Iosua 9:8-24

⁸Lakea e huriki a Hivi ri takia e Iosua ri ta maea, “Mi ngaru ni leho manga a vora ne mua.” Lakea e Iosua i nana ria, “E rei a kabu ne mua? Mu valai vai?”

⁹Lakea ri tuverei ri ta maea, “Mi malaga na tanga basi, a vuhuna mi longoa a nuverei ne BAKOVI DAGI a Vure ne mua. Mi longo a nuverei na maka maki i rata o Egipto.

¹⁰Mi longo a maka maki i rata na hariki ala rua o Amor na tabeke ne Iordan. Re Sihon a hariki na tanga e Hesbon, e Og a hariki na robo e Basan, hosi i made na tanga e Astarot.

¹¹E huriki a gare ne mia turane huriki lobo na robo ne mia ri taki mia, ri ta maea, ‘Mu bole ranga maki ni kani ne mua, mu vano mu taguia a kabu iea, mu ta maea, “Mia e huriki a vora mua. Mu ratea ne mia tara ngava dagi si gi made kamumu palupu.’”

¹²O matai a maka bret ne mia. Na tahuna mi malaga na tanga mi laho valai a maka bret ni gutu karaba. Pali ngane o matai. A bret nga ri madea ri pu pali.

¹³A maka kulina meme nga a kuli karaba na tahuna mi guru dili a vain ne ria, pali o matai ngane ri matutu pali. A maka varakia a vahapolo ne mia ri matutu pali na dala malaku.”

¹⁴Lakea e huriki a bakovi o Israel ri bole a maka maki ne ria, pali i uka ma ri nana e BAKOVI DAGI na niluhoi vona.

¹⁵E Iosua i rata kamumu e huriki a Hivi, i rata a ngava dagi na nivalemu turane ria, i uka ma ge rabalaki ria. E huriki a matakari o Israel ranga ri ta muholi ri gi ramaia a ngava dagi iea.

¹⁶Ri rata loboa a ngava dagi, pali muri na parava i tolu ri lohoka vona re huriki nga i uka ma ria a viri basi, a tanga ne ria i tabukoi kunana.

¹⁷Ngane e huriki a Israel ri malaga ri vano, muri na parava i tolu ri bele na maka tanga ne huriki a bakovi nga. A rana a maka tanga ne ria e Gibeon, e Kepira, e Berot, e Kiriat-Iearim.

¹⁸Pali e huriki a Israel i uka ma ri rabalaki ria, a vuhuna e huriki a matakari ne ria ri ta muholi na ngava dagi turane huriki nga na rane BAKOVI DAGI a Vure ne ria. E huriki a Israel ri tahate e huriki a matakari ne ria vona a naro ri ratea.

¹⁹Pali e huriki a matakari ri koli ri ta maea, “Mi ratea pali turane ria a ngava dagi na rane BAKOVI DAGI a Vure ne hita. Naha ni rabalaki ria.

²⁰Ri gi made, a vuhuna si ta muholi turane ria pali. Hita bara si rabalaki ria, e BAKOVI DAGI bara i habi a vuranga ne hita.

²¹Ngane ri gi made, naha ni rabalaki. Pali a leho ri gi rata ri gi popo a kai, ri gi kiru a naru ne hita lobo.” E huriki a Israel ri longototo a nitane huriki a matakari ne ria, i uka ma ri rabalaki e huriki nga.

²²Muri e Iosua i gale valai e huriki a Hivi na tanga e Gibeon i taki ria, i ta maea, “I navai mu tami mia? Mu taki mua ta mu malaga na tanga basi mu valai. Pali mua mu made tabukoi kunana.

²³Mu tami mia, ngane e BAKOVI DAGI bara i rata hale mua. Na parava vakaroro bara mu leho ni popo a kai, ni kiru a naru na roho na Vure ne mia.”

²⁴E huriki a Hivi ri koli ri ta maea, “Mi longo a nitane BAKOVI DAGI a Vure ne mua i taki e Moses a vora vona, ge habia ne mua ra malala iea. Na tahuna mu bele, bara mu vakalobo liu e huriki ri made vona a malala iea. Lakea mi mangenge hateka ne mua, mi tami mua.