Josua 9:8-24

⁸Tiali goli, te Hivi dabego Josuabolo te po wai, “Dago te dagego sę bidi dabego sę ebo tiwai gilama sę yaibao.” Tialima, Josuago augwalibolo hanalu wali, “Dage mena hani dawe? Tama dage menadu asaliwe?”

⁹Tialima, augwaligo agabolo te tiwai po wai, “Da te digibulu bulu me delidu asali, magi baso meni, dago te dagego Genuai Bidi Godigo genuai nogi elalubo po odalio. Dago te tigidali sę agai te Isip tǫde yali odai dao.

¹⁰Dago agai te Amor dabego tuni bidi si dali, te wę Jordan te sia ge pedalubo badu yali sę po dabe odai. Augwali si da te Sihon, te Hesbon bulu tuni bidi, me Ok, te Basan tuni bidi dao. Aga te Astarot tede bidai dao.

¹¹Tama dena genuai bidi dabego, me te dago tǫde bidalubo tigidali we bidigo dabolo te tiwai po wai, ‘Te dage bilabo me deli te nai meba sisi ilao. Tama dage pelama, te Israel we bidi dabe sisinigi pelama, te po wagi pao, “Da te dagego sę ebo bidi dabe dao. Te dagego da dali te bugagia bidabo bomai po me deli dąų wao.” Te po Israel dabebolo pusigi pao,’ dena hani begego dabolo te po wali.

¹²Te dago tubo nai bret suao. Te dago bidibo bulu taga soyu soali sogo, te bret tamadi tama ulama posolo elaluali. Tiali goli, suao! Te bret dabe te wa pelama, tama dwalio.

¹³Te e meme tigiwali botol dabe te gesi elalubadi, te sogo dago te wain ąį buai. Tiali goli, megi da, suao! Augwali te pepeda pai. Tama dago gudali ugwa dabe me, te sągą nadoba me, te bobobage sunumidu asidubadi dolai dao,” te po wai.

¹⁴Tama te Israel bidi dabe augwaligo te Hivi dabego elalubo nai dabe suali. Tiali goli, hasia bolo te Genuai Bidi God aga homuba augwaligo me hanalubeo.

¹⁵Tialima, Josuago augwali nogo menama, tama te Israel dabego augwali munu me eligobeo po olama, te bomai po augwali dali dąų wai. Tama te Israel dabe genuai bidi dabego me te bomai po augwali dali dąų walio.

¹⁶Augwaligo te bomai po dąų ola sai madi, tama nosali sela sogo bidai digi, te Israel dabego te po wali page gegali, te bidi dabe augwali te digibulu bidi meni, te bulu pąde bidi naga asai yalio.

¹⁷Tama tibaso, megi da, te Israel dabe augwali hogodama, te gasa badu poloba palio. Augwali pelama, te sela sogo dąį igi pabode, tama augwali te hani dabego hanuba sabolai. Te hanu dabe nogi e dao: Gibeon, Kefira, me Berot, me Kiriat Jearim. Te e tama hanuba augwali sabolai.

¹⁸Tiali goli, te Israel dabego augwali me elibeo, magi baso meni, te Israel augwa genuai bidi dabego te bomai po te we bidi augwali dali te augwa Genuai Bidi Godigo nogide te po te we bidi dabe dali dąų wai. Tama tiyu, te Israel dabego te augwa genuai bidi dabe augwalibolo te tama tiali pode te wado po naga augwalibolo wai dao.

¹⁹Tiali goli, te Israel dabe augwa genuai bidi dabego po wei ponoyu, te po wai, “Dago te we bidi dabe augwali dali te dago Genuai Bidi God dali te bomai po dąų walio. Dago megi augwali me dologobeo!

²⁰Dago augwali magi baso sula tagaliyu meni, te dago bomai po dąų walalio. Te dago augwali elibaso da, teda Godigo da dolaibao.

²¹Te augwali bidimainu sula tagaliyu, tiali goli augwaligo te dago isi me wę dabe sela mabo sę emainao.” Te genuai bidi dabego te tiwai po naga walai. Te po obaso, te Israel dabego te Gibeon bage elebeo.

²²Tialima, Josuago te Gibeon dabe i olama asobode, tama augwalibolo agai te po wai, “Magi baso dagego da tibo po ola maniwe? Dagego te dage digibulu me delidu asalio po wali. Tiali goli, dage pąde naga bidibao!

²³Dagego tibo po waligo da, teda dagebolo Godigo dwai sę ilaibao. Tama tibaso, sesemane sogo dage te eno Godigo lotu beba te isi me wę me sela mabo sę bidi bidagameo,” wali.

²⁴Tama te Gibeon dabego te po wai, “Dago e tiwai po odali, te dagego God, Genuai Bidigo, te aga sę bidi Mosesbolo weyu, te tǫ tigidali dagebolo mawaibao po wai, tama dage sabalubo sogo da, teda dagego tede bidibo we bidi tigidali ela siliąo po walio. Tama tibaso, da dwai wi mu dagede ebaso, tama dago te usu sabo po wai dao.