Joshua 9:8-24

⁸Miyad ga’ar ngak Joshua, “Gamad e ngu pigpiggad rom.” Me fithrad Joshua ni ga’ar, “Gimed chon mini’? Ma uw e kambad riy?”

⁹Miyad weliy salparad nra ga’argad: “Siro’, ma kugbad u bang ni rib palog, ni bochan e kug rung’aged marung’agen SOMOL ni Got rom. Kug rung’aged urngin ban’en nike rin’ u Egypt

¹⁰nge n’en nike rin’ ko fa gali Pilung nu Amor ko ngek u Jordan ni Sihon ni Pilung nu Heshbon nge Og ni Pilung nu Bashan, ni yow ma par u Ashtaroth.

¹¹Keyog e pi’in ma yog e thin romad nge gubin e girdi’ ni yad be par u daken e but’ romad ni nggu feked boch e ggan, ya nggu flaged rogmad ko milekag ni nggubad gu mda’ niged gur. Ma kanog ngomad ni nggu manged tapigpig rom magmad yog ngom ni ngam fal’eg ba tha’ u thildad.

¹²Amsap ko flowa romad, ya ka nap’an ni gu chuwgad u tabinaw romad ni nggubad guyed gur, ma ka ba guwal. Ma chiney, e am sap ya ke mlik’ ma ke pthethaw.

¹³Nap’an ni gu suguyed e pi tutuw ko wayin romad, ma kab be’ech, ma am sap! Ya ke kaday. Mad romad nge sus e go’ ke kaday ko milekag nib n’uw.”

¹⁴Pumo’on nu Israel e ra feked boch fapi ggan rorad, machane dar fithed murung’agen ngak SOMOL.

¹⁵Me fal’eg Joshua ba tha’ ni ngar tafgergad e girdi’ nu Gibeon ma ngan pagrad ni dab nli’rad. Pi’in yad ma yog e thin ko ulung nu Israel e ra dugliyed ni ngar ted e ra tha’ nem nib mich.

¹⁶Dalip e rran nga tomuren ni kan ngongliy fare tha’, me pir’eg yu Israel ni fapi girdi’ e yad ma par nib chugur.

¹⁷Me’ere yan e girdi’ nu Israel u lan dalip e rran ngar tawgad ko fapi binaw nma par fapi girdi’ riy ni aram yu Gibeon, Chefirah, Beeroth, nge Kiriath Jearim.

¹⁸Machane piyu Israel e dabkiyag ni ngar li’ed e picha’nem, ni bochan fare tha’ nike micheg e pi’in yad ma yog e thin rorad nga fithingan SOMOL, ni Got rok yu Israel. Urngin e girdi’ nra topluwgad ko fa pi’in yad ma yog e thin rorad u murung’agen e ren’em,

¹⁹machane ra pi’ed e fulweg riy nra ga’argad, “Kug micheged ngorad u fithingan SOMOL ni Got rok yu Israel. Chiney e dabkiyag ni ngad rin’ed ban’en ngorad.

²⁰Thingar dapaged ndab da li’edrad ni bochan e tin kad micheged ma fa’anra dab dfolgad, ma Got e ra gechig nagdad.

²¹Ngad tedrad ndab nli’rad, machane ngu’ur th’abed e l’ud miyad be ling e ran rodad.” Irera’ e n’en nike yog e picha’ nem ni yad ma yog e thin.

²²Me pi’ Joshua e thin ni ngan fek e girdi’ nu Gibeon i yib ngak, me fithrad, “Mangfan ni kamban niged gamad ni kamoged ngomad ni gimed ma par nib palog nga orel, ma irera’ ni gimed be par nib chugur?

²³I Got e bayi kirebnag wa’athmed ni bochan e ran’ey ni ka mu rin’ned. Tiromed e girdi’ e bay urpired ni gubin ngiyal’ ni yad bogi sib, ngu’ur the’bad e l’ud ma yad be mat’eg e ran i yib ko naun rok e Got rog.”

²⁴Miyad fulweg, “Siro’, kug rin’ed ban’en ni aram rogon ni bochan e kug nanged ni riyul’ ni SOMOL ni Got rom e keyog ngak Moses ni tapigpig rok ni nge pi’ ngom e gi binaw ney ni ga’ngin me li’ e girdi’ ni yad be par riy u nap’an ni gimed be yan nga m’on. Ma kug rin’ed ni bochan e kugm’ad ko marus ngom; ma kagmad be rusnag e pogofan romad.