaŋgeŋ atom, mago Anôtô gebe lau Israel sêlic eŋ, tec aê mêŋkasagu lau ŋa bugeŋ.”

³²Joaŋ gêwa biŋ ŋagêdô sa gebe “Aê galic Ŋalau kêsêp aŋga undambê amboac balôsi mêŋgêmoa gêwiŋ eŋ.

³³Aê tauc tec kajala eŋ kwanaŋgeŋ atom. Mago ŋac, taŋ kêsakiŋ aê gamêŋ gebe jansaŋgu lau ŋa bu naŋ, kêsôm gêdêŋ aê gebe ‘Aôm oc ôlic Ŋalau êsêp mêŋêmoa êwiŋ ŋac teŋ. Ma ŋac tau tonaŋ oc ênsaŋgu lau ŋa Ŋalau Dabuŋ.’

³⁴Biŋ tonaŋ aê galic, tec gawa sa gebe Anôtônê Latu eŋ.”

³⁵Ŋageleŋ ma Joaŋ to nê ŋacseŋomi luagêc sêmu jasêkô kêtiam

³⁶e Joaŋ mataanô gêlic Jesu kêsêlêŋ gêmêŋ ma kêsôm gebe “Kec, nê Anôtônê domba.”

³⁷Ŋacseŋomagêc tau sêŋô eŋ kêsôm biŋ tonaŋ, tec têdaguc Jesu sêja.

³⁸Jesu kêsa tau ôkwi e gêlic êsêagêc têdaguc eŋ ma kêtu kênac êsêagêc gebe “Amagêc asôm asageŋ.” Ma êsêagêc sêjô eŋ awa gebe “Rabi” (tanam ôkwi gebe Mêtêmôkê), “aôm gôêc ondoc.”

³⁹Ma eŋ kêsôm gêdêŋ êsêagêc gebe “Amêŋ, mêŋalic.” Tec êsêagêc sêja sêlic gamêŋ, taŋ eŋ gêc naŋ, ma gêdêŋ bêc tonaŋ agêc sêmoa sêwiŋ eŋ. Ma biŋ tonaŋ gêdêŋ oc gebeŋ kwalamgeŋ.

⁴⁰Ŋaclagêc taŋ sêŋô Joaŋ kêsôm biŋ tau e agêc têdaguc Jesu sêja naŋ, nêŋ ŋac teŋ tec Simon Petere lasi Andrea.

⁴¹Ŋac tau kêtap têwa Simon sa kêtu ŋamata ma kêsôm gêdêŋ eŋ gebe “Aêagêc atap Mesia tau sa” (tanam ôkwi gebe Kilisi).