João 1:2-41

²Pakero Ritonõpo maro ehse Kuamorepanekõ Ritonõpo poko.

³Eya tyripose Ritonõpo a emero porehme. Imepỹ nyrihpyry pyra. Emero porehme inyrityã rokene.

⁴Typoero isene toehse. Morara exiryke tarona tooehse saerehkaneme samo. Saerehkane saereh ãko. Moro sã tooehse ynororo seropõkõ amorepase Ritonõpo omiry poko, tuaro kuehtohkõme.

⁵Tuhke ajoajohpãkõ kynexine. Yrome Jezu mynyhpãkaposaromepyra toh kynexine. Ritonõpo omiry poko imehnõ anamorepakehpyra kynexine ynororo.

⁶Mame Ritonõpo nenyokyhpyryme mokyro, esety João.

⁷Kuuruse xine tooehse ynororo saerehkane sã exikety poko. Kuuruse xine tooehse aomiry etatohme kyya xine, Jezu enetupuhtohme roropa kyya xine.

⁸Mokyro nymyry saerehkaneme pyra kynexine repe. Yrome saerehkane poko urutõme ehtohme tymenekase ynororo Ritonõpo a.

⁹Saerehkane sã mã mokyro, nono pona ayhtohpyry. Kuamorepatorỹko mã emero, Ritonõpo omiry poko.

¹⁰Ritonõpo poko amorepatõme nymyry mã mokyro nono pona tooehse. Sero nono tyripose eya Ritonõpo a. Yrome seropõkõ tyrihpõkõ onenetupuhpyra toto.

¹¹Tosaka tooehse ynororo repe, yrome jekyry tõ ise pyra.

¹²Yrome toitoine ise toehse toto. Tonetupuhse eya xine. Morara exiryke mokaro tyrise typoenõme Ritonõpo a tonetupuhse eya xine exiryke.

¹³Moro enetuputyryke kyya xine Ritonõpo poenõme enurũko sã sytatose, kysekõ ae kuenurutopõpyrykõ pokoino pyra, imehnõ pokoino pyra roropa. Ritonõpo poe rokẽ enurũko sã sytatose, typoenõme kyrirykõ se toexiryke.

¹⁴Mame mokyro, Ritonõpo poko amorepatõ ahnome tonuruse. Yna maro ehse ynororo. Kure nymyry aexiry tonese yna a. Iirypyrymãkõ pyno aexiry tonese yna a. Zae aexiry roropa tonese yna a. Kure rokẽ Tumũkuru tyrise Ritonõpo a imehxo aehtohme, Tumũkuru nymyryme exiryke.

¹⁵Ipoko imehnõ turuse João a. Ynara tykase ynororo imoihmãkõ netaryme, —Mose poko kuuruatosene. Ynara asene oya xine, “Imepỹ oehnõko mana okomino imehxo exikety. Ywy ime hkopyra ase, ynororo ime kuhse mana. Osemazuhme jenurune repe. Yrome ynororo osemazuhme nymyry. Enurupyra ro jahtao naero ehse ynororo,” ase oya xine mosero poko, tykase João eya xine.

¹⁶Kypyno xine ro mana iirypyryme kuahtao xine. Morara exiryke kure kyriatosene.

¹⁷Ritonõpo nymeropohpyry Moeze a ynara tykase, “Kure rokẽ ehtoko iirypyryme pyra,” tykase. Yrome Jezu Kyrixtu kypyno xine ro mana iirypyryme kuahtao xine ro. Ynoro rokẽ zae kyritorỹko ropa mana.

¹⁸Ritonõpo onenepitopyra sytatose ipunaka. Toiro rokẽ mã ipoko kuamorepatorỹko. Mokyro Ritonõpo mũkurume exikety. Tumy maro exiketyme roropa ynororo mana.

¹⁹Morarame juteu tomo a typoetory tõ tonyohse. —Ytotoko, oturupotatoko João a, “Onoky nymyry ke hmano?” kaxitatoko eya, tykase toto tynenyokyry tomo a. Inenyohtyãkõ Ritonõpo maro oturuketõ kynexine, Rewi pakomotyã kynexine, enara. Toto enyokyhpõkõ juteu tõ kynexine Jerusarẽpõkomo, parixeu tomo, enara enyokyhpõkõ kynexine. Mame toytose toto oturupose, —Onoky nymyry ke hmano? tykase toto, juteu tõ nenyohtyã João a.

²⁰Mame João mynyhme pyra toehse. Ynara tykase ynororo, tozuhse toto eya, —Kyrixtu kara ase. Ritonõpo nymenekahpyry kara ase. Nonopõkõ kurãkaneme imenekahpyry kara ase, tykase eya xine.

²¹—Ynorome pyra awahtao onoky ke hma roropa? Eria hmahno? Moepyase ropa toko hro kapu ae? tykase toh eya. —Arypyra, ynoro kara ase, tykase João eya xine. —Pakato ro hmahno, urutono? Moepyase ropa toko hro kapu ae? tykase toto eya. —Arypyra, tykase ynororo eya xine.

²²—Yna zuruko, tykase toto. —Onokyh koh ma roropa? Otara oekary arõko ynanah osekaropyra awahtaho? tykase toto eya.

²³Mame ynara tykase João eya xine, —Ritonõpo omiry ekaroneme rokẽ ase. Imũkuru oehtãne rokẽ ase urutõme. Oorypyrykõ irumekatoko. Kuesẽkõ oehnõko mana. Morara exiryke oorypyrykõ irumekatoko aomiry etatohme oya xine. Morara kynako Izaja ekepyry, Ritonõpo omi poe urutõ pake. Moro saaro morara ãko roropa ase oya xine, tykase João eya xine.

²⁴Mame ynara tykase parixeu tõ omihpyry arohpõkõ João a,

²⁵—Kyrixtume pyra awahtao oty katohme imehnõ ẽpurihkãko mah? Eriame pyra awahtao, pake ro urutõme pyra roropa awahtao? tykase toto eya.

²⁶Mame João a tozuhse toto, —Nakuaka rokẽ toto ẽpurihkãko ase. Yrome arãnao xine imepỹ mana. Mokyro waro pyra matose.

²⁷Okomino oehnõko mana imehxo exikety ipunaka. Imaro jahtao ihxitapãnõko ase kure aexiryke, kure jexiry motye kuhse ynororo, tykase eya xine João.

²⁸Morara toehse Petania po, Joatão mõpoe, João a ahno ẽpurihkatopõpyry po.

²⁹Yrokokoro Jezu oepyry tonese João a. Ynara tykase ynororo, —Kaneru mũkuru kurã etapãko mã toto Ritonõpo maro oturuketomo. Yrome Ritonõpo nymenekahpyry mosero, kaneru mũkuru sã mose orihnõko mana, nonopõkõ rypyry korokatohme.

³⁰Mosero poko kuuruatosene. Ynara ase, “Imepỹ oehnõko mana okomino, imehxo exikety ipunaka. Osemazuhme jenurune repe. Yrome osemazuhme kuhse ynororo mana. Enurupyra ro jahtao naero ehse ynororo,” ase oya xine mosero poko.

³¹Pake onenetupuhpyra exiase repe. Ritonõpo mũkurume pyra ekaroase repe. Yrome ahno ẽpurihkase oepyase Ritonõpo omi poe, Imũkuru waro Izyraeu tõ ehtohme. —Mame Ritonõpo zuzenu yhtory enease. Ynara nase Ritonõpo ya,

³²“Juzenu yhtory enẽko mase orutua pona. Mokyro Juzenu ekaroneme nymyry mana oya xine,” nase mokyro ya, ahno ẽpurihkaneme jenyokyhpono.

³³Mame imeĩpo Ritonõpo zuzenu yhtory kapu ae enease rahkene. Utukuimo panõ nyhtoase Jezu pona.

³⁴Moro enease. Morara exiryke, Ritonõpo mũkuru nymyry mosero, ãko ase oya xine, tykase João eya xine.

³⁵Yrokokoro João moroto ropa kynexine, typoetory tõ maro oseruao kynexine. Ipoetory tõ asakoro.

³⁶Jezu ytory eneryhtao tyya ynara tykase João typoetory tomo a, —Ritonõpo nymenekahpyry mosero. Kaneru mũkuru sã mose orihnõko mana, nonopõkõ rypyry korokatohme, tykase João.

³⁷Morara kary etaryke João poetory tomo a Jezu tokahmase eya xine.

³⁸Jezu tõsenuhmase tỹkakoxi toto ẽpataka. Tokahmary eneryke tyya ynara tykase Jezu eya xine, —Oty se hko hmatou? tykase ynororo eya xine, tõturupose. —Arypyra. Otoko oesary nah? tykase toto Jezu a.

³⁹—Ehmaropa, tykase ynororo. —Senetatose jesary, tykase ynororo toto a. Toytose toto esary enese. Mame 4 orame toytose exiryke, tykohmãse toto Jezu maro.

⁴⁰Toiro Jezu ekahmahpõ esety Ãtare, Ximão akorõ mokyro Ãtare. Ximão esety akorõ Peturu.

⁴¹Axĩ toytose Ãtare turui zuruse, —Kyrixtu ynaneneno, tykase ynororo eya. (“Kyrixtu,” kary, “Ritonõpo nymenekahpyry, Kukurãkanekõme,” kary.)