Iosua 9:8-24

⁸Se ribalau Iosua arinai, si ene, Em heaheari ai. Iosua aridi eai i ene, Omi haedi eai au laoma?

⁹Se ribalau ia arinai si ene, Em heaheari oea esau eda roharoha eai se laoma, paana Guiau em Eaubada esana ai ataiei: ia vasalaulau ai ataieao, eo ena laulau gamagaridi Aigupito eai.

¹⁰Ena abiabi gamagaridi hinage Amoraiti edi Vasavasa labui aridi eai, Ioridano hari tupo eai Sihona, Hesebona edi Vasavasa, eo Oga, Basana edi Vasavasa, Asatarota eai.

¹¹Arinai ema babada, eo ema eanua tataodi gama garidi se ribalaoma arimai eai, si ene, Emi adaadausi alaena nimamiu eai au abi, au laubagibagiedi, au ribalau aridi eai, au ene, Emi heaheari ai: ta labini.

¹²Teina areto ta ema eda alaena ema numa eai ai abi ma gigiborina asubenana ne ai laoma arimiu eai, hage au ita i kokoeagi, eo i pohupohu:

¹³Eo teina uaina iledi hinage ma harihariudi ai hemonaudi: eo teina ama ruru, eo ae‐um ta se beabea paana ema dobila i roha ariri.

¹⁴Adi aiai ribana tatao se ataiei, nige se lau Guiau avana eai edi dobila se hesioi.

¹⁵Iosua i ava‐ehaedi, eo se labini, to se abihemauridi; Isaraela edi vasavasa aridi eai se riba aigora aridi eai,

¹⁶I lau e, asubena haiona se ohi vasa abo se ataiei isi heledi taumia, edi eanua hinage hanahanaudi eai.

¹⁷Isaraela tataodi se lau, asubena hehaionana eai edi eanua eai se lage. Edi eanua va esadi ede Gibeona, eo Sepaira, Birota, eo Keriga‐gerimi.

¹⁸Isaraela nanatunaeao nige se unuidi paana edi Vasavasa, Guiau, Isaraela edi Eaubada debana eai se aigora aridi eai. Isaraela gamagaridi edi vasavasa se monunuedi.

¹⁹Vasavasa va se ribalau Isaraela aridi eai si ene, Aridi eai ai aigora, Guiau, Isaraela edi Eaubada, debana eai: tabu ta abilau aridi eai.

²⁰Teina mo ta abi aridi eai: ta abihemauridi baaea lailai ata ta hearo, paana aigora va arinai ta aigora aridi eai.

²¹Vasavasa se ribalau aridi eai si ene, Abo ta abihemauridi: taiede isi abo Isaraela edi oeagi taugedari eai se lau, eo adi goila tauoioi eai se lau: doha hinage vasavasa va se heribadi.

²²Iosua i eogaidi i ribalau aridi eai, i ene, Omi saha au boraimai ta, au ene, ema eanua edadi se roha ariri, emi aba‐mia momohoi gegesimai eai?

²³Taiede abo au baaea, abo ai hepaisoaimiu, omi abo egu Eaubada ena numa oeagi taugedari, eo goila tauoioi eai au lau.

²⁴Iosua se heuio si ene, Mamohoi, ai em heaheari si heribamai si ene, Guiau, em Eaubada ena heaheari Mose i heriba oea maudoudoina abo se rediva, oea va taumiai hinage gamagaridi matamiu eai abo au unuidi, arinai ai matausiaririemiu, teina laulau ta hinage ai abi.