Josue 9:8-24

⁸Gabaoʌ̃nebemarãba nãwã panusid̶aa: –Daira bãrã nezocarãa.– Maʌ̃ne Josueba nãwã iwid̶isia: –¿Bãrãra cairãda jãwã panʌ? ¿Sãmaʌba ze panʌ?–

⁹Ãdjia panusid̶aa: –Daira drua ãĩba tʌmʌba ze panʌa bãrã Ãcõrẽra trʌ̃ b̶ʌga b̶ʌ bẽrã. Daiba ũrĩsid̶aa idjia sãwã Egiptod̶e osida.

¹⁰Idjab̶a ũrĩsid̶aa sãwã Jordaʌ̃ quĩrãrẽbema amorreo bororãda poyasida. Naãrã Sehoʌ̃, Hesboʌ̃ purud̶ebemada poyasia. Maʌ̃are Og, Basaʌ̃ druad̶ebema Astarot purud̶e b̶ad̶a sid̶a poyasia.

¹¹Maʌ̃ bẽrã dai bororãba, dai druad̶ebemarã bid̶a nãwã jarasid̶aa: “Ota cod̶ira edad̶aped̶a israelerãmaa wãnadua. Ãdjirãa jarad̶adua dadjirãra ãdji nezocarã bẽrã necai b̶ead̶i carea ãdjirã ume bed̶ea b̶ʌ quĩrĩã panʌda.”

¹²Acʌd̶adua, dai zesid̶a ewarid̶e naʌ̃ paʌ̃ra wad̶ibid̶a jʌ̃wʌ̃rʌ̃ã b̶easia baribʌrʌ id̶ira zareacuaped̶a jũma ãrĩcuasia.

¹³Idjab̶a za panʌ uva b̶a tʌbada animarã e od̶a sid̶a enesid̶ad̶e wad̶ibid̶a djiwid̶ida b̶easia. Baribʌrʌ jũma dji sore bacuasia. Daiba cacuad̶e jʌ̃badara, jĩrũne jʌ̃ panʌ sid̶a dji sore bacuasia.–

¹⁴Gabaoʌ̃nebemarãba paʌ̃ eneped̶ad̶ara israelerãba ʌ̃cʌrʌ cosid̶aa. Mãwã cawabisid̶aa Gabaoʌ̃nebemarã ume bed̶ea b̶ʌd̶ida. Baribʌrʌ mãwã od̶i naẽna Ãcõrẽa iwid̶id̶aẽ́ basía.

¹⁵Maʌ̃ne Josuera Gabaoʌ̃nebemarã ume bed̶ea b̶ʌsia necai panani carea. Wãrãneba jarasia ãdjirãra bead̶aẽ́da. Waabema israelerã bororã bid̶a ab̶arida wãrãneba jarasid̶aa.

¹⁶Ewari ũbea bad̶acarea israelerãba cawasid̶aa Gabaoʌ̃nebemarãba ãdjirãra cũrũgasid̶ada. Cawasid̶aa tʌmʌba zed̶aẽ́ basida, ãtebʌrʌ ãdjirã caita panabadada.

¹⁷Ara maʌ̃da israelerãra ãdjirã caid̶u wãsid̶aa. Ewari ũbea babʌrʌd̶e ãdji puru b̶ead̶aa jũẽne wãsid̶aa. (Ãdji purura naʌ̃gʌrã basía: Gabaoʌ̃ araa, Capira, Beerot idjab̶a Quiriat-jeariʌ̃.)

¹⁸Baribʌrʌ israelerãba Gabaoʌ̃nebemarãra bead̶aẽ́ basía, Ãcõrẽ trʌ̃neba dji bororãba wãrãneba jaraped̶ad̶a bẽrã ãdjirãra bead̶aẽ́da. Maʌ̃ carea israelerãba ara ãdji bororãda biẽ́ jara panesid̶aa.

¹⁹Baribʌrʌ dji bororãba nãwã jarasid̶aa: –Dadji israelerã Ãcõrẽ trʌ̃neba naʌ̃ Gabaoʌ̃nebemarã ume bed̶ea b̶ʌsid̶aa. Maʌ̃ bẽrã ãdjirãra bead̶acara panʌa.

²⁰Ãtebʌrʌ zocai b̶ʌd̶ia. Dadjirãba wãrãneba jaraped̶ad̶ara ĩjã od̶aẽ́bʌrʌ Ãcõrẽda dadjirã ume quĩrũya.–

²¹Maʌ̃ba israelerã bororãba jarasid̶aa Gabaoʌ̃nebemarã zocai b̶ʌd̶amãrẽã. Baribʌrʌ ãdjirãra b̶ʌsid̶aa israelerã itea tʌbʌ b̶ʌá pananamãrẽã idjab̶a baido jue pananamãrẽã. Mãwã israelerã bororãba wãrãneba jaraped̶ad̶ara osid̶aa.

²²Josueba Gabaoʌ̃nebemarãra trʌ̃biped̶a nãwã jarasia: –Bãrãba ¿cãrẽ cãrẽã dairãra cũrũgasid̶a? ¿Cãrẽ cãrẽã tʌmʌba ze panʌana asid̶a? ¡Bãrãra dairã caita panabadaa!

²³Bãrãba dairãda cũrũgaped̶ad̶a bẽrã dai Ãcõrẽba bãrãra biẽ́ erob̶aya. Id̶iba ʌ̃ta bãrãra dai nezocarãda panania. Dai Ãcõrẽ de itea tʌbʌ b̶ʌá panania idjab̶a baido jue panania.–

²⁴Ãdjia Josuéa nãwã panusid̶aa: –Ne wayaad̶eba dairãba mãwã osid̶aa. Cawasid̶aa bãrã Ãcõrẽba idji nezoca Moisea jarasida dai drua bãrãa jũma diamãrẽã idjab̶a dairã jũma quenamãrẽã. Maʌ̃ bẽrã crĩchasid̶aa bãrãba dairãra jũma quenanida.