Joshua 9:8-24

⁸Ma gaira tara bosa vania Joshua, “Ighai nimiu na tinoni ni lutu.” Joshua te huatira me ghaghua, “?Ma hei sughua ighau? ?Mi vei tau butu mai?”

⁹Ma gaira tara bosa tughu mara ghaghua, “Ighai tai butu hau ngangata mai, mai rongovia na ladana Yahweh, nimiu na God, mana hava te gonia tana butonikomu Egypt.

¹⁰Mai rongovia ghua na hava te nea vanira rua na vunaghi haba uluna na beti Jordan, na vunaghi haba Sihon ni Heshbon ma Og, na vunaghi haba ni Bashan (te kabu i Ashtaroth).

¹¹Keri ge ra talu kokokoe vanighai na lei naghomami ma kulamami na vure ge kai gonidilai na balu oho ta nimami na mai righiamiu ge kai nimua na tinoni ni lutu vamua. Mai nongighau, gekau gonia na baubahu ni mabo kolughai, gekai tamakulani kolughau.

¹²Na berete ini tara papara tai divei tana bingiti tai sania mai na komumami, mi taeni ra mamaha mara modiri tua.

¹³Na lei ghuighuli ni sheep tai dodei nia na wine tara vaolu bona tai sania na komumami, mi taeni tau righighi ra haulaghi mara potapota tua. Ma sughua nimami na tivi, maia na hahara ni tuamami tara tarosi ta nimami va vinano mai.”

¹⁴Mana lei mane naghodira na vure ni Israel tara mua diki talutate/huatia vania God, keri ge ra ghania na berete, na vaughilala tara holopangotira rana vure.

¹⁵Ma Joshua te gere aha tana baubahu ni mabo, kolura na lei mane nagho ni Israel tara talamaghi mara holopangotia didira na baubahu.

¹⁶Mana lei ghanaghana e tate murina tolu na bongi, na lei mane ni Gibeon ini te dutu so na komudira.

¹⁷Mana vure ni Israel tara rughuhoru ma va kene taotaonia gaira va saravia na komudira e tolu vamua na bongi, mana lei aha ni komu raini Gibeon, Kephirah, Beeroth mi Kiriath-jearim.

¹⁸Mara mua matera, na pukuna na lei mane nagho ni Israel tara diki gonia tua na baubahu itadira tana ahana Yahweh, na God ni Israel gekara mu matera makara mua gonia vanira siki totobo. Mana vure ni Israel tara nia ghuru varongo vania Joshua kolura nia na balu naghodira na vure ni Israel nia na baubahu te mava eni.

¹⁹Mara na lei manenagho tara bosa mara ghaghua, “Ighita ta goni sokoa ta na baubahu te mava eni tana ahana Yahweh, dida na God geka mua matera.

²⁰Ka nera gekara vola, ke bei rutu vanighia gea God ka diu na baubahu ta gonia tana ahana.

²¹Ka lubatira makara vola, hauva ka nera ge kara tagi ghai makara heo beti vanighita.

²²Ma Joshua te holora na lei tinoni ni Gibeon me ghaghua vanira, “Na hava na pukuna gau pegoghai? Au bosa ke, me hau ngangata na komumiu, au ghaghua! Hauva mau pego! E mua hau so na komumiu.

²³Ma God ke deteghau, na pukuna nimiu na pegopego, keri ke, mi geva ighau udolu nimami na seka, ma nimiu na lutu ke na tagi ghai maia na heo betina na Vale tapole tabu nina/dida na God.

²⁴Ma gaira tara bosa tughu vania Joshua, “Ai gonia na pego na pukuna ra bosa vanighai a Yahweh, nimiu na God, te bosaa vania nina tinoni ni lutu, Moses, geke haurakera me ke matera na lei tinoni tara ghanara. Mai mataghu mai nia ghaghua na volamami gai gonia sughua.