Zozuwe 9:8-24

⁸Ti ɠɛni Zozuwe ma: «Gá pɔ gi ɠɛ ga ɗa-wotiɠɛ nuiti.» Zozuwe ɠɛni ti ma: «Ɓɛ ɠa ga woye, mini ɠa wo zeɠeai ná?»

⁹Ti gooɠaaʋoteni, ti ɠɛ ma: «Ɗa-wotiɠɛ nuiti gi zeɠeʋɛ zooi ta zu, ɠoozama, gi ʋa, tɔɔzei Ɠɔoɠɔ GALAGI, ɗa-ƓALAGI maawooi ʋa. Gi maawooi mɛnigɛ, ta nii kpein é kɛɛni Ezipete yooi zu,

¹⁰ʋelei é Amɔɔl nuiti ta-masagiti soni da, niiti ti ɠɛni masadai ɠɛɛzu Zuludɛn ʋolu ʋelei, Ɠɛseɓon masagi Siɠon, ta Ɓasan masagi Wɔge, nii é ɠɛni zeini Asetalɔte.

¹¹Gá-ɠɛwolaiti, ta gá-you zu nuiti kpein ti ɠɛni gi ma: «À siɛ ɠɔnɔgiti seɠe ya, wo li, wo Izelayɛle nuiti ka, wo ɠɛ ti ma: ‹Gá pɔ gi ɠɛ ga wa-wotiɠɛ nuiti. Ade minazeɠe bo yɔɠɔzu.›

¹²Gá-ɓuluiti pɛtɛ, ti ɓadia ɠɛni de, siɛgi zu gi ti zeɠeni la ga siɛ ɠɔnɔgi, gi ɗa ɠula gá-ʋɛlɛiti bu, foloi gi siɛi lɔɔzeini la, ga gi ʋa wo ʋɔ bɛ. Wɛlɛ, niizu ti vɔa, ti ɗa vuinfuin.

¹³Niima lɔɔ wooleiti pɛtɛ, ti ma niinɛ ɠɛɛʋɛ de, gi ti laave, ti ʋalia ga. Gá-zeɠeiti pɛtɛ, ta gá-zaʋalagiti, ti pɛ ti ʋɔlɔzaɠaga, tɔɔzei siɛ ɠoozagi ʋa.»

¹⁴Izelayɛle nuiti ti ta-laamianigiti seɠeni, kɛlɛ ti la ɠɛni Ɠɔoɠɔ GALAGI ɠaazaɠani.

¹⁵Zozuwe ziilɛi fai ma minazeɠegi ɠɛɛni ti yɔɠɔzu, é ɓaa ti-yɛnvui maazu. Nuɓusɛiti ta-ɠundiɠiiti ti minazeɠeni, ti ɠona.

¹⁶Folo saʋagɔ leʋegai ma, minazeɠegi woga ʋoluma ti ʋɛ, pɛtɛ nii é ɠɛɛni, Izelayɛle nuiti ti kwɛɛni ga ti-zeiɲɔɠɔiti be, ti ɠɛni zeini ɠoba.

¹⁷Izelayɛle nuiti ti zeɠeni ti-zeizuʋɛ, ti folo saʋagɔ ziɛ wo, ti zeeli ta-laazuʋɛti. Naama laaiti ta ga: Gaɓaɠɔn, Kefila, Ɓeelɔte, ta Kiliyate-Yeyalime.

¹⁸Izelayɛle nuiti ti la ɠɛni ti ʋaani, tɔɔzei konai ʋa bɛbɛiti ta-ɠundiɠiiti ti boni, Ɠɔoɠɔ GALAGI, Izelayɛle ná-GALAGI laaseigi zu. Kɛlɛ nuɓusɛiti ti unsuyelii loni kundiɠiiti daalɔɠɔma.

¹⁹Kundiɠiiti kpein ti dɛɛni ga nuɓusɛiti, ti ɠɛ ti ma: «Giya ɠa gi konai woni ti ʋɛ, Ɠɔoɠɔ GALAGI, Izelayɛle ná-GALAGI laaseigi zu, niizu ade la zooga ade ʋa vɔɔɠu ti ʋa.

²⁰À wɛlɛ, ʋelei ade ʋaazu ti zosu da, da ti yɛsu vulua, de mina Ɠɔoɠɔ GALAGI ɠaazu ɲɔu lo ɓɔɠɔ ʋa, tɔɔzei konai ʋa, gi boni ti ʋɛ.»

²¹Kundiɠiiti ti ɠɛ ti ma: «Ta yɛsu vulua. Kɛlɛ kɛni ti ɗa koʋii ɠale, ti ɗa ziɛi zaɠa nuɓusɛiti kpein bɛ.» Naa ɠa é ɠɛni ga kundiɠiiti ta-levei.

²²Zozuwe Gaɓaɠɔn nuiti tolini, é ɠɛ ti ma: «Leeni vaa zu wo gi yaavani, wo kula eɠɛ wa ɠɛ ɠɛni zeini ɠoozama, tama wo zeini gi ɠobaʋɛ nɔ?

²³Niizu, wo voovooʋɛ, wo la mɔ ɠula duɔlai zu, eyɛsu ɠɔ, wa koʋii ɠale, wo ɗa ziɛi zaɠa, nà-GALAGI ná-pɛlɛi wu.»

²⁴Gaɓaɠɔn nuiti ti gooɠaaʋoteni, ti ɠɛ ma: «Gi kɛɛni ɠana, tɔɔzei ti gi ɠobavaawoni, ga Ɠɔoɠɔ GALAGI, ɗa-ƓALAGI devei veeni ná-botiɠɛ nui Moize ya, ga toɠa zooi kpein feezu wo ya, é ɠɛ wo gaa nui kpein undaaʋili, wa ɠɛna lia ga zeiɗa ga. Wo ʋaazuʋɛ, gi wola luani, é lo gi-yɛnvui ʋa. Naa ɠa é kɛɛni, gi naa ɠɛɛni.