Josue 9:8-24

⁸Ne mibpehizuhizu sikandan ki Josue. Ke sikandan te, “Andam key he ebpenilbi keniyu.” Ne mid-insà si Josue kandan te, “Hentei kew wey hendei kew ebpuun?”

⁹Ne midtavak dan te, “Diyè key ebpuun te utew meziyù he lugar. Midhendini key su nekezineg key mehitenged te Nengazen he Megbevayè niw. Netudtulan key te langun he mibeelan din diyà te Ehipto,

¹⁰wey is langun he mibeelan din duen te zezuwa he Amorihanen he hadì he ziyà dapit te edsilaan he iyan si Hadì Sihon he hadì te Heshbon, wey si Hadì Og he hadì te Bashan he ed-ubpà diyà te Ashtarot.

¹¹Umbe, midsuǥù key te menge pengulu zey wey zuma zey he menge meǥinged he endama zey is keenen he egkelutù dey ne medhengkayi key te kebpekidhinguma keniyu su wey zey sikiyu mekeǥiyi he andam key he ebpenilbi keniyu, basta ebpekid-uyun kew kenami he kenè key keniyu edhilevetan.

¹²Ahaa niw man heini is uwiten dey he supas. Meinit pa heini te kegenat dey, piru ǥuntaan mibmezesen en ne nengepugpug en.

¹³Heini is lundis he teleǥuey zey beǥu pa heini hein midteǥuan dey te vinu, iyan, guntaan egkevindas en. Is menge visti zey wey menge sandalyas dey ne nengezaan en tenged te kegkeuǥet te kedhipanew zey.”

¹⁴Midsusi te menge Israilihanen haazà is menge lutù dan piru wazà sikandan mebpekisambag te Nengazen ke hengkey is ereg he ebeelan dan.

¹⁵Ne mibpekid-uyun si Josue kandan he kenè din sikandan edhilevetan wey ebpenhimetayan. Ne nenangdù is menge pengulu te Israel mehitenged kayi.

¹⁶Ne hein nekelavey en is tetelu he andew puun te kegkeuyun dan, netudtulan is menge Israilihanen he uvey zè bes is ed-ubpaan duen te menge etew.

¹⁷Umbe, migenat is menge Israilihanen, ne iketelu he andew te kedhipanew zan nekeuma zan diyà te menge inged he ed-ubpan duen te menge etew. Heini he menge inged iyan is Gibeon, Kefira, Beerot, wey Kiriat Jearim.

¹⁸Piru wazà sikandan surunga te menge Israilihanen su ǥeinà te nekepenangdù en diyà te kandan is menge pengulu te Israel te penangdù he mibpeseksiyan te Nengazen he Megbevayà te Israel. Midriklamu is menge Israilihanen diyà te menge pengulu zan,

¹⁹piru midtavak haazà is langun he menge pengulu zan te, “Nekepenangdù kiw en diyà te kandan te mibpeseksiyan te Nengazen he Megbevayà te Israel, umbe kenè tew sikandan egkehilevetan.

²⁰Iyan dà heini ed-ul-ulahan tew: Kenè tew sikandan ebpenhimetayan su kela ke siluti kiw te Megbevayà su nekepenangdù kiw en diyà te kandan.

²¹Kenè niw en sikandan penhimetayi. Piru edhimuwen tew sikandan he perepengayu wey peresekezu para kenitew te langun.” Ne iyan heeyan nehitavù te menge tig-Gibeon su iyan man heeyan migkaǥi zuen te menge pengulu mehitenged kandan.

²²Impetawag ni Josue is menge tig-Gibeon ne migkeǥiyan din te, “Maan is midterteruan key keniyu? Maan is migkaǥi kew he ziyè kew ebpuun te meziyù he lugar, he kayi kew zè bes he meǥinged te uvey zey?

²³Ne tenged kayi te vaal niw edrewakan kew te Megbevayà: Puun guntaan penilbi kew en pinaaǥi te kebpengayu wey kebpenekezu para te valey te Megbevayè ku.”

²⁴Ne midtavak dan si Josue te, “Mibeelan dey heini tenged te nahandek key he kela ke penhimetayi key keniyu. Su netuenan dey he midsuǥù te Nengazen he Megbevayè nu si Moises he suluǥuen din he ibeǥey ziyà te keniyu heini he menge tanà ne egeraan is langun he meǥinged kayi.