JOSUA 9:8-24

⁸Eme jaŋe Josua ʒiŋuc muhuc âzâcnembiŋ: “Nâŋe gore kiŋaŋŋicfâc.” Ehame Josuazi wio‐jarerâ muwec: “Ŋoŋe wenirec wareŋgopieŋ, ʒâŋe‐ŋeŋic mo?”

⁹Eme jaŋe âzâcnerâ mumbiŋ: “Wofuŋge Anutu ʒâŋe biŋe‐ticnere erâ kiŋaŋŋicfâcge nâŋe mâreŋ wiwickonec jâmbâŋ wareŋgopeneŋ. Eki Aigita mâreŋko mâsi bawec irec biŋe manambeŋ wâc.

¹⁰Erâ wâc Amori ŋic jaŋere ŋicwofuŋ jajahec Jordaŋ ocniŋucnao jupic, Hesiboŋ haere ŋicwofuŋ Sihoŋ â Basaŋ mâreŋte ŋicwofuŋ Ogo, Asitaroto haeo juwec, jaherao wiac bâfuawec i manambeŋ jaha.

¹¹Eme soŋaŋfâc‐nâŋec â ŋic gâcne sasawa jaŋe ʒiŋuc muhuc nâzâ sorec embiŋ: ‘Hatare wiac bâmockerâ raku bâfuac‐joparâ ʒiŋuc jazanʒepieŋ: Nâŋe ŋoŋere kiŋaŋŋicfâc. Irec qâturerâ ʒâʒâfic‐nâŋec moc enʒepeneŋ.’

¹²Ŋoŋerao warenaŋte hata fuŋkembeŋ dameŋ ira nânâ ʒi ficnâŋeckonec hâroŋne foha rorâ bawarembeŋ. Ehame ʒi ine kereŋkerâ nusuŋkekicne fome honeŋgopieŋ.

¹³Â waiŋ ʒopo‐nâŋec ʒi wâc ɋâricnea foha qapene huwec. Eme ʒi ine tâcne ʒaŋ ekac. Erâ ŋaqi qoruc â kikehuhu‐nâŋec i hata ʒoricne ʒora warehuc juhapene sucke tâc efârewec.”

¹⁴Eme Israe ŋic jaŋe qanaŋ Wofuŋtao fuŋne mananiŋte mu wioc moc mi ehuc ŋic jaŋeraonec hatare nâsiŋ moc rombiŋ.

¹⁵Ehuc Josuazi jaŋehec wama qaqac erâ juniŋte mana‐jareme ʒâʒâfic embiŋ. Ehame Israe kikefuŋte soŋaŋ jaŋe mujomire‐jarembiŋ wâc.

¹⁶Ʒâʒâfic erâ jufehapie ʒoaŋ jahec â moc tarame Israe ŋic jaŋe ʒiŋuc manambiŋ: Jaŋe hae mâreŋ ʒirecteaŋ.

¹⁷Eme Israe ŋic jaŋe raku hae‐jeŋic ŋerawec ira ʒoaŋ jahec â moc eha fisimbiŋ. Hae‐jeŋic ʒiŋuc ŋerawec: Gibeoŋ, Kefira, Beroti â Kiriati‐Jearim.

¹⁸Erâ Israe ŋic soŋaŋfâc‐jeŋic jaŋe Israe Wofuŋ Anutu‐ticnere maio mujomire‐jarembiŋte mi jopambiŋ. Ehame kikefuŋ jaŋe soŋaŋfâc‐jeŋic jaŋere mana gâpârehuc masu mumuniŋ bambiŋ.

¹⁹Eme soŋaŋfâc‐jeŋic jaŋe kikefuŋ ʒiŋuc jazambiŋ: “Israe ŋic nâŋâcne Wofuŋ Anutu ere maio mujomirembeŋte moc mi jopanʒepeneŋ.

²⁰Juniŋte mujomire‐jarembeŋ irec okacne fai‐nâŋecko fezacte kecʒiŋuc sawa enʒepeneŋ:

²¹Nâŋâc mana‐jarepene junʒepieŋ.” Eme soŋaŋ jaŋe mumbiŋ irec sâcko kikefuŋ jaŋere ʒoc roro â opâ fifia ŋic jumbiŋ.

²²Eme Josuazi hetumaŋ‐joparâ kecʒiŋuc wio‐jarewec: “Ŋoŋe ŋondeŋ‐nâŋecko juipiehuc wemocte ʒiŋuc muhuc eatuc‐nâpombiŋ, ‘Nâŋe mâreŋ wiwickonec jâmbâŋ’?

²³Irec ŋoŋere faio sâwec fohuc juzejec. Ŋoŋe kiŋaŋ giere hati juhuc dameŋ sâc Anutu‐nanere ficte ʒoc roro â nombâŋkonec opâ fâfâre gie bahuc junʒepieŋ.”

²⁴Eme jaŋe dâŋ bâtikiecnehuc mumbiŋ: “Kiŋaŋŋicfâcge nâŋe ʒiŋuc manambeŋ: Wofuŋ Anutu‐ŋeŋiczi mâreŋ sasawa ʒi ŋareocte kiŋaŋŋic‐ticne Mose âzâcnewec. Ehuc mâreŋ ʒirec ŋic bâsirowec‐nâpo‐fâreocte muwec. Irec ŋoŋere hâwic‐nâpome juju‐nâŋecte mana mezac erâ mâsi keci embeŋ.