Johani 1:2-41

²Ichi chiva kwina ku matangilo ni Ireeza.

³Zintu zonse ziva pangwa kwali, mi nikusena iye kakwina nanga chintu chonke chisena chapangwa chiva pangwa

⁴Mwali kuva kwina vuhalo, mi vuhalo vu vwina mwiseli lya vantu vonse.

⁵Iseli lyi munika mukwelima, mi mukwelima kena uvakomi iseli.

⁶Kuva kwina mukwame yava ku tumitwe kwa Ireeza, uzo izina lyakwe ivali Johani.

⁷Avakezi cho kuva Impaki kwiza ku paka ze seli, njokuti vonse njete va zumine kakwe.

⁸Johani kena vali iseli, kono avakezi kuti za pake ze seli.

⁹Ivali iseli lyeniti, lyiha iseli ku vantu vonse, lyikeza mwi fasi.

¹⁰Avena mwi fasi, mi fasi lyiva pangwa kwali, mi fasi kena lyiva kumwizi.

¹¹Avakezi kuzakwe, mi zakwe kena ziva mutambuli.

¹²Kono kwavo vangi vava mutambuli, vava zumini mwi zina lyakwe, Avahi inswanelo yo kuva vana ve Ireeza.

¹³Ava kena vava zalwa cha malaha, kapa kentato ye nyama, kapa ke ntato yo muntu, kono ye Ireeza.

¹⁴Mi linzwi chilyeza kuva inyama niku hala mukati ketu. Tuva voni inkanya yakwe, inkanya sina yozo mi iye vulyo yava kuka zwilila kwe Shetu, ye zwile chisemo ni niti.

¹⁵Jahani avapaki kuamana iye niku lilila kwakwe, na wamba, uzu njiyena wa kwavo vani va wambi, 'uzo yo keza mumasule angu u i hitilila, kakuli kwavali kwina ni niseni kuva kwateni ime.'”

¹⁶Kuzwa ku kwizula kwakwe tuva tambili chisemo kuzwa chisemo.

¹⁷Kaho mulao uvahewa kwa Mushe. Chisemo ne niti ziva kezi ka Jesu Kreste.

¹⁸Kakwina yava voni Ireeza ke nako ni nako. Ireeza yenkefela, yena hembali ni chizuva che Shetu, ava mwizivahazi.

¹⁹Mi uvu nji vupaki bwa Johani aho majuda hava tumina ma Prisita ni naLivite kwali kuzwa kwa Jerusalema kuka muvuza, “njewe ni?”

²⁰Chentukuluho chawamba, mi kena va sampuli, kono che tava, “kena njime Kreste.”

²¹Cwale chiva muvuza, “Uchinzi cwale? Njewe Eliya?” Cha cho, “kena ime,” Chiva cho, “Umuporofita?” Chetava,” Ne.”

²²Cwale chiva wamba kwakwe, “njewe ni, njokuti tuwole kukaha inkalavo kwavo vakatutuma? Uwambanzi kuama iwe umwine?”

²³Chacho, “ni mulumo, ulila mwihalaupa: 'Mupange inzila ya Simwine iwoloke; sina muporofita Isaya mwava teli.”

²⁴Mi avo vavatumwa vavali ma Pharisi.

²⁵Chiva, muvuza niku muwambila, “Chinzi hokoloveza cwale heva kena njewe Kreste kapa Eliya kapa muporofita?”

²⁶Mi Johani cha vetava, kuwamba, “nikoloveza cha menzi. Kono mukati kenu kuzimene muntu imusezi;

²⁷iye yani chilila, uzo tukwele twe nsangu kani swaneli kusumununa.”

²⁸Izi zintu ziva pangwini Bethani kwi neku lyimwi lya Jordani, uko Johani kwava ka kolovelezwa.

²⁹Izuva lyi chilila Johani cha vona Jesu na keza kwali, “Lole, kwina imbelele ya Ireeza izwisa zivi mwi fasi!

³⁰Uzu njiyena kuni va wambi, 'iye yokeza ku masule angu uni hitilila, kakuli kwavali kwina nini seni kuva kwateni.'

³¹Kena niva kumwizi, kono ivapangali kuti e zivahazwe ku isilaele kuti niva ku koloveza ni menzi.”

³²Johani avapaki, kuwamba, “na vona Luho nilushetumuka sina inkuva kwi wulu, mi lyeza kwi kala hewulu lyakwe.

³³kena niva mwi zivi, kono iye yava ni tumi kwiza kukoloveza ni menzi wawamba kwangu, 'Kozo yete uvone Luhuho ni lushemukela hali ni kwikala hali, njeye yo koloveza mu Luhuho lu Jolola.'

³⁴Niva voni vonse niku paka kuti uzu nji mwana wa Ireeza.”

³⁵Hape, izuva lyi chilila, sina Johani hava kuzimene ni Varutwana vo vele,

³⁶vava voni Jesu na yenda hembali, mi Johani chawamba, “Lole, Imbela ye Ireeza!”

³⁷Mi varutwana vakwe vava muzuwi na wamba izi, mi chive chilila Jesu.

³⁸Cwale Jesu chava vona niva mwichilile mi chava wambila, “Musakanzi?” Chivetava, “Rabbi (Itoloka muruti), Wikala kwi?”

³⁹Cha wamba kuvali, “mwize ze muvone.” Cwale chiva keza kwiza kuvona kwekala; vave kali naye ilyo izuva, hakuli chivali inako ikwana ikumu.

⁴⁰Zumwi kuvali ava zuwi Johani na wamba mi nikwi chilila Jesu ivali nji Andrew, mukulwa Simone Pitolosi.

⁴¹Avatangi kuwana mukulwe Simone mi chawamba kwali, “Twawana Messiah” (italusa Kreste).