Ioanej 1:2-41

²I me kotikot ren Kot ni tapi o.

³I me dipijou karoj tapi kidar, o jota man meakot mia, me kaidin i kotin wiadar.

⁴Maur mi re a; o iei maur o marain en aramaj.

⁵A marain o me dakarada rotorot, a rotorot jota linan kila.

⁶Aramaj amen me pakadarador jan ren Kot ad a Ioanej!

⁷I me pwara don kadede, pwen kadede marain o pwe karoj en pojon pweki i.

⁸Kaidin i me marain o, a a kin kadede marain o.

⁹Iei marain melel, me pwara don jappa, ap kamaraini aramaj karoj.

¹⁰I me kotier jappa, o i me jappa tapi kidar, a jappa jaja i.

¹¹A koti don udan japwilim a, a japwilim a kan me jan i.

¹²Karoj, me kajamo i, a kotiki on ir manaman, en wiala jeri en Kot, ir, me pojon mar a,

¹³Me kaidin ipwidi jan nta, de inon en uduk, de inon en ol o, pwe ipwidier jan ren Kot.

¹⁴Majan me wia uduk ala o kotikot re atail, o kitail kilaner a linan, linan dueta linan en Ieroj eu jan ren Jam o, me dir en mak melel.

¹⁵Ioanej me kadede i nil laudeda indada: Iei i, me i padaki wei: Me pan kotido mur i, iei me mier mo i, pwe a kotikotier mo i.

¹⁶Pwe kitail karoj ale jan nan audepa a mak japan potopot.

¹⁷Pwe kapun me kokido jan Mojej, a mak o melel jan Iejuj Krijtuj.

¹⁸Jota me kilaner Kot kokodo, Ol ieroj ta, me kin kotikot pan kupur en Jam o, i me kotin kajaledar i.

¹⁹A met en Ioanej a kadede, ni men Juj kadarala jan Ierujalem jamero o lepit oko, pwen idok re a: Ij koe?

²⁰I ari kotin kadede; a jota likam; a kotin kadede: Kaidin Krijtuj nai.

²¹Irail idok re a: A ij? Eliaj komui? A majani: Kaidin nai i. Komui jaukop o? A japen: Kaidin.

²²Irail ap indan i: A ij komui? Pwe jen japen irail me kadar kit dor. Da me komui kadedeki pein komui?

²³A majani: Nai nil eu, me likelikwir jili nan jap tan: Kaineneda al en Kaun o, duen jaukop Iejaia majanier!

²⁴A irail pakadaradoer jan ren Parijär akan.

²⁵Irail ap idok re a indada: Da me komui wia paptaijiki, ma komui kaidin Krijtuj, o kaidin Eliaj, o pil kaidin jaukop o?

²⁶Ioanej japen irail majani: Nai me paptaijiki pil, a amen kin kotikot nan pun omail, me komail jaja.

²⁷Iei i me kotido mur i, me nai jowar on, en lapwada jal en japwilim a jut.

²⁸Mepukat wiauier Petapara palilan Iordan, waja Ioanej kin wia paptaij ia.

²⁹Mandan ran o a majani Iejuj a koti don i ap majani: Kilan Jippul en Kot, me kin wawei dip en jappa!

³⁰Iei i, me i padaki wei: Ol amen pan kotido mur i iei, me mier mo i, pwe a kotikotier mo i.

³¹A nai jo aja i, a pwe i en janjal don Ijrael, iei me i kokido paptaijiki pil.

³²A Ioanej kadede majani: I kilaner Nen o kotidido jan nanlan ni mom en muroi kotikot re a.

³³A nai jo aja i, a me porone ia don wia paptaijiki pil, iei me kotin majani on ia: Me koe pan kilan. Nen piridi jok poa, o kotikoteta re a, iei i, me kin wia paptaijiki Nen jaraui.

³⁴A i kilanadar ap kadedeki, me iei Japwilim en Kot.

³⁵Mandan ran o Ioanej pil kotida waja o, o na tounpadak riamen ian i.

³⁶A ni a udial Iejuj kotikot kokodo, ap majani: Kilan Jippul en Kot!

³⁷A tounpadak riamen ronadar a majan, ap idauen wei Iejuj.

³⁸Iejuj ap kotin jaupeido majani ara idedauen, ap kotin majani on ira: Da me koma rapaki? Ira potoan on: Rapi (iet wewe: Jaunpadak), ia waja re kin kotikot ia?

³⁹A kotin majani on ira: Kodo kilan! Ira ap poto don kilaner waja, me a kotikot ia, ap mimieta re a ni ran o. Mepukat wiauier impan auer kaeijok.

⁴⁰Andreaj, ri en Jimon Petruj amen re ra, me ronadar jan ren Ioanej ap idedauen i.

⁴¹I me diaradar maj udan ri a Jimon, indai on i: Je diaradar Mejiaj (iet wewe: Krijtuj).